டர்பனில் உள்ள கிங்ஸ்மீத் கிரிக்கெட் மைதானத்தில் நடந்த இந்தியாவுக்கு எதிரான முதல் டி20 சர்வதேச போட்டியில் தென் ஆப்பிரிக்க அணியின் அதிர பேட்டர் ஹென்ரிச் கிளாசென் தனது பெயரில் தனித்துவ சாதனை ஒன்றை படைத்து அசத்தியுள்ளார். ‘
அந்தவகையில் இந்த போட்டியில் 22 பந்துகளை எதிர்கொண்ட ஹென்ரிச் கிளாசென் 2 பவுண்டரிகள், ஒரு சிக்ஸர் என 25 ரன்களைச் சேர்த்த கையோடு விக்கெட்டை இழந்து பெவிலியன் திரும்பினார். இந்நிலையில் இந்த போட்டியில் அவர் ஒரு சிக்ஸரை அடித்ததன் மூலம், நடப்பு ஆண்டில் டி20 கிரிக்கெட்டில் தனது 100ஆவது சிக்ஸரை பூர்த்தி செய்து அசத்தியதுடன், ஒரு ஆண்டில் 100 அல்லது அதற்கு மேற்பட்ட சிக்ஸர்களை அடித்த முதல் தென் ஆப்பிரிக்க வீரர் எனும் சாதனையை படைத்துள்ளார்.
அதுமட்டுமின்றி சர்வதேச அளவில் இந்த சாதனையை படைக்கும் நான்காவது வீரர் மற்றும் முதல் வெஸ்ட் இண்டீஸ் அல்லாத கிரிக்கெட் வீரர் எனும் சாதனைகளையும் படைத்து அசத்தினார். இதற்கு முன் வெஸ்ட் இண்டீஸின் கிறிஸ் கெய்ல், ஆண்ட்ரே ரஸல், நிக்கோலஸ் பூரன் ஆகியோர் மட்டுமே இந்த சாதனையை படைத்துள்ளனர். இதில் சுவாரஸ்யமான விஷயம் என்னவெனில், இந்த ஆண்டு ஹென்றிச் கிளாசன் டி20 கிரிக்கெட்டில் 69 பவுண்டரிகளை மட்டுமே அடித்துள்ளார் என்பது குறிப்பிடத்தக்கது.
ஒரு ஆண்டில் 100+ டி20 சிக்ஸர்களை அடித்த வீரர்கள்
- 165 - நிக்கோலஸ் பூரன் (2024)*, வெஸ்ட் இண்டீஸ்
- 135 - கிறிஸ் கெயில் (2015), வெஸ்ட் இண்டீஸ்
- 121 - கிறிஸ் கெயில் (2012), வெஸ்ட் இண்டீஸ்
- 116 - கிறிஸ் கெயில் (2011), வெஸ்ட் இண்டீஸ்
- 112 - கிறிஸ் கெயில் (2016), வெஸ்ட் இண்டீஸ்
- 101 - கிறிஸ் கெயில் (2017), வெஸ்ட் இண்டீஸ்
- 101 - ஆண்ட்ரே ரஸ்ல் (2019), வெஸ்ட் இண்டீஸ்
- 100 - கிறிஸ் கெயில் (2013), வெஸ்ட் இண்டீஸ்
- 100 - ஹென்ரிச் கிளாசென்(2024), தென் ஆப்பிரிக்கா
இந்த போட்டி குறித்து பேசினால், முதல் டி20 போட்டியில் இந்திய அணி 61 ரன்கள் வித்தியாசத்தில் தென் ஆப்பிரிக்காவை வீழ்த்தி வெற்றிபெற்றதுடன் 4 போட்டிகள் கொண்ட தொடரில் 1-0 என முன்னிலை பெற்றது குறிப்பிடத்தக்கது. அத்னபடி இப்போட்டியில் முதலில் பேட்டிங் செய்த இந்திய அணி 20 ஓவர்கள் முடிவில் 8 விக்கெட் இழப்புக்கு 202 ரன்கள் குவித்தது. இதில் அதிகபட்சமாக சஞ்சு சாம்சன் 7 பவுண்டரிகள் மற்றும் 10 சிக்ஸர்களுடன் 107 ரன்கள் எடுத்தார்.
Also Read: Funding To Save Test Cricket
இதனையடுத்து இலக்கை நோக்கி விளையாடிய தென் ஆப்பிரிக்க அணி வீரர்கள் வருண் சக்ரவர்த்தி மற்றும் ரவி பிஷ்னோய் ஆகியோரது பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்தனர். இதனால் தென் ஆப்பிரிக்க அணி 17.5 ஓவர்களிலேயே அனைத்து விக்கெட்டுகளையும் இழந்து 141 ரன்களுக்கு ஆல் அவுட்டானது. அந்த அணியில் அதிகபட்சமாக ஹென்றிச் கிளாசென் 25 ரன்களை எடுத்திருந்தார் என்பது குறிப்பிடத்தக்கது.