பிபிஎல் 2022: டேனியல் சாம்ஸ் அதிரடியில் தண்டர் அபார வெற்றி!

பிக் பேஷ் லீக் டி20 தொடரில் இன்று நடைபெற்ற 40ஆவது போட்டியில் சிட்னி தண்டர் - மெல்போர்ன் ரெனிகேட்ஸ் அணிகள் பலப்பரீட்சை நடத்தின. இதில் டாஸ் வென்ற ரெனிகேட்ஸ் அணி முதலில் பந்துவீச தீர்மானித்தது. 

அதன்படி களமிறங்கிய தண்டர் அணியில் அலெக்ஸ் ஹேல்ஸ் - டேனியல் சாம்ஸ் இணை அபாரமான ஆட்டத்தை வெளிப்படுத்தி இமாலய இலக்கை நிர்ணயிக்க உதவியது. 

இதில் ஹேல்ஸ் 63 ரன்களில் ஆட்டமிழக்க, சாம்ஸ் 98 ரன்கள் சேர்த்து இறுதிவரை ஆட்டமிழக்காமல் இருந்தார். இதன்மூலம் 20 ஓவர்கள் முடிவில் தண்டர் அணி 7 விக்கெட் இழப்பிற்கு 207 ரன்களைக் குவித்தது. 

இதையடுத்து இலக்கை துரத்திய ரெனிகேட்ஸ் அணியில் ஆரோன் ஃபிஞ்ச், ஷான் மார்ஷ், சாம் ஹார்பர் என அனைவரும் சொற்ப ரன்களில் ஆட்டமிழந்து வெளியேறினர். 

அடுத்து வந்த வீரர்களும் எதிரணி பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்து தடுமாறினர். இதனால் 14.2 ஓவர்களிலேயே ரெனிகேட்ஸ் அணி அனைத்து விக்கெட்டுகளையும் இழந்து 80 ரன்களை மட்டுமே சேர்த்தது. 

இதன்மூலம் சிட்னி தண்டர் அணி 129 ரன்கள் வித்தியாசத்தில் மெல்போர்ன் ரெனிகேட்ஸ் அணியை வீழ்த்தி இமாலய வெற்றியைப் பதிவு செய்தது. மேலும் இப்போட்டியின் ஆட்டநாயகனாக டேனியல் சாம்ஸ் தேர்வு செய்யப்பட்டார்.