ENG vs AUS, 1st ODI: 100ஆவது ஒருநாள் போட்டியில் விளையாடும் ஆடம் ஸாம்பா!
இங்கிலாந்தில் சுற்றுப்பயணம் செய்துவரும் ஆஸ்திரேலிய அணியானது 3 போட்டிகள் கொண்ட டி20 தொடரிலும், 5 போட்டிகள் கொண்ட ஒருநாள் தொடரிலும் விளையாடி வருகிறது. இதில் நடைபெற்று முடிந்த டி20 தொடரின் முதலிரண்டு போட்டிகளின் முடிவில் இரு அணிகளும் தலா ஒருவேற்றியைப் பதிவுசெய்த 1-1 என்ற கணக்கில் தொடரை சமன்செய்திருந்த நிலையில், தொடரின் வெற்றியாளரைத் தீர்மானிக்கும் மூன்றாவது போட்டி மழையால் கைவிடப்பட்டது.
இதன் காரணமாக இவ்விரு அணிகளுக்கு இடையேயான டி20 தொடரானது சமனில் முடிந்ததாக அறிவிக்கப்பட்டு, கோப்பை பகிர்ந்தளிக்கப்பட்டது. இதனையடுத்து இங்கிலாந்து - ஆஸ்திரேலியா அணிகளுக்கு இடையேயான ஐந்து போட்டிகள் கொண்ட ஒருநாள் தொடரானது நாளை முதல் தொடங்கவுள்ளது. அதன்படி இவ்விரு அணிகளுக்கும் இடையேயான முதலாவது ஒருநாள் போட்டி நாட்டிங்ஹாமில் உள்ள டிரென்ட் பிரிட்ஜ் கிரிக்கெட் மைதானத்தில் நாளை நடைபெறவுள்ளது.
இப்போட்டிக்காக இரு அணி வீரர்களும் தீவிரமாக தயாராகி வருகின்றனர். இந்நிலையில், இங்கிலாந்துக்கு எதிரான முதல் ஒருநாள் போட்டி ஆஸ்திரேலிய அணியின் நட்சத்திர சுழற்பந்துவீச்சாளரான ஆடம் ஸாம்பா விளையாடவுள்ள 100ஆவது ஒருநாள் போட்டியாகும். இங்கிலாந்து ஒருநாள் தொடருக்கான ஆஸ்திரேலிய அணியில் இடம்பெற்றுள்ள வீரர்களில் மிட்செல் ஸ்டார்க்கை தவிர்த்து ஆடம் ஸாம்பா மட்டுமே ஆஸ்திரேலியாவுக்காக 100ஆவது ஒருநாள் போட்டியில் விளையாடவுள்ளார்.
ஆஸ்திரேலிய அணிக்காக கடந்த 2016ஆம் ஆண்டு அறிமுகமான ஆடம் ஸாம்பா இதுவரை 99 ஒருநாள் போட்டிகளில் விளையாடி 169 விக்கெட்டுகளை கைப்பற்றி அசத்தியுள்ளார். அதேபோல் சர்வதேச டி20 கிரிக்கெட்டை பொறுத்தவரையில் 92 போட்டிகளில் 111 விக்கெட்டுகளையும், ஐபிஎல் தொடரில் 20 போட்டிகளில் மட்டுமே விளையாடி 29 விக்கெட்டுகளையும் வீழ்த்தியுள்ளார். இருப்பினும் இவர் இதுவரை டெஸ்ட் போட்டிகளில் விளையாடவில்லை என்பது குறிப்பிடத்தக்கது.
இந்நிலையில் தனது 100ஆவது ஒருநாள் போட்டிக்கு முன் பேசிய ஆடம் ஸாம்பா, “உண்மையில், நான் எனது வாழ்க்கையில் ஆஷஸ் தொடரில் விளையாடப் போவதில்லை. அதனால் நான் பெரிதும் வருத்தப்பட போவதில்லை. இந்த சீசனில் நாங்கள் நிறைய டெஸ்ட் கிரிக்கெட்டில் விளையாடவுள்ளோம். ஆனால், அதில் இங்கிலாந்தில் விளையாடுவது அல்லது இங்கிலாந்துக்கு எதிராக ஆஸ்திரேலியாவில் விளையாடுவது போன்ற ஆட்டங்களில் எனக்கு வாய்பு கிடைக்கும் என்று நான் நினைக்கவில்ல.
Also Read: Funding To Save Test Cricket
ஆஸ்திரேலிய அணிக்காக 100ஆவது ஒருநாள் போட்டியில் விளையாடவுள்ளது எனக்கு மிகுந்த மகிழ்ச்சியை கொடுக்கிறது. என்னுடன் எனது பெற்றோர், மனைவி, மகன் ஆகியோர் தற்போது இங்கிலாந்தில் உள்ளனர். அவர்கள் முன்னிலையில் 100ஆவது ஒருநாள் போட்டியில் விளையாடவுள்ளது மிகவும் சிறப்பானதாக இருக்கும் என்று நினைக்கிறேன். மேலும் இந்த குழுவுடன் இணைந்து விளையாடுவதை நான் மிகவும் ரசித்து வருகிறேன்” என்று தெரிவித்துள்ளார்.