14ஆவது சீசன் பிக் பேஷ் லீக் தொடரானது விறுவிறுப்பான கட்டத்தை எட்டியுள்ளது. இதில் இன்று நடைபெற்ற 20ஆவது லீக் ஆட்டத்தில் மெல்போர்ன் ரெனிகேட்ஸ் மற்றும் அடிலெய்ட் ஸ்டிரைக்கர்ஸ் அணிகள் பலப்பரீட்சை நடத்தின. மெல்போர்னில் நடைபெற்ற இப்போட்டியில் டாஸ் வென்ற அடிலெய்ட் ஸ்டிரைக்கர்ஸ் அணி முதலில் பந்துவீசுவதாக அறிவித்து களமிறங்கியது.
இதையடுத்து முதலில் பேட்டிங் செய்ய களமிறங்கிய மெல்போர்ன் ரெனிகேட்ஸ் அணிக்கு ஜோஷ் பிரௌன் மற்றும் ஜேக் ஃபிரேசர் மெக்குர் இணை தொடக்கம் கொடுத்தனர். இதில் பெரிதும் எதிர்பார்க்கப்பட்ட ஃபிரேசர் மெக்குர்க் ஒரு ரன்னில் விக்கெட்டை இழக்க, அடுத்து களமிறங்கிய டிம் செய்ஃபெர்டும் 4 ரன்களுடன் நடையைக் கட்டினார். பின்னர் ஜோஷ் பிரௌனுடன் இணைந்த ஜேக்கப் பெத்தெல் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் அதிரடியாக விளையாடிய ஜோஷ் பிரௌன் தனது அரைசதத்தைப் பதிவுசெய்து அசத்தினார்.
அதேசமயம் ஜேக்கப் பெத்தெல் 21 ரன்களில் ஆட்டமிழக்க, அவரைத் தொடர்ந்து அரைசதம் கடந்து விளையாடி வந்த ஜோஷ் பிரௌனும் 5 பவுண்டரி, 6 சிக்ஸர்கள் என 66 ரன்களைச் சேர்த்த நிலையில் விக்கெட்டை இழந்தார். அதன்பின் களமிறங்கிய வீரர்கள் கேப்டன் சதர்லேண்ட் 18 ரன்களைச் சேர்த்ததை தவிர்த்து மற்ற வீரர்கள் அனைவரும் அடுத்தடுத்து சொற்ப ரன்களில் விக்கெட்டுகளை இழந்தனர். இதனால் மெல்போர்ன் ரெனிகேட்ஸ் அணி 20 ஓவர்கள் முடிவில் 9 விக்கெட்டுகளை இழந்து 142 ரன்களை மட்டுமே எடுத்தது. ஸ்டிரைக்கர்ஸ் அணி தரப்பில் ஹென்றி தொர்ன்டன் 3 விக்கெட்டுகளை கைப்பற்றினார்.
அதன்பின் இலக்கை நோக்கி களமிறங்கிய அடிலெய்ட் ஸ்டிரைக்கர்ஸ் அணிக்கு கிறிஸ் லின் மற்றும் டி ஆர்சி ஷார்ட் இணை தொடக்கம் கொடுத்தனர். இதில் இருவரும் அதிரடியாக விளையாடி அணியின் ஸ்கோரை மளமளவென உயர்த்தினர். இப்போட்டியில் அபார ஆட்டத்தை வெளிப்படுத்திய கிறிஸ் லின் அடுத்தடுத்து பவுண்டரிகளையும், சிக்ஸர்களையும் பறக்கவிட்டு தனது அரைசதத்தைப் பதிவுசெய்து அசத்தினார். இதன்மூலம் இருவரும் இணைந்து முதல் விக்கெட்டிற்கு 104 ரன்கள் பார்ட்னர்ஷிப் அமைத்து அசத்தினர். பின் 27 ரன்கள் எடுத்த கையோடு டி ஆர்சி ஷார்ட் விக்கெட்டை இழந்தார்.
Also Read: Funding To Save Test Cricket
பின்னர் அதிரடியாக விளையாடி வந்த கிறிஸ் லின் 10 பவுண்டரி, 4 சிக்ஸர்கள் என 88 ரன்களைச் சேர்த்து ஆட்டமிழந்தார். பின்னர் களமிறங்கிய ஜேம்ஸ் பாஸ்லி, ஜேக் வெதர்லெட், ஒல்லி போப் உள்ளிட்டோரும் அடுத்தடுத்து விக்கெட்டுகளை இழந்து ஏமாற்றமளித்தனர். இருப்பினும் மெல்போர்ன் ரெனிகேட்ஸ் அணி 17.1 ஓவர்களில் இலக்கை எட்டியதுடன் 5 விக்கெட்டுகள் வித்தியாசத்தியாசத்தில் அடிலெய்ட் ஸ்டிரைக்கர்ஸ் அணியை வீழ்த்தி வெற்றிபெற்றது. இப்போட்டியில் அதிரடியாக விளையாடி அணியின் வெற்றியில் பங்களித்த கிறிஸ் லின் ஆட்டநாயகன் விருதை வென்றார்.