ENG vs IND : கும்ப்ளே, ஹர்பஜன் சாதனைகளைத் தகர்த்தெரிந்த ஆண்டர்சன்!

இங்கிலாந்து - இந்திய அணிகளுக்கு இடையேயான முதல் டெஸ்ட் போட்டியின் மூன்றாம் நாள் ஆட்டம் இன்று நாட்டிங்ஹாமிலுள்ள ட்ரெண்ட்பிரிட்ஜ் மைதானத்தில் நடைபெற்று வருகிறது. 

இதில் முதல் இன்னிங்ஸை விளையாடி வரும் இந்திய அணி 8 விக்கெட்டுகளை இழந்து 238 ரன்களை எடுத்துள்ளது. இந்திய அணி தரப்பில் கேஎல் ராகுல் 84 ரன்களை எடுத்து ஆட்டமிழந்தார். 

இப்போட்டியில் இங்கிலாந்து அணியின் நட்சத்திர வேகப்பந்துவீச்சாளர் ஜேம்ஸ் ஆண்டர்சன் 4 விக்கெட்டுகளைக் கைப்பற்றினார். இதில் ராகுலின் விக்கெட்டைக் கைப்பற்றியதன் மூலம் சர்வதேச டேஸ்ட் கிரிக்கெட் வரலாற்றில் அதிக விக்கெட்டுகளை வீழ்த்தியவர் பட்டியலில் மூன்றாம் இடத்திற்கு முன்னேறி ஆண்டர்சன் சாதனைப் படைத்துள்ளது. 

முன்னதாக இந்திய அணியில் அனில் கும்ப்ளே 619 விக்கெட்டுகளைக் கைப்பற்றி மூன்றாம் இடத்தில் நீடித்து வந்தார். தற்போது அதனை ஆண்டர்சன் முறியடித்து 3ஆம் இடத்தைப் பிடித்துள்ளார். மேலும் அதிக விக்கெட்டுகளை வீழ்த்திய வேகப்பந்துவீச்சாளர் என்ற பெருமையையும் ஆண்டர்சன்னிற்கு உள்ளது. 

மேலும் சொந்த மண்ணில் ஒரு அணிக்கு எதிராக அதிக விக்கெட்டுகளை வீழ்த்தியவர்கள் பட்டியலில் 87 விக்கெட்டுகளைக் கைப்பற்றி ஆண்டர்சன் முதலிடத்தைப் பிடித்து சாதித்துள்ளார். முன்னதாக இந்திய வீரர் ஹர்பஜன் சிங் ஆஸ்திரேலிய அணிக்கெதிராக 86 விக்கெட்டுகளைக் கைப்பற்றியதே சாதனையாக இருந்தது. 

அதனைத் தற்போது ஆண்டர்சன் இந்தியாவுக்கு எதிராக 87 விக்கெட்டுகளைக் கைப்பற்றி முறியடித்துள்ளா என்பது குறிப்பிடத்தக்கது.