14 ஆண்டுகளுக்கு பிறகு லீக் சுற்றோடு நடையைக் கட்டிய இந்தியா!

தற்போது நடைபெற்று வரும் டி20 உலகக் கோப்பை இந்திய அணிக்கு இந்த அளவுக்கு மோசமானதாக இருக்கும் என எந்த இந்திய ரசிகரும் எதிர்பார்த்திருக்கமாட்டார்கள். அதீதமான நம்பிக்கை, நல்ல ஃபார்ம், ஐபிஎல் போட்டிகள் என நல்ல நிலைமையில்தான் உலகக் கோப்பையில் கோலிப் படை தடம்பதித்தது. 

ஆனால், சுவற்றில் அடித்த பந்துபோல், சென்ற வேகத்திலேயே சூப்பர்-12 சுற்றோடு வெளியேறி இந்திய அணி மூட்டை முடிச்சுகளுடன் தாயகம் புறப்படுகிறது. கடந்த 2007ஆம் ஆண்டு ஐசிசி 50 ஓவர்கள் உலகக் கோப்பையில் இதுபோன்று மோசமான தோல்வியைச்சந்தித்து, முதல் சுற்றிலேயே இந்திய அணி வெளியேறி, ரசிகர்களின் கடுமையான அதிருப்தியை வாங்கிக்கட்டிக் கொண்டது. 

அதன்பின் 14 ஆண்டுகளுக்குப்பின் இந்த முறை மிகமோசமான தோல்வியைச் சந்தித்து முதல் சுற்றிலேயே கோலிப்படை வெளியேறுகிறது. டி20 உலகக் கோப்பையில் ஆஃப்கானிஸ்தான், நமிபியா, ஸ்காட்லாந்து அணிகளை இந்திய அணி வென்றுவி்ட்டதே எவ்வாறு மோசமான தோல்வி என்று சொல்ல முடியும் என்று கேட்பது புரிகிறது.
இந்த 3 அணிகளையும் வென்றுவிட்டால் அரையிறுதிக்குள் செல்லலாம், என்றால், இந்திய அணியின் முதல் இரு தோல்வியை மோசமானது என்று கூறாமல் இருக்கலாம்.

ஆனால், இந்திய அணியின் உலகக் கோப்பை தலைவிதியை நிர்ணயித்ததே பாகிஸ்தான், நியூஸிலாந்து அணிகளுக்கு எதிரான போட்டிதானே. அந்த இரு போட்டிகளிலும் இந்திய அணியின் செயல்பாட்டை எவ்வாறு மோசமான தோல்வி என்று கூறாமல் இருக்க முடியும்.

பாகிஸ்தானுக்கு எதிராக 10 விக்கெட்டில் தோல்வி, நியூஸிலாந்துக்கு எதிராக கேப்டன் கோலி முதல் 11 வீரர்களும் நம்பிக்கையிழந்து களத்தில் நின்று தோற்று வெளியேறியதை யாரும் மறக்க முடியாது. இந்த இரு தோல்விகளுக்குப்பின்பும், மற்ற 3 கத்துக்குட்டி அணிகளை வென்றால் இந்திய அணிக்கு அரையிறுதி வாய்ப்பு இருக்கும் என்று ஆறுதல் வார்த்தை திணிக்கப்பட்டது.

அதிலும் இந்திய அணியின் அரையிறுதி வாய்ப்பு இந்திய அணியிடம் இல்லை ஆஃப்கானிஸ்தானிடம்தான் இருக்கிறது என்று கூறப்பட்டது. திறமையான வீரர்களைக் கொண்ட இந்திய அணியின், அரையிறுதி தலைவிதியை நிர்ணயிப்பது வேறு இரு அணிகளின் வெற்றி, தோல்விதான் என்று சொல்வது இந்திய வீரர்களின் திறமையை இதைவிட மோசமாக சித்தரிக்க முடியாது.

ஸ்காட்லாந்து, ஆஃப்கானிஸ்தான் அணியை துவைத்து எடுத்து ரன்ரேட்டை இந்திய அணி உயர்த்திக்கொண்டு தயாரானது. அனைவரின் எதிர்பார்ப்பும் ஆஃப்கானிஸ்தான், நியூஸிலாந்து ஆட்டத்தை நோக்கி இருந்தது. இந்திய அணியின் வெற்றிக்காக பிரார்த்தனை செய்த ரசிகர்கள், இன்று ஆப்கானிஸ்தான் வெற்றிக்கு பிரார்த்தனை செய்தார்கள்.

எதிர்பார்ப்புடன் போட்டியைப் பார்த்த ரசிகர்களுக்கு கடைசியில் ஏமாற்றம் மட்டுமே மிஞ்சியது. ஆப்கானிஸ்தான் அணியை 8 விக்கெட்டில் அபாரமாக வென்று நியூஸிலாந்து அணியை அரையிறுதிக்கு தகுதி பெற்றது.

குரூப்-1 பிரிவில் இங்கிலாந்து, ஆஸ்திரேலியா, குரூப்-2 பிரிவில் பாகிஸ்தான், நியூஸிலாந்து அணிகள் தகுதி பெற்றுள்ளன. அரையிறுதியில் இங்கிலாந்தும், நியூஸிலாந்து அணியும், ஆஸ்திரேலியா, பாகிஸ்தான் அணியும் மோத உள்ளன.

Also Read: T20 World Cup 2021

இந்திய அணிக்கு நாளை நமிபியாவுடன் கடைசி ஆட்டம் இருக்கிறது. இதில் இந்திய வென்றாலும், தோற்றாலும் அது எந்தவிதத்திலும் பாதிக்காது. இளம் வீரர்கள், ஐபிஎல் தொடரில் தொடர்ச்சியாக விளையாடி ஃபார்மில் இருந்தனர், அப்படி இருந்தும் இந்திய அணியின் தோல்விக்கு என்ன காரணம் என்ற கேள்விகள் தொடர்ச்சியாக எழுந்து வருகின்றன.