பிபிஎல் 2021: மார்ஷ், முன்ரோ அதிரடி; பெர்த் ஸ்காச்சர்ஸ் வெற்றி!

பிக் பேஷ் லீக் தொடரில் இன்று நடைபெற்ற 21ஆவது லீக் ஆட்டத்தில் பெர்த் ஸ்காச்சர்ஸ் - மெல்போர்ன் ரெனிகேட்ஸ் அணிகள் பலப்பரீட்சை நடத்தின. 

இப்போட்டியில் டாஸ் வென்று முதலில் பேட்டிங் செய்த மெல்போர்ன் ரெனிகேட்ஸ் அணி 20 ஓவர்கள் முடிவில் 8 விக்கெட்டுகளை இழந்து 151 ரன்களைச் சேர்த்தது. 

அந்த அணியில் அதிகபட்சமாக மெக்கன்சி ஹார்வி 45 ரன்களைச் சேர்த்தார். பெர்த் அணி தரப்பில் ஆஷ்டன் ஆகார், டைமல் மில்ஸ், பெஹண்ட்ராஃப் ஆகியோர் தலா 2 விக்கெட்டுகளைக் கைப்பற்றினர். 

இதையடுத்து இலக்கை துரத்திய பெர்த் அணியில் தொடக்க வீரர்கள் கேமரூன் பான்கிராஃப்ட், ஜோஷ் இங்லிஸ் தலா 23 ரன்களில் ஆட்டமிழந்தனர். 

அடுத்து ஜோடி சேர்ந்த மிட்செல் மார்ஷ் - காலின் முன்ரோ இணை அதிரடியாக விளையாடி அணியை வெற்றிக்கு அழைத்துச் சென்றது. இதில் காலின் முன்ரோ அரைசதம் அடித்தார். 

இதன்மூலம் 16.5 ஓவர்களிலேயே பெர்த் அணி இலக்கை எட்டி, 8 விக்கெட் வித்தியாசத்தில் மெல்போர்ன் ரெனிகேட்ஸ் அணியை வீழ்த்தியது.