ரோஹித் சர்மாவின் முடிவை விமர்சித்த புஜாரா!

ஆசியக் கோப்பை 2022இன் முதல் இரண்டு லீக் போட்டிகளிலும் பட்டைய கிளப்பிய இந்திய அணி, அடுத்து படுமோசமாக சொதப்பியது. இந்திய அணி லீக் போட்டிகளில் அபாரமாக செயல்பட்டு, அடுத்து சூப்பர் 4 சுற்றின் முதல் இரண்டு போட்டிகளில் பாகிஸ்தான், இலங்கைக்கு எதிராக தோற்றதற்கு முக்கிய காரணங்கள் இருக்கின்றன.

அணியில் மிகமுக்கிய ஆல் ரவுண்டராக இருந்த ரவீந்திர ஜடேஜா காயம் காரணமாக விலகினார். அடுத்து ஆவேஷ் கானுக்கு காயம் ஏற்பட்டதால் அவரும் சூப்பர் 4 ரவுண்டில் பங்கேற்கவில்லை. இதனால், பந்துவீச்சுல் துறையில் இந்திய அணியில் பலம் குறைவாகத்தான் இருந்தது. குறிப்பாக டெத் ஓவர்களில் அர்ஷ்தீப் சிங்கை மட்டுமே நம்பியிருக்கும் நிலை இருந்தது. புவனேஷ்வர் குமார் பவர் பிளேவில் மட்டுமே அபாரமாக பந்துவீசி வந்தார்.

மூன்றாவது வேகப்பந்து வீச்சாளராக ஹார்திக் பாண்டியாவைத்தான் ரோஹித் சர்மா நம்பினார். ஹார்திக் ஸ்விங் பௌலரும் கிடையாது, அடிக்கடி பவுன்சரை வீசுபவரும் கிடையாது. லெந்த் பால்களை மட்டுமே சிறப்பாக வீசுவார். இப்படி அர்ஷ்தீப் சிங்கை தவிர மற்ற இரண்டு பந்துவீச்சாளர்களும் மாபெரும் குறை இருந்ததுதான் சூப்பர் 4 சுற்றில் தோற்க முக்கிய காரணம்.

ஆவேஷ் கானுக்கு காயம் ஏற்பட்டதுமே ரிசர்வ் பட்டியலில் இருந்த தீபக் சஹாரை கொண்டு வந்திருக்க வேண்டும். ஆனால், ரோஹித் சர்மா அதனை செய்யாமல் குருட்டு நம்பிக்கையில் ஹார்திக் பாண்டியாவுக்கு முழுநேர  ப்ரொமோஷன் கொடுத்து சொதப்பியுள்ளார். தீபக் சஹார் டெத் ஓவர்களிலும் பந்துகளை ஸ்விங் செய்ய கூடியவர். வேகம் குறைந்த பந்துகளையும் வீசக் கூடியவர். இதனால், அர்ஷ்தீப் சிங்கிற்கு பக்கபலமாக இருந்திருப்பார்.

ஆனால் தற்போது, எல்லாம் முடிந்தப் பிறகு கடைசிப் போட்டியில் ஆஃப்கானிஸ்தானுக்கு எதிராக ஆவேஷ் கானுக்கு பதிலாக தீபக் சஹார் சேர்க்கப்பட்டுள்ளார். இப்போட்டியில் ஒருவேளை தீபக் சஹார் சிறப்பாக பந்துவீசிவிட்டால், அது ரோஹித் சர்மாவின் கேப்டன்ஸின் மதிப்பை குறைக்க வாய்ப்புள்ளது.

இந்நிலையில் இந்த தாமதமான முடிவை இந்திய வீரர் சட்டேஷ்வர் புஜாரா கடுமையாக விமர்சித்துள்ளார். ‘‘ஹார்திக் பாண்டியா சிறந்த பௌலர்தான். அதற்காக அவரிடம் தொடர்ந்து 4 ஓவர்களை பெற நினைப்பது சரியானது கிடையாது. ஆவேஷ் கானுக்கு காயம் ஏற்பட்டதும் உடனே மாற்று பௌலரை சேர்த்திருக்க வேண்டும். தற்போது காலம் தாழ்த்தி மாற்று பௌலரை சேர்த்துள்ளனர்’’ எனக் கூறினார்.