சர்வதேச கிரிக்கெட்டில் தனக்கென்று தனி ரசிகர் பட்டாளத்தை உருவாக்கியவர் டேவிட் வார்னர். ஆஸ்திரேலியா வீரரான இவருக்கு, ஆஸ்திரேலியாவை விட இந்தியாவில் ரசிகர்கள் அதிகம். கடந்த 2018ஆம் ஆண்டு, தென் ஆப்பிரிக்காவுக்கு எதிரான டெஸ்ட் போட்டியில் பந்தை சேதப்படுத்திய குற்றத்திற்காக 12 மாதம் கிரிக்கெட் விளையாட தடையும் பெற்றார்.
தற்போது, 37 வயதான டேவிட் வார்னர், 111 டெஸ்ட் போட்டிகள் விளையாடி 26 சதங்களுடன் 8,695 ரன்களும், 161 ஒருநாள் போட்டியில் விளையாடி 22 சதங்களுடன் 6,932 ரன்களும், 99 டி20 போட்டிகள் விளையாடி ஒரு சதத்துடன் 2,894 ரன்கள் குவித்துள்ளார். தற்போது நடைபெற்று வரும் பாகிஸ்தான் எதிரான டெஸ்ட் போட்டி தொடருடன் ஓய்வு பெறுவதாக ஏற்கனவே அறிவித்திருந்தார் டேவிட் வார்னர்.
இந்நிலையில் பாகிஸ்தான் அணிக்கு எதிரான கடைசி டெஸ்ட் போட்டி, ஜனவரி 3ஆம் தேதி சிட்னியில் தொடங்க உள்ள நிலையில், செய்தியாளர்களை சந்தித்த டேவிட் வார்னர், ஒருநாள் போட்டியில் இருந்தும் ஓய்வு பெறுவதாக அறிவித்தார். இவரது அறிவிப்பு ரசிகர்களை அதிர்ச்சிக்குள்ளாக்கியது.
இதைத்தொடர்ந்து தான் சந்தித்த பந்துவீச்சாளர் பற்றி பேசிய டேவிட் வார்னர், “நான் எதிர்கொண்டதில் டேல் ஸ்டெய்னின் பந்துவீச்சு மிகவும் சவாலானது. அதில் எனக்கு எந்த சந்தேகமும் இல்லை. பெர்த் மைதானத்தில், 2016-17ஆம் ஆண்டு தென் ஆப்பிரிக்காவுக்கு எதிரான போட்டியில், கிட்டத்தட்ட 45 நிமிடங்களுக்கு மேல் ஷான் மார்ஷும் நானும் டேல் ஸ்டெயின் பந்துவீச்சை எதிர்கொண்டோம். மிகவும் சவாலாக இருந்தது.
அவரது பந்துவீச்சில் தன்னால் புல்ஷாட் அடிக்க முடியவில்லை. தொடர்ந்து அவரது பந்துவீச்சை எப்படி எதிர்கொள்ளப் போகிறேன் என்று எனக்குத் தெரியவில்லை என ஷான் மார்ஷ் தன்னிடம் தெரிவித்தார். மேலும் டேல் ஸ்டெய்னின் பந்து என் முதுகில் தாக்கியது. அந்தப் போட்டியில் தான் அவரது தோள்பட்டையிலும் காயம் ஏற்பட்டதாக நினைக்கிறேன்.
அவரது பந்துவீச்சின் மூலம் எதிரணிக்கு கடுமையான சவால்களை அளிப்பார். டேல் ஸ்டெய்ன் இடதுகை பேட்ஸ்மேன்களுக்கு ஸ்விங் செய்யும் விதம், மிட்செல் ஸ்டார்க் வலதுகை பேட்ஸ்மேன்களுக்கு ஸ்விங் செய்வதற்கு இணையானது. அவரிடம் களத்தில் புன்னகையை எதிர்பார்க்க முடியாது. அவரது பந்துவீச்சை போலவே, அவரிடம் இருந்தும் அனல்கள் தெறிக்கும். மேலும் அவரது பந்துவீச்சை பேட்ஸ்மேன்கள் தொட எளிதில் வாய்ப்பளிக்க மாட்டார்” என்று கூறினார்.