ENGW vs WIW, 3rd T20I: விண்டீஸை ஒயிட்வாஷ் செய்து இங்கிலாந்து அசத்தல்!
வெஸ்ட் இண்டீஸ் மகளிர் அணி தற்சமயம் இங்கிலாந்தில் சுற்றுப்பயணம் செய்து மூன்று போட்டிகள் கொண்ட டி20 தொடரில் விளையாடி வருகிறது. இதில் நடந்து முடிந்த இரண்டு போட்டிகளிலும் இங்கிலாந்து அணி வெற்றிபெற்று 2-0 என்ற கணக்கில் தொடரை வென்றுள்ளது.
இந்நிலையில் இங்கிலாந்து - வெஸ்ட் இண்டீஸ் மகளிர் அணிகளுக்கு இடையேயான மூன்றாவது மற்றும் கடைசி டி20 போட்டி செல்ம்ஸ்ஃபோர்டில் உள்ள கவுண்டி கிரிக்கெட் மைதானத்தில் இன்று நடைபெற்றது. இப்போட்டியில் டாஸ் வென்ற வெஸ்ட் இண்டீஸ் மகளிர் அணி முதலில் பந்துவீசுவதாக அறிவித்தது. அதன்படி களமிறங்கிய இங்கிலாந்து மகளிர் அணிக்கு எதிர்பார்த்த தொடக்கம் கிடைக்கவில்லை. அணியின் தொடக்க வீரர்கள் டேனியல் வையட் ரன்கள் ஏதுமின்றியும், சோபியா டங்க்லி 3 ரன்னிலும் என அடுத்தடுத்து விக்கெட்டுகளை இழந்து பெவிலியன் திரும்பினர்.
அதன்பின் ஜோடி சேர்ந்த நாட் ஸ்கைவர் பிரண்ட் - ஹீதர் நைட் இணை பொறுப்பான ஆட்டத்தை வெளிப்படுத்தி விக்கெட் இழப்பை தடுத்து நிறுத்தியதுடன் அணியின் ஸ்கோரையும் உயர்த்தினர். இதில் நாட் ஸ்கைவர் பிரண்ட் 37 ரன்களில் விக்கெட்டை இழந்த நிலையில், அடுத்து களமிறங்கிய ஏமி ஜோன்ஸ் 22 ரன்களுக்கும், அலிஸ் கேப்ஸி 4 ரன்களுக்கும் என விக்கெட்டுகளை இழந்து பெவிலியன் திரும்பினர். ஒருபக்கம் விக்கெட்டுகள் சரிந்த நிலையிலும் மறுமுனையில் சிறப்பான ஆட்டத்தை வெளிப்படுத்திய ஹீதர் நைட் அரைசதம் கடந்ததுடன் 66 ரன்களைச் சேர்த்தார்.
இதன்மூலம் இங்கிலாந்து மகளிர் அணி 20 ஓவர்கள் முடிவில் 5 விக்கெட்டுகளை இழந்து 144 ரன்களைச் சேர்த்தது. வெஸ்ட் இண்டீஸ் தரப்பில் கேப்டன் ஹீலி மேத்யூஸ் 3 விக்கெட்டுகளை வீழ்த்தினார். இதையடுத்து இலக்கை நோக்கி களமிறங்கிய வெஸ்ட் இண்டீஸ் அணியில் ஹீலி மேத்யூஸ் வழக்கம் போல் சிறப்பான ஆட்டத்தை வெளிப்படுத்தி ஸ்கோரை உயர்த்தும் முயற்சியில் இறங்கினார். அதேசமயம் மறுமுனையில் களமிறங்கிய கியானா ஜோசப், ஸைதா ஜேம்ஸ், ரியலியானா கிரிமண்ட், ஷபிகா கஜ்னபி உள்ளிட்டோர் சொற்ப ரன்களில் விக்கெட்டுகளை இழந்தனர்.
ஒருபக்கம் விக்கெட்டுகள் சரிந்த நிலையிலும், மறுமுனையில் சிறப்பான ஆட்டத்தை வெளிப்படுத்தி வந்த கேப்டன் ஹீலி மேத்யூஸ் அரைசதம் கடந்து அசத்தினார். அதன்பின் 11 பவுண்டரி, ஒரு சிக்ஸர் என 71 ரன்களில் மேத்யூஸ் ஆட்டமிழக்க, பின்னர் களமிறங்கிய வீராங்கனைகளும் சோபிக்க தவறினர். இதனால் வெஸ்ட் இண்டீஸ் மகளிர் அணி 20 ஓவர்கள் முடிவில் 8 விக்கெட்டுகளை இழந்து 128 ரன்களை மட்டுமே எடுத்தது. இங்கிலாந்து தரப்பில் லாரன் பெல், எமிலி ஆர்லெட், சார்லோட் டீன், லின்ஸி ஸ்மித் ஆகியோர் தலா 2 விக்கெட்டுகளை வீழ்த்தினர்.
Also Read: LIVE Cricket Score
இதன்மூலம் இங்கிலாந்து மகளிர் அணி 17 ரன்கள் வித்தியாசத்தில் வெஸ்ட் இண்டீஸ் மகளிர் அணியை வீழ்த்தி வெற்றிபெற்றதுடன், மூன்று போட்டிகள் கொண்ட டி20 தொடரையும் 3-0 என்ற கணக்கில் முழுமையாக கைப்பற்றி அசத்தியுள்ளது. அதேசமயம் இப்போட்டி மற்றும் தொடரை இங்கிலாந்து அணி வென்றிருந்தாலும் வெஸ்ட் இண்டீஸ் தரப்பில் அபாரமான ஆட்டத்தை வெளிப்படுத்தி பேட்டிங் மற்றும் பந்துவீச்சில் கலக்கிய ஹீலி மேத்யூஸ் இப்போட்டியின் ஆட்டநாயகி மற்றும் தொடர்நாயகி விருதுகளை வென்று அசத்தியுள்ளார் என்பது குறிப்பிடத்தக்கது.