மைதானத்திற்கு பேட்டைக் கூட கொண்டுவரவில்லை - கேஎல் ராகுல்!

ஆசியக் கோப்பை கிரிக்கெட் போட்டியின் சூப்பா் 4 ஆட்டத்தில் பாகிஸ்தானை 228 ரன்கள் வித்தியாசத்தில் இந்தியா அணி நேற்று வீழ்த்தியது. இப்போட்டியில் டாஸ் வென்று முதலில் பேட்டிங் செய்த இந்திய அணி 50 ஓவர்களில் 2 விக்கெட்டுகளை மட்டுமே இழந்து 356 ரன்கள் குவித்தது. இதில் அதிகபட்மாக விராட் கோலி 122 ரன்களையும், ராகுல் 111 ரன்களுடன் ஆட்டமிழக்காமல் களத்தில் இருந்தனர்.

இதைதொடர்ந்து இமாலய இலக்கை நோக்கி விளையாடிய பாகிஸ்தான் அணி இந்திய அணியின் பந்துவீச்சை சமாளிக்க முடியாமல் அடுத்தடுத்து விக்கெட்டுக்ளை இழந்து, 32 ஓவா்களில் 128 ரன்களுக்கு ஆல் அவுட்டானது. இந்திய அணி தரப்பில் சுழற்பந்துவீச்சாளர் குல்தீப் யாதவ் அபாரமாக பந்துவீசி 5 விக்கெட்டுகளை வீழ்த்தினாா்.

இந்நிலையில் நடப்பாண்டு ஐபிஎல் தொடரின் போது காயமடைந்த கேஎல் ராகுல், தனது காயத்திற்காக அறுவை சிகிச்சை மேற்கொண்டு சமீபத்தில்தான் குணமடைந்தார். இதனால் அவர் இந்திய அணிக்கு திரும்புவாரா என்ற சந்தேகம் இருந்தது. ஆனால் தேர்வுகுழுவினர் அவர் மீது நம்பிக்கைவைத்து ஆசிய கோப்பை மற்றும் உலகக்கோப்பை தொடர்களுக்கான இந்திய அணியில் வாய்ப்பு வழங்கியது.

ஆனாலும் காயத்திலிருந்து மீண்டுள்ள அவர் எவ்வாறு செயல்படுவார் என்ற சந்தேகம் இருந்தது. ஆனால் பாகிஸ்தான் அணிக்கெதிரான போட்டியில் கேஎல் ராகுல அபாரமான ஆட்டத்தை வெளிப்படுத்தியதோடு, சதமடித்தும் தனது கம்பேக்கை கொடுத்டுள்ளார். இது இந்திய அணிக்கு மிகப்பெரும் பலமாக பார்க்கப்படுகிறது.     

இந்நிலையில் இந்த வெற்றியை தொடர்ந்து பேசிய கேஎல் ராகுல், “டாஸ் போடுவதற்கு 5 நிமிடத்துக்கு முன்புதான், ராகுல் டிராவிட் என்னிடம் வந்து விளையாடப் போவதாக கூறினார். ஸ்ரேயால் ஐயருக்கு கடைசி நேரத்தில் முதுகு பிடிப்பு ஏற்பட்டதால் நான் விளையாட வேண்டிய சூழல் எழுந்தது.

ஆனால், மைதானத்துக்கு என்னுடைய பேட், ஜெர்ஸி உள்ளிட்டவற்றை நான் கொண்டு வரவே இல்லை. முழுக் கை ஜெர்ஸியுடன் மைதானத்துக்குள் தண்ணீர் பாட்டில் கொடுக்கும் வேலை செய்வேன் என்று நினைத்தேன். கடைசி நேரத்தில் ஹோட்டலுக்கு சென்று மேலாளர் எனது பேட் உள்ளிட்ட உபகரணங்களை எடுத்து வந்தார்” என்று தெரிவித்தார்.