Boxing Day Test: 575 ரன்களில் ஆஸி டிக்ளர்; மீண்டும் தடுமாறும் தென் ஆப்பிரிக்கா!
ஆஸ்திரேலியா- தென் ஆப்பிரிக்கா அணிகள் மோதும் 2ஆவது டெஸ்ட் போட்டி மெல்போர்னில் நடைபெற்று வருகிறது. தென் ஆப்பிரிக்கா முதல் இன்னிங்சில் 189 ரன்னில் சுருண்டது. பின்னர் முதல் இன்னிங்சை ஆடிய ஆஸ்திரேலியா நேற்றைய 2ஆவது நாள் ஆட்ட நேர முடிவில் 3 விக்கெட் இழப்புக்கு 386 ரன் குவித்து இருந்தது.
டேவிட் வார்னர் தனது 100ஆவது டெஸ்டில் இரட்டை சதம் அடித்து முத்திரை பதித்தார். அவர் 200 ரன்னில் காயத்தால் வெளியேறினார். ஸ்டீவ் சுமித் 85 ரன் எடுத்தார். டிரெவிஸ் ஹெட் 48 ரன்னும், அலெக்ஸ் கேரி 9 ரன்னும் எடுத்து ஆட்டம் இழக்காமல் இருந்தனர்.
இன்று 3ஆவது நாள் ஆட்டம் நடந்தது. ஹெட் 7 பவுண்டரி , 1 சிக்சருடன் அரைசதம் அடித்தார். அவர் 51 ரன் எடுத்து இருந்தபோது ஆட்டம் இழந்தார். 6ஆவது வீரராக களம் இறங்கிய விக்கெட் கீப்பர் அலெக்ஸ் கேரி சிறப்பாக ஆடி சதம் அடித்தார். அவர் 133 பந்தில் 13 பவுண்டரியுடன் 100 ரன்னை தொட்டார். 14வது டெஸ்டில் விளையாடும் அலெக்ஸ் கேரிக்கு இது முதல் சதமாகும்.
இதற்கு முன்பு 93 ரன் எடுத்ததே அதிகபட்சமாகும். 8வது விக்கெட்டுக்கு அலெக்ஸ் கேரியும், கேமரூனும் 100 ரன் சேர்த்தனர். ஆஸ்திரேலியா தொடர்ந்து சிறப்பாக விளையாடி ரன்களை குவித்தது. ஆஸ்திரேலியா 8 விக்கெட் இழப்புக்கு 575 ரன் குவித்து டிக்ளேர் செய்தது. இது தென்ஆப்பிரிக்காவின் ஸ்கோரை விட 386 ரன் கூடுதலாகும்.தென் ஆப்பிரிக்க தரப்பில் ஆண்ட்ரிச் நோர்ட்ஜே 3 விக்கெட்டுகளையும், ரபாடா 2 விக்கெட்டுகளையும் கைப்பற்றினார்.
இதையடுத்து இரண்டாவது இன்னிங்ஸைத் தொடங்கிய தென் ஆப்பிரிக்க அணிக்கு அதிர்ச்சியளிக்கும் வகையில் கேப்டன் டீன் எல்கர் ரன்கள் ஏதுமின்றி ஆட்டமிழந்து ஏமாற்றமளித்தார். அதன்பின் ஜோடி சேர்ந்த சரெல் எர்வி - டி பிரையன் ஆகியோர் நிதான ஆட்டத்தை வெளிப்படுத்தினர்.
அதன்பின் 7 ஓவர்களுக்கு தென் ஆப்பிரிக்க அணி 15 ரன்களை எடுத்திருந்த நிலையில், மழை குறுக்கிட்டதன் காரணமாக இப்போட்டி பாதிக்கப்பட்டது. அதன்பின் தொடர்ந்து மழை நீடித்த காரணத்தால் மூன்றாம் நாள் ஆட்டம் அத்துடன் நிறைவு பெற்றதாக அறிவிக்கப்பட்டது.
இதில் சரெல் எர்வி 7 ரன்களுடனும், டி பிரையன் 6 ரன்களுடனும் களத்தில் உள்ளனர். ஆஸ்திரேலிய அணி தரப்பில் பாட் கம்மின்ஸ் ஒரு விக்கெட்டை வீழ்த்தினார். இதையடுத்து 371 ரன்கள் பின் தங்கிய நிலையில் நாளை தென் ஆப்பிரிக்க அணி நான்காம் நாள் ஆட்டத்தை தொடரவுள்ளது.