ஐசிசி ஒருநாள் கிரிக்கெட் உலகக் கோப்பை தொடரில் இன்று லக்னோவில் உள்ள ஏக்னா கிரிக்கெட் மைதானத்தில் நடைபெறும் 10ஆவது லீக் ஆட்டத்தில் ஆஸ்திரேலியா - தென் ஆப்பிரிக்கா அணிகள் மோதுகின்றன. இதில் 5 முறை சாம்பியனான ஆஸ்திரேலிய அணிஉலகக் கோப்பை கிரிக்கெட் தொடரை தோல்வியுடன் தொடங்கி இருந்தது. சென்னை சேப்பாக்கம் மைதான த்தில் இந்தியாவுக்கு எதிராக நடைபெற்ற லீக் ஆட்டத்தில் ஆஸ்திரேலிய அணி 6 விக்கெட் வித்தியாசத்தில் தோற்றிருந்தது.
டேவிட் வார்னர், ஸ்டீவ் ஸ்மித் தவிர மற்ற எந்த பேட்ஸ்மேன்களும் 30 ரன்களை எட்டவில்லை. அதேவேளையில் கொத்தாக விக்கெட் சரிவையும் சந்தித்தனர். ஒட்டுமொத்த ஆஸ்திரேலிய அணியும் தரமான இந்திய சுழற்பந்து வீச்சு தாக்குதலில் தடுமாற்றம் கண்டது. இது ஒருபுறம் இருக்க அணியில் 2-வது பிரதான சுழற்பந்து வீச்சாளர் இல்லாததும் பெரிய அளவில் பாதிப்பை உருவாக்கி உள்ளது.
ஆடம் ஸம்பா மட்டுமே அவர்களுக்கு உள்ள ஒரே தேர்வாக இருக்கிறது. கிளென் மேக்ஸ்வெல் பகுதி நேர சுழற்பந்து வீச்சாளராக இருந்தாலும் சுழலுக்கு சாதகமான சேப்பாக்கம் ஆடுகளத்தில் அவரால் எந்த வகையிலும் தாக்கத்தை ஏற்படுத்த முடியாமல் போனது. ஆல்ரவுண்டர் மார்கஸ் ஸ்டாயினிஸ் தொடைப் பகுதியில் ஏற்பட்ட காயத்தில் இருந்து குணமாகி உள்ளார்.
இன்றைய ஆட்டத்தில் அவர் களமிறங்குவது ஆஸ்திரேலிய அணிக்கு கூடுதல் வலுசேர்க்கும். ஏனெனில் வெற்றி தேடிக்கொடுக்கக்கூடிய வீரராக தன்னை ஏற்கெனவே ஸ்டாயினிஸ் நிரூபித்துள்ளார். மேலும் லக்னோ ஆடுகளத்தில் அவர், ஐபிஎல் தொடரில் லக்னோ சூப்பர் ஜெயண்ட்ஸ் அணிக்காக விளையாடி உள்ள அனுபவமும் கைகொடுக்கக்கூடும். விளையாடும் லெவனில் ஸ்டாயினிஸ் இடம்பெறும் பட்சத்தில் ஆல்ரவுண்டர் கேமரூன் கிரீன் நீக்கப்படக்கூடும்.
மறுப்பக்கம் டெம்பா பவுமா தலைமையிலான தென் ஆப்பிரிக்க அணி முதல் ஆட்டத்தில் இலங்கை அணியை துவம்சம் செய்திருந்தது. ஐடன் மார்க்ரம், குயின்டன் டி காக், ரஸ்ஸி வான்டெர் டஸன் ஆகியோரது சதங்களால் 428 ரன்களை குவித்த தென் ஆப்பிரிக்கா அந்த ஆட்டத்தில் 102 ரன்கள் வித்தியாசத்தில் வெற்றி கண்டிருந்தது. இதில் 49 பந்துகளில் சதம் விளாசி சாதனை படைத்த ஐடன் மார்க்ரமுடன் குயிண்டன் டி காக், ரஸ்ஸி வான்டெர் டஸன் ஆகியோரும் மீண்டும் ஒரு முறை ரன் வேட்டை நிகழ்த்த ஆயத்தமாக உள்ளனர்.
உலகக் கோப்பை தொடருக்காக லக்னோ மைதனானத்தில் உள்ள ஆடுகளங்கள் மாற்றி அமைக்கப்பட்டுள்ளன. இதனால் ஆடுகளத்தின் தன்மை எவ்வாறு இருக்கும் என்பது புதிராகவே உள்ளது. ஒருவேளை ஆடுகளம் சுழற்பந்து வீச்சுக்கு சாதகமாக இருந்தால் தென் ஆப்பிரிக்க அணி மணிக்கட்டு சுழற்பந்து வீச்சாளரான தப்ரைஸ் ஷம்சியை பயன்படுத்தக்கூடும்.
இடது கை சுழற்பந்து வீச்சாளரான கேசவ் மகாராஜுடன் இணைந்து தப்ரைஸ் ஷம்சி, ஆஸ்திரேலிய அணி பேட்ஸ்மேன்களுக்கு அழுத்தம் கொடுக்கக்கூடும். அதேவேளையில் தென் ஆப்பிரிக்க அணியின் பேட்ஸ்மேன்கள் சுழற்பந்து வீச்சில் சிறப்பாக விளையாடக்கூடியவர்கள். தெம்பா பவுமா, டேவிட் மில்லர், ஹெய்ன்ரிச் கிளாசன் ஆகியோரும் பேட்டிங்கில் வலுசேர்க்கக் கூடியவர்களாக திகழ்கின்றனர். வேகப்பந்து வீச்சில் காகிசோ ரபாடா, லுங்கி இங்கிடி, மார்கோ ஜான்சென், ஜெரால்டு கோட்ஸி ஆகியோர் ஆஸ்திரேலிய அணியின் பேட்டிங் வரிசைக்கு சவால் அளிக்கக்கூடும்.
உலகக் கோப்பை தொடரை பெரிய அளவிலான வெற்றியுடன் தொடங்கிய தென் ஆப்பிரிக்க அணியானது கடந்த மாதம் நடைபெற்ற இருதரப்பு ஒருநாள் கிரிக்கெட் போட்டித் தொடரில் ஆஸ்திரேலியாவுக்கு எதிராக சொந்த மண்ணில் 0-2 என்ற கணக்கில் பின்தங்கிய நிலையில் இருந்து மீண்டு வந்து 3-2 என்ற கணக்கில் வெற்றி பெற்று தொடரை கைப்பற்றி இருந்தது தென் ஆப்பிக்க அணி. இது அந்த அணிக்கு சாதகமான விஷயமாக பார்க்கப்படுகிறது. எனினும் ஆஸ்திரேலிய வீரர்கள் மன உறுதி கொண்டவர்கள் என்பதால் அவர்கள் வலுவாக மீண்டு வருவார்கள் என எதிர்பார்க்கப்படுகிறது.
உத்தேச லெவன்
ஆஸ்திரேலியா: டேவிட் வார்னர், மிட்செல் மார்ஷ், ஸ்டீவ் ஸ்மித், மார்னஸ் லாபுஷாக்னே, கிளென் மேக்ஸ்வெல், அலெக்ஸ் கேரி, கேமரூன் கிரீன், பாட் கம்மின்ஸ் (கே), மிட்செல் ஸ்டார்க், ஆடம் ஸாம்பா, ஜோஷ் ஹேசில்வுட்.
தென் ஆப்பிரிக்கா: குயின்டன் டி காக், டெம்பா பவுமா (கே), ரஸ்ஸி வான் டெர் டுசென், ஐடன் மார்க்ரம், ஹென்ரிச் கிளாசென், டேவிட் மில்லர், மார்கோ ஜான்சன், ஜெரால்ட் கோட்ஸி, கேசவ் மகராஜ், ககிசோ ரபாடா, லுங்கி இங்கிடி.
ஃபேண்டஸி லெவன் டிப்ஸ்
- விக்கெட் கீப்பர் - குயின்டன் டி காக்
- பேட்ஸ்மேன்கள்- டேவிட் வார்னர், ஸ்டீவ் ஸ்மித், ரஸ்ஸி வான் டெர் டுசன்
- ஆல்-ரவுண்டர்கள் - கிளென் மேக்ஸ்வெல் (துணை கேப்டன்), ஐடன் மார்க்ரம் (கேப்டன்), மார்கோ ஜான்சன்
- பந்துவீச்சாளர்கள்- ஜோஷ் ஹசில்வுட், ஆடம் ஸாம்பா, கேசவ் மகராஜ், ஜெரால்ட் கோட்ஸி.
Disclaimer:*இந்த ஃபேண்டஸி டீம் என்பது ஆசிரியரின் புரிதல், பகுப்பாய்வு மற்றும் உள்ளுணர்வை அடிப்படையாகக் கொண்டது. உங்கள் அணியை உருவாக்கும் போது குறிப்பிடப்பட்ட புள்ளிகளைக் கருத்தில் கொண்டு கவனமாக முடிவெடுக்கவும்.