ஆஸ்திரேலிய டெஸ்ட் அணியில் ஓப்பனிங் இடம் என்பது கடந்த சில ஆண்டுகளாக தலைவலி கொடுக்கும் ஒரு விஷயமாகவே இருந்திருக்கிறது. மேத்யூ ஹெய்டன், ஜஸ்டின் லங்கர் ஆகியோரின் ஓய்வுக்குப் பிறகு ஒரு நிரந்தரமான தொடக்க ஜோடி அவர்களுக்கு அமையவில்லை. டேவிட் வார்னர் ஒரு இடத்தை தனதாக்கினாலும் கிறிஸ் ரோஜர்ஸ், உஸ்மான் கவாஜா, கேமரூன் பேங்க்ராஃப்ட், மேட் ரென்ஷா, மார்கஸ் ஹேரிஸ் என வீரர்கள் மாறிக்கொண்டே இருந்தனர்.
கடந்த 2-3 ஆண்டுகளாகத்தான் கவாஜாவின் எழுச்சி அவர்களுக்கு ஒரு நிலையான ஓப்பனிங் பார்ட்னர்ஷிப்பை ஏற்படுத்திக் கொடுத்தது. இந்நிலையில், பாகிஸ்தானுக்கு எதிராக கடந்த வாரம் நடந்து முடிந்த டெஸ்ட் தொடரோடு டேவிட் வார்னர் ஓய்வு பெற்றுவிட்டார். அதனால் கவாஜாவின் ஓப்பனிங் பார்ட்னரை உறுதி செய்வது அவசியம் ஆனது. இந்த இடத்தில் பல குழப்பங்கள் நிலவியது. ஒருசில இளம் வீரர்கள் ஆஸ்திரேலியாவின் முதல் தர தொடரான ஷெஃபீல்ட் ஷீல்ட் தொடரில் ஓரளவு நல்ல செயல்பாட்டை வெளிப்படுத்தியிருந்தனர்.
ஆனால் தனித்துத் தெரியும் அளவுக்கு அவர்களின் எண்கள் இல்லை. அதனால் ஒவ்வொருவரும் ஒவ்வொரு கருத்துகளை வெளிப்படுத்தியிருந்தார்கள். முன்னாள் கேப்டன் ரிக்கி பான்டிங் கேமரூன் பேங்க்ராஃப்ட் தொடக்க வீரராக களமிறக்கப்படவேண்டும் என்றார். மேத்யூ ஹெய்டனோ மேட் ரென்ஷாவின் பெயரை முன்மொழிந்தார். சைமன் கேடிச் மிடில் ஆர்டர் பேட்ஸ்மேனான கேமரூன் கிரீனை ஓப்பனராகக் களமிறக்கவேண்டும் என்றார். மிட்செல் மார்ஷின் சமீபத்திய எழுச்சியின் காரணமாகவும், அவரது ஃபிட்னஸ் பிரச்சனைகள் காரணமாகவும் கிரீன் ஒருசில போட்டிகளில் பிளேயிங் லெவனில் வாய்ப்பு பெறாமல் போனார்.
பாகிஸ்தான் தொடரின்போது பத்திரிகையாளர் வார்னரிடமே இதுபற்றிக் கேட்டனர். அதற்கு அவரோ, "என்னுடைய இடத்தில் ஹேரிஸ் ஆடினால் நன்றாக இருக்கும்" என்றார். இப்படி ஒவ்வொருவரும் ஒவ்வொரு கருத்தை வெளியிட்டுக்கொண்டிருக்க, "நான் ஓப்பனராக விளையாட ஆர்வமாக இருக்கிறேன்" என்று அந்த அணியின் நட்சத்திர வீரர் ஸ்டீவ் ஸ்மித் விருப்பம் தெரிவித்துள்ளார். இந்தத் தலைமுறையின் மிகச் சிறந்த டெஸ்ட் வீரராகக் கருதப்படும் ஸ்மித் மிடில் ஆர்டரில் இருக்கும்போது அது அந்த அணிக்குப் பன்மடங்கு பலம் சேர்க்கும். அவர் திடீரென ஓப்பனராக விளையாட விருப்பம் தெரிவித்தது பலருக்கும் அதிர்ச்சியாக இருந்தது.
இந்நிலையில் வெஸ்ட் இண்டீஸ் அணிக்கு எதிராக 17ஆம் தேதி தொடங்கும் டெஸ்ட் தொடருக்கான அணியை ஆஸ்திரேலிய தேர்வாளர்கள் அறிவித்தனர். அதில் ஸ்டீவ் ஸ்மித் ஓப்பனராகக் களமிறங்குவது உறுதி செய்யப்பட்டிருக்கிறது. இந்நிலையில் இதுகுறித்து பேசிய் ஸ்மித், “மார்னஸ் லபுஷாக்னே தற்போது நம்பர் 3 இல் விளையாடி வருவதால், நான் நீண்ட நேரம் பேட்டிங் செய்ய காத்திருக்கிறேன். பேட்டிங் செய்ய காத்திருப்பது எனக்குப் பிடிக்கவில்லை, அதனால் நான் ஏன் தொடக்க வீரராக களமிறங்கக் கூடாது என்று நினைத்தேன்.
இப்போது நான் உற்சாகமாக இருக்கிறேன். புதிய பந்தை எதிர்கொள்ள விரும்புகிறேன். கடந்த 2019 ஆஷஸ் தொடரை நீங்கள் திரும்பிப் பார்த்தால், நான் புதிய பந்தை எதிர்கொண்ட பெரும்பாலான நேரங்களில் நான் மிகவும் ஆரம்பத்தில் இருந்தேன். நான் பல வருடங்களாக மூன்றாம் வரிசையில் பேட் செய்தேன், ஆரம்பத்திலேயே இருந்தேன், புதிய பந்திற்கு எதிராக நன்றாகச் செய்தேன். அதனால் எனக்கு இது ஒன்றும் புதிதோ அந்நியமோ இல்லை. அதனால் நான் தொடக்க வீரராக விளையாடுவது எதிர்பார்க்கிறேன், அந்த சவாலை எதிர்நோக்குகிறேன்” என்று தெரிவித்துள்ளார்.