இங்கிலாந்து டெஸ்ட் கிரிக்கெட் அணிக்கு ஜோ ரூட் கேப்டன் பொறுப்பில் இருந்து நீக்கப்பட்டு அவருக்கு பதிலாக பென் ஸ்டோக்ஸ் கேப்டனாக கொண்டுவரப்பட்டு, புதிய தலைமை பயிற்சியாளராக டெஸ்ட் அணிக்கு பிரண்டன் மெக்கலம் கொண்டுவரப்பட்ட பிறகு, டெஸ்ட் கிரிக்கெட்டை ஒருநாள் கிரிக்கெட் போல இங்கிலாந்து விளையாடி வருகிறது.
இங்கிலாந்தின் இந்த அதிரடி டெஸ்ட் கிரிக்கெட் அணுகுமுறைக்கு, இங்கிலாந்து அணியின் தலைமை பயிற்சியாளர் மெக்கலமை பட்டப் பெயரில் அழைக்கும் பாஸ் என்பதோடு சேர்த்து பாஸ்பால் என்று அழைக்கப்படுகிறது. தற்பொழுது இங்கிலாந்தின் அணுகுமுறை உலக டெஸ்ட் கிரிக்கெட்டிலும் ஒரு குறிப்பிட்ட தாக்கத்தை ஏற்படுத்தி வருவதை மறுக்க முடியாது. பாகிஸ்தான் அணி கூட தற்பொழுது இலங்கைக்கு எதிராக வழக்கத்தை விட வேகமாக ரன் குவித்து வருகிறது.
இந்திய அணியை எடுத்துக் கொண்டால் வெஸ்ட் இண்டீஸ் அணிக்கு எதிரான இரண்டாவது ஆட்டத்தில் முதல் இன்னிங்சை மிகவும் பொறுப்பான முறையில் டெஸ்ட் கிரிக்கெட்டுக்கு உரிய நிதானத்தில் விளையாடி, மழையின் குறுக்கீடு அதிகமாக இருந்த காரணத்தினால், இரண்டாவது இன்னிங்ஸை டி20 போல் விளையாடி டிக்ளர் செய்திருந்தது. இதில் 12.2 ஓவர்களில் 100 ரண்களைக் கடந்து உலக சாதனையும் படைத்திருந்தது.
இந்தப் போட்டியில் இரண்டாவது இன்னிங்ஸில் கேப்டன் ரோஹித் சர்மா 35 பந்தில் அரை சதத்தையும், விக்கெட் கீப்பிங் பேட்ஸ்மேன் இசான் கிஷான் 33 பந்தில் அரை சதத்தையும் அதிரடியாக விளாசி இருந்தார்கள். ரிஷப் பந்திற்கு அடுத்து அதிவேகமாக டெஸ்ட் கிரிக்கெட்டில் அரை சதம் அடித்த இந்திய விக்கெட் கீப்பர் என்ற சாதனையை இஷான் கிஷான் படைத்தார்.
அவரிடம் இரண்டாவது டெஸ்ட் போட்டிக்கு பிறகு இந்திய அணியால் இங்கிலாந்தின் பாஸ்பால் அணுகு முறையில் டெஸ்ட் கிரிக்கெட்டை விளையாட முடியுமா என்று கேட்கப்பட்டது. அதற்கு இஷான் கிஷான் மிகவும் தெளிவான முறையில் அசத்தலாக பதில் அளித்து இருக்கிறார்.
இதுகுறித்து பேசிய அவர், “எல்லா நாளும் அவ்வளவு வேகமாக விளையாட முடியாது. சமயங்களில் அது சூழலை பொருத்தும் அமையும். இங்கிலாந்து அணி விரைந்து ரன் குவிக்கிறது. ஆனால், அவர்கள் எந்த மாதிரியான ஆடுகளத்தில் அதை செய்கிறார்கள் என்பதை நாம் பார்க்க வேண்டும். நாங்கள் ஆடும் ஆடுகளங்களில் எளிதில் ரன் குவிக்க முடியாது. ஏனெனில், ஆடுகளத்தில் பந்து திரும்பும் வகையிலும், எழும்பியும் வரும்.
அதுவே ஃப்ளாட்டாக உள்ள பிட்ச்சில் விரைந்து ரன் சேர்க்கலாம். அட்டாக் செய்து ஆட வேண்டிய தேவை ஒவ்வொரு போட்டியிலும் எங்களுக்கு இல்லை என கருதுகிறேன். ஆட்டத்துக்கு தேவை என்றால் மட்டும் அதைச் செய்வோம். டெஸ்ட் கிரிக்கெட்டில் எல்லா நேரமும் அட்டாக்கிங் ஷாட் ஆட முடியாது என நினைக்கிறேன்” என தெரிவித்துள்ளார்.