காயத்தால் ஆசிய கோப்பையை தவறவிடும் ஹர்ஷல் படேல்!

ரோஹித் சர்மா தலைமையில் வெற்றி நடை போட்டு வரும் இந்திய கிரிக்கெட் அணி, அடுத்ததாக இந்த மாத இறுதியில் தொடங்கும் ஆசிய கோப்பை கிரிக்கெட் தொடரிலும், அடுத்ததாக அக்டோபர் மாதம் தொடங்கும் டி.20 உலகக்கோப்பை கிரிக்கெட் தொடரிலும் பங்கேற்க உள்ளது.

பாகிஸ்தான் போன்ற அணிகள் ஆசிய கோப்பை தொடருக்கான தங்களது அணிகளை அறிவித்துவிட்டன. ஆசிய கோப்பை தொடருக்கான இந்திய அணி வரும் திங்கள்கிழமை அறிவிக்கப்படும் என எதிர்பார்க்கப்படுகிறது. ஆசிய கோப்பை தொடருக்கான இந்திய அணியே, டி20 உலகக்கோப்பை தொடருக்கான இந்திய அணியாகவும் இருக்க வாய்ப்புள்ளதால், இந்திய அணியின் தேர்வாளர்கள் அணி தேர்வில் கூடுதல் கவனம் செலுத்தி வருகின்றனர்.

ஆசிய கோப்பை தொடருக்கான இந்திய அணி, அறிவிக்கப்பட இரு தினங்களே இருந்தாலும், ஹர்சல் பட்டேல், விராட் கோலி, கேஎல் ராகுல் போன்ற வீரர்களின் நிலை என்ன என்பது தற்போது வரை கேள்விக்குறியாகவே உள்ளது. இதில் குறிப்பாக விண்டீஸ் அணியுடனான முதல் டி20 போட்டியின் போது காயமடைந்த ஹர்சல் படேல், நான்காவது மற்றும் ஐந்தாவது போட்டிக்கு முன் காயத்தில் இருந்து குணமடைந்துவிடுவார் என எதிர்பார்க்கப்பட்டது.

ஆனால், தற்போது வெளியாகியிருக்கும் ஒரு தகவலின்படி ஹர்சல் பட்டேல் ஆசிய கோப்பை தொடரில் இருந்து முழுமையாக விலகியுள்ளதாக தெரியவந்துள்ளது.

காயத்தில் இருந்து ஹர்சல் பட்டேல் குணமடைய இன்னும் சில வாரங்கள் ஆகும் என்பதால் அவர் ஆசிய கோப்பை கிரிக்கெட் தொடரில் விளையாட வாய்ப்பு இல்லை என தெரியவந்துள்ளது. அதே போல் அக்டோபர் மாதம் நடைபெற இருக்கும் டி20 உலகக்கோப்பை கிரிக்கெட் தொடரின் முதல் சில போட்டிகளிலும் விளையாட வாய்ப்புகள் இல்லை எனவும் தகவல்கள் தெரிவிக்கின்றன.

முக்கிய வீரர்களில் ஒருவரான ஹர்சல் பட்டேல் ஆசிய கோப்பை மற்றும் டி20 உலகக்கோப்பை தொடரில் இருந்து விலகும் பட்சத்தில் அது இந்திய அணிக்கு பெரும் பின்னடைவை ஏற்படுத்தும் என எதிர்பார்க்கப்படுகிறது. ஹர்சல் பட்டேல் விலகினால் தீபக் சாஹருக்கு இந்திய அணி முன்னுரிமை கொடுக்கும் என தெரிகிறது. 

ஐபிஎல் தொடரில் இருந்து காயத்தில் அவதிப்பட்டு வரும் தீபக் சாஹர், மிக சமீபத்தில் தான் காயத்தில் இருந்து குணமடைந்தது மட்டுமே இந்திய அணிக்கு நிகழ்ந்த ஒரே நல்ல விசயமாக பார்க்கப்படுகிறது.