பிபிஎல் 2024-25: சதர்லேண்ட், ரோஜர்ஸ் அதிரடியில் மெல்போர்ன் ரெனிகேட்ஸ் த்ரில் வெற்றி!
14ஆவது சீசன் பிக் பேஷ் லீக் தொடரானது விறுவிறுப்பான கட்டத்தை எட்டியுள்ள நிலையில், இன்று நடைபெற்ற 26ஆவது லீக் ஆட்டத்தில் பெர்த் ஸ்கார்ச்சர்ஸ் மற்றும் மெல்போர்ன் ரெனிகேட்ஸ் அணிகள் பலப்பரீட்சை நடத்தின. பெர்த் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற மெல்போர்ன் ரெனிகேட்ஸ் அணி முதலில் பந்துவீசுவதாக அறிவித்தது.
அதன்படி களமிறங்கிய பெர்த் ஸ்கார்ச்சர்ஸ் அணிக்கு ஆரோன் ஹார்டி மற்றும் ஃபின் ஆலன் இணை தொடக்கம் கொடுத்தனர். இதில் இருவரும் அதிரடியாக தொடங்கிய நிலையில், ஃபின் ஆலன் 19 ரன்களில் விக்கெட்டை இழந்து ஏமாற்றமளித்தார். அதன்பின் களமிறங்கிய மிட்செல் மார்ஷ் முதல் பந்திலேயே விக்கெட்டை இழந்து ஏமாற்றமளித்தார். பின்னார் களமிறங்கிய கூப்பர் கன்னொலி ரன்கள் ஏதுமின்றியும் மற்றும் கேப்டன் ஆஷடன் டர்னர் 8 ரன்களிலும், நிக் ஹாப்சன் 12 ரன்களிலும் என அடுத்தடுத்து விக்கெட்டுகளை இழந்து ஏமாற்றமளித்தனர்.
இதையடுத்து மற்றொரு தொடக்க வீரரான ஆரோன் ஹார்டி 34 ரன்களில் விக்கெட்டை இழந்தார். அதன்பின் வந்த ஆஷ்டன் அதிரடியாக விளையாடி அணியின் கோரை உயர்த்தியதுடன், இறுதிவரை ஆட்டமிழக்காமல் ஒரு பவுண்டரி, 4 சிக்ஸர்கள் என 51 ரன்களைச் சேர்த்து அணிக்கு தேவையான ஃபினிஷிங்கைக் கொடுத்தார். இதன்மூலம் பெர்த் ஸ்கார்ச்சர்ஸ் அணி 20 ஓவர்கள் முடிவில் 8 விக்கெட்டுகளை இழந்து 147 ரன்களைச் சேர்த்தது. மெல்போர்ன் ரெனிகேட்ஸ் அணி தரப்பில் ஆடம் ஸாம்பா 3 விக்கெட்டுகளையும், டாம் ரோஜர்ஸ், வில் சதர்லெட் ஆகியோர் தலா 2 விக்கெட்டுகளை கைப்பற்றினர்.
அதன்பின் இலக்கை நோக்கி களமிறங்கிய மெல்போர் ரெனிகேட்ஸ் அணியில் டிம் செய்ஃபெர்ட், ஜேக் ஃபிரேசர் மெக்குர்க் ஆகியோர் அடுத்தடுத்து ரன்கள் ஏதுமின்றி விக்கெட்டை இழக்க, அடுத்து களமிறங்கிய ஜேக்கப் பெத்தெல், லௌரி எவான்ஸ் ஆகியோரும் சொற்ப ரன்களுக்கு நடையைக் கட்டினர். அவர்களைத் தொடர்ந்து அணியின் மற்றொரு தொடகக் விரரான மார்கஸ் ஹாரிஸும் 21 ரன்களில் ஆட்டமிழந்தார். இதனால் அந்த அணி 44 ரன்களில் 5 விக்கெட்டுகளை இழந்து தடுமாறியது. பின்னர் இணைந்த கேப்டன் வில் சதர்லெட் - தாமஸ் ரோஜர்ஸ் இணை அதிரடியாக விளையாடி அணியின் ஸ்கோரை உயர்த்தினர்.
Also Read: Funding To Save Test Cricket
இதில் சிறப்பான ஆட்டத்தை வெளிப்படுத்திய கேப்டன் வில் சதர்லெட் அரைசதம் கடந்ததுடன், 5 பவுண்டரி, 3 சிக்சர்கள் என 70 ரன்களைச் சேர்த்து தனது விக்கெட்டை இழந்தார். அதேசமயம் மறுமுனையில் தாமஸ் ரோஜர்ஸ் 4 பவுண்டரி, 3 சிக்ஸர்கள் என 49 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் மெல்போர்ன் ரெனிகேட்ஸ் அணி 19.4 ஓவர்களில் இலக்கை எட்டியதுடன் 4 விக்கெட் வித்தியாசத்தில் பெர்த் ஸ்கார்ச்சர்ஸ் அணியை வீழ்த்தி வெற்றிபெற்றது.