தோனியை சந்திக்க வேண்டும் என்பது என் கனவு - துருவ் ஜுரெல்!

பென் ஸ்டோக்ஸ் தலைமையிலான இங்கிலாந்து அணி இந்தியாவில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் விளையாடி வருகிறது. இத்தொடரின் முதல் போட்டியில் இங்கிலாந்து அணி வெற்றிபெற்ற நிலையில், இரண்டாவது போட்டியில் இந்திய அணி வெற்றிபெற்று அசத்தியது. இந்நிலையில் இரு அணிகளுக்கும் இடையேயான மூன்றாவது டெஸ்ட் போட்டி ராஜ்கோட்டில் நடைபெற்று முடிந்தது.  இப்போட்டியில் இந்திய அணி 434 ரன்கள் வித்தியாசத்தில் இங்கிலாந்தை வீழ்த்தியதுடன், 2-1 என்ற கணக்கில் டெஸ்ட் தொடரிலும் முன்னிலைப் பெற்று அசத்தியுள்ளது.

இதன் காரணமாக இந்திய அணி இத்தொடரை வெல்லும் வாய்ப்பு பிரகாசமாகியுள்ளது.  இந்நிலையில் இரு அணிகளுக்கும் இடையேயான நான்காவது டெஸ்ட் போட்டி பிப்ரவரி 23ஆம் தேதி ராஞ்சியில் நடைபெறவுள்ளது. இப்போட்டியிலும் இந்திய அணி வெற்றிபெறும் பட்சத்தில் இந்திய அணி டெஸ்ட் தொடரை கைப்பற்றும் என்பதால் இப்போட்டியின் மீதான எதிர்பார்ப்புகளும் அதிகரித்துள்ளன. மேலும் இப்போட்டிக்கான இந்திய அணியிலிருந்து பும்ரா, கேஎல் ராகுல் ஆகியோர் விலகியுள்ளது அணிக்கு பின்னடைவை ஏற்படுத்தினாலும், தங்களது அறிமுக போட்டியில் அசத்திய சர்ஃப்ராஸ், துருவ் ஜுரெல் ஆகியோர் மீதான எதிர்பார்ப்பு அதிகரித்துள்ளது. 

ஏனெனில் தங்களது அறிமுக போட்டியில் விளையாடிய சர்ஃப்ராஸ் கான் இரண்டு இன்னிங்ஸிலும் அரைசதம் அடித்தும், துருவ் ஜுரெல் 46 ரன்களைச் சேர்த்ததுடன், பென் டக்கெட்டை ரன் அவுட் செய்தும் கவனத்தை ஈர்த்துள்ளனர். இந்நிலையில் பிசிசிஐ தனது எக்ஸ் தளத்தில் வெளியிட்டிருந்த காணொளி ஒன்றில் அறிமுக வீரர் துருவ் ஜூரல் பேசிய காணொளியை வெளியிட்டிருந்தது. அதில் துருவ் இந்திய அணியின் முன்னாள் கேப்டன் எம்எஸ் தோனியை மீண்டும் சந்திக்க ஆவலுடன் இருப்பதாக தெரிவித்துள்ளார். 

அந்து காணொளியில் பேசிய துருவ் ஜுரெல், “ஒரு சர்வதேச போட்டிக்குப் பிறகு எம்எஸ் தோனியை சந்திக்க வேண்டும் என்பது என் கனவு. நான் அவருடன் பேசும்போதெல்லாம் அவரிடம் இருந்து புதிதாக ஒன்றைக் கற்றுக்கொள்கிறேன். ராஞ்சியில் நடக்கும் நான்காவது டெஸ்ட் போட்டியில் அவரை சந்திக்கும் வாய்ப்பு கிடைக்கும் என நம்புகிறேன்” என தெரிவித்திருந்தார். இந்நிலையில் துருவ் ஜுரெலின் இந்த காணொளி இணையத்தில் வைரலாகி வருகிறது.