ஒவ்வொரு ஆண்டின் இறுதியிலும் சர்வதேச கிரிக்கெட் கவுன்சிலானது ஆண்டின் சிறந்த வீரர், சிறந்த வீராங்கனை, சிறந்த ஒரு நாள் அணி, டி20 அணி, டெஸ்ட் அணி உள்ளிட்ட பல்வேறு விருதுகளை வழங்கி கௌரவித்து வருகிறது. அந்தவகையில் 2024 ஆண்டில் சிறப்பாக செயல்பட்ட வீரர்களை தேர்வு செய்யும் பணிகளில் ஐசிசி இறங்கியுள்ளது.
அதன் ஒரு பகுதியாக 2024 ஆண்டில் சர்வதேச ஒருநாள் கிரிக்கெட்டில் சிறப்பான ஆட்டத்தை வெளிப்படுத்திய வீரர்களைக் கொண்ட ஆண்டின் சிறந்த ஒருநாள் அணியை ஐசிசி இன்று அறிவித்துள்ளது. இந்த அணியின் கேப்டனாக இலங்கை வீரர் சரித் அசலங்கா நியமிக்கப்பட்டுள்ள நிலையில், பாகிஸ்தானை சேர்ந்த மூன்று வீரர்களுக்கும், ஆஃப்கானிஸ்தானை சேர்ந்த மூன்று வீரர்களுக்கும், இலங்கை அணியைச் சேர்ந்த 4 வீரகளும் இடம்பிடித்துள்ளன.
அந்தவகையில் ஐசிசி தேர்வு செய்துள்ள இந்த ஒருநாள் அணியின் தொடக்க வீரர்களாக பாகிஸ்தானின் இளம் அதிரடி வீரர் சைம் அயூப் மற்றும் ஆஃப்கானிஸ்தானின் ரஹ்மனுல்லா குர்பாஸ் ஆகியோர் தேர்ந்தெடுக்கப்பட்டுள்ளனர். கடந்த 2024ஆம் ஆண்டு அறிமுகமான சைம் அயூப் 9 போட்டிகளில் 3 சதங்கள், ஒரு அரைசதம் என 515 ரன்களையும், ரஹ்மனுல்லா குர்பாஸ் 11 போட்டிகளில் 531 ரன்களையும் குவித்துள்ளார்.
அவர்களைத் தொடர்ந்து மூன்றாம் இடத்தில் இலங்கை அணியின் பதும் நிஷங்காவும், நான்காம் இடத்தில் குசால் மெண்டிஸும், ஐந்தாம் இடத்தில் சரித் அசலங்காவும் இடம்பிடித்துள்ளனர். இதில் பதும் நிஷங்கா 694 ரன்களையும், குசால் மெண்டிஸ் 742 ரன்களையும், சரித் அசலங்கா 605 ரன்களையும் அடித்துள்ளனர். அவர்களைத் தொடர்ந்து வெஸ்ட் இண்டீஸின் ஷெர்ஃபேன் ரூதர்ஃபோர்ட் 425 ரன்களை குவித்ததன் மூலம் இந்த அணியில் இடம்பிடித்துள்ளார்.
மேற்கொண்டு ஆஃப்கானிஸ்தான் அணியின் அஸ்மதுல்லா ஒமர்ஸாய் 12 போட்டிகளில் 417 ரன்களையும், பந்துவீச்சில் 17 விக்கெட்டுகளையும் வீழ்த்தி இந்த அணியில் இடம்பிடித்துள்ளார். அவரைத்தொடர்ந்து இலங்கை அணியின் வநிந்து ஹசரங்கா 26 விக்கெட்டுகளையும், பாகிஸ்தானின் ஷாஹீன் அஃப்ரிடி 15 விக்கெட்டுகளையும், ஹாரிஸ் ராவுஃப் 13 விக்கெட்டுகளையும் கைப்பற்றியதன் மூலம் இந்த அணியில் இடம்பிடித்துள்ளார்.
அதேசமயம் கடந்த 2024ஆம் ஆண்டு ஆஃப்கானிஸ்தான் அணிக்காக அறிமுகமான அல்லா கசான்ஃபர் 11 போட்டிகளில் விளையாடி 21 விக்கெட்டுகளையும் கைப்பற்றி அசத்தினார். இதன்மூலம் ஐசிசி 2024ஆம் ஆண்டின் சிறந்த ஒருநாள் அணியில் அவருக்கு வாய்ப்பு வழங்கப்பட்டுள்ளது. அதேசமயம் ஐசிசி அறிவித்துள்ள இந்த அணியில் இந்தியா, ஆஸ்திரேலியா, தென் ஆப்பிரிக்கா, இங்கிலாந்தை சேர்ந்த ஒரு வீரர் கூட இடம்பிடிக்கவில்லை என்பது குறிப்பிடத்தக்கது.
Also Read: Funding To Save Test Cricket
ஐசிசி சிறந்த ஒருநாள் அணி 2024: சைம் அயூப் (பாகிஸ்தான்), ரஹ்மனுல்லா குர்பாஸ் (ஆஃப்கானிஸ்தான்), பதும் நிஷங்கா, குசால் மெண்டிஸ், சரித் அசலங்கா (கேப்டன், இலங்கை), ஷெர்ஃபேன் ரூதர்ஃபோர்ட் (வெஸ்ட் இண்டீஸ்), அஸ்மதுல்லா ஒமர்ஸாய் (ஆஃப்கானிஸ்தான்), வநிந்து ஹசரங்கா (இலங்கை), ஷாஹீன் அஃப்ரிடி, ஹாரிஸ் ராவுஃப் (பாகிஸ்தான்), அல்லா கசான்ஃபர் (அஃப்கானிஸ்தான்).