கிரிக்கெட் ரசிகர்களின் மிகப்பெரிய எதிர்பார்ப்பிற்கு மத்தியில் ஐசிசியின் ஒருநாள் உலகக்கோப்பை கிரிக்கெட் திருவிழா நாளை இந்தியாவில் தொடங்கவுள்ளது. இதில் குஜராத் அஹ்மதாபாத் மைதானத்தில் உள்ள நரேந்திர மோடி மைதானத்தில் நாளை நடபெறும் முதல் போட்டியில் கடந்த முறை சாம்பியன் பட்டம் வென்ற நடப்பு சாம்பியன் இங்கிலாந்து அணியும், கடந்த முறை இறுதிப்போட்டியில் பட்டத்தை கோட்டைவிட்ட நியூசிலாந்து அணியும் இந்த போட்டியில் மோதுகின்றன.
நடப்பு சாம்பியனான இங்கிலாந்து அணி ஜோஸ் பட்லர் தலைமையில் களமிறங்குகிறது. நியூசிலாந்து அணி இந்த தொடரை வெற்றியுடன் தொடங்க கனே வில்லியம்சன் தலைமையில் களமிறங்க உள்ளது. அகமதாபாத் மைதானம் 1 லட்சத்திற்கும் அதிகமான ரசிகர்கள் நேரில் கண்டு ரசிக்கும் தன்மை கொண்டது என்பதாலும், தொடக்கப்போட்டி என்பதால் வெளிநாட்டு ரசிகர்கள் அதிகளவில் வருகை தருவார்கள் என்பதாலும் இப்போட்டியின் மீதன எதிர்பார்ப்பு அதிகரித்துள்ளது.
போட்டி தகவல்கள்
- மோதும் அணிகள் - இங்கிலாந்து vs நியூசிலாந்து
- இடம்- நரேந்திர மோடி கிரிக்கெட் மைதானம், அஹ்மதாபாத்
- நேரம் - மதியம் 2 மணி
போட்டி முன்னோட்டம்
இந்த தொடர்களில் கடந்த இரு எடிசன்களான 2015 மற்றும் 2019ஆம் ஆண்டுகளில் ஆதிக்கம் செலுத்திய நியூசிலாந்து அணி கோப்பையை தவறவிட்டது. குறிப்பாக, 2019ஆம் ஆண்டு இங்கிலாந்துக்கு எதிரான உலகக்கோப்பை இறுதி போட்டியில், பவுண்டரி கணக்கில் இங்கிலாந்து அணி வெற்றி பெற்று தனது முதல் உலகக்கோப்பை கைப்பற்றியது. இப்படி கடந்த இரு எடிசன்களாக, நியூசிலாந்து அணி இறுதிப்போட்டி வரை முன்னேறி கோப்பையை தவறவிட்டது. அதனால், அந்த அணி இம்முறை வெல்ல வேண்டும் என்ற முனைப்புடன் களம் இறங்கும்.
அந்த அணியில் அனுபவம் வாய்ந்த வீரர்களாக அணியின் கேப்டன் கேன் வில்லியம்சன், டாம் லாதம், ஜேம்ஸ் நீஷம், மிட்செல் சான்ட்னர் மற்றும் டிரெண்ட் போல்ட் உள்ளனர். பேட்டிங்கை பொருத்தவரை, நியூசிலாந்து அணியின் கேப்டன் கேன் வில்லியம்சன் காயத்தில் இருந்து மீண்டு அணிக்கு திரும்பியுள்ளார். மேலும், டெவோன் கான்வே, க்ளென் பிலிப்ஸ், மார்க் சாப்மேன், டேரில் மிட்செல் ஆகியோர் அணிக்கு பலம் சேர்க்கும் விதமாக உள்ளனர்.
பந்து வீச்சைப் பொருத்தவரை டிரெண்ட் போல்ட், டிம் சவுத்தி மற்றும் லோக்கி ஃபெர்குசன் ஆகியோர் அனுபவம் வாய்ந்த வீரர்களாக உள்ளனர். இவர்கள் வெவ்வெறு நிலையில், பந்தை நன்கு ஸ்விங் செய்யும் திறன் கொண்டவர்கள். அணியின் கூடுதல் பலமாக இஷ் சோதி மற்றும் மிட்செல் சான்ட்னர் உள்ளனர். இருப்பினும் நாளைய போட்டியில் வில்லியம்சன், டிம் சௌதீ ஆகியோர் விளையாடமாட்டார்கள் என்பது நியூசிலாந்து அணிக்கு பின்னடைவாக பார்க்கப்படுகிறது.
அதேசமயம் மறுபக்கம் நடப்பு சாம்பினான இங்கிலாந்து அணியை அனுபவ அதிரடி வீரர் ஜோஸ் பட்லர் வழிநடத்தவுள்ளார். அந்த அணியின் பேட்டிங்கில் ஜானி பேர்ஸ்டோவ், டேவிட் மாலன், ஹாரி ப்ரூக், மொயீன் அலி, லியாம் லிவிங்ஸ்டோன் போன்ற அதிரடிக்கு பெயர் போன வீரர்கள் இடம்பிடித்துள்ளது அணிக்கு மிகப்பெரும் பலமாக பார்க்கப்படுகிறது.
அதை விட 2019 உலகக்கோப்பை வெல்வதற்கு முக்கிய பங்காற்றிய உலகின் நம்பர் ஒன் வேகப்பந்து வீச்சு ஆல் ரவுண்டர் பென் ஸ்டோக்ஸ் நாட்டுக்காக ஓய்வு முடிவை வாபஸ் பெற்று இந்த தொடரில் ஸ்பெஷலாக விளையாடுவது இங்கிலாந்துக்கு மிகப்பெரிய பலமாகும். அவரை போலவே அசத்தும் திறமை கொண்ட சாம் கரண் நல்ல ஆல் ரவுண்டராக இருக்கிறார். இதனால் இங்கிலாந்தின் ஆல் ரவுண்டர்கள் துறை மிகவும் வலுவானதாகவும் அதிரடியானதாகவும் இருக்கிறது.
பந்துவீச்சைப் பொறுத்தமட்டியில் மார்க் வுட், கிறிஸ் வோக்ஸ் கூட்டணி வேகத்தில் மிரட்டக்கூடியதாக கணிக்கப்படுகிறது. இவர்களுடன் இடது கை பவுலராக ரீஸ் டாப்லி, கஸ் அட்கின்ஷன் போன்ற எக்ஸ்ட்ரா வீரர்களும் இங்கிலாந்து அணியை பலப்படுத்தும் நோக்கத்தில் தேர்வு செய்யப்பட்டுள்ளனர். அவர்களுடன் மொயீன் அலி, ஆதில் ரஷித், லியாம் லிவிங்ஸ்டோன் ஆகியோரும் பந்துவீசுவார்கள் என்பதால் நிச்சயம் எதிரணிகளுக்கு சவாலாக இருப்பார்கள் என்பதில் சந்தேகமில்லை.
நேருக்கு நேர்
- மோதிய போட்டிகள் - 94
- இங்கிலாந்து - 45
- நியூசிலாந்து - 44
- முடிவில்லை - 02
மைதானம் எப்படி
அஹ்மதாபாத் நரேந்திர மோடி மைதானத்தில் மூன்று விதமான பிட்ச்கள் இருக்கிறது. கருப்பு நிற பிட்ச், சிகப்பு நிற பிட்ச், கருப்பு மற்றும் சிவப்பு நிறம் கலந்த பிட்ச். இதில், கருப்பு நிற பிட்சில் பேட்டர்களால் ரன்களை குவிக்க முடியும். சிகப்பு நிற பிட்சில் ஸ்பின்னர்களால் பெரிய அளவில் தாக்கத்தை ஏற்படுத்த முடியும். மைதானத்தின் அனைத்து பகுதிகளிலும் 70+ மீட்டர் பவுண்டரி இருக்கும் என்பதால், சிக்ஸர்கள் அதிகம் பறக்க வாய்ப்பில்லை.
உத்தேச லெவன்
இங்கிலாந்து - டேவிட் மலான், ஜானி பேர்ஸ்டோவ், ஜோ ரூட், பென் ஸ்டோக்ஸ்/ஹாரி புரூக், ஜோஸ் பட்லர் (கே), மொயீன் அலி, லியாம் லிவிங்ஸ்டோன், சாம் கர்ரன், ரீஸ் டாப்லி, மார்க் வூட், அடில் ரஷித்.
நியூசிலாந்து - வில் யங், டெவான் கான்வே, ஹென்றி நிக்கோல்ஸ், டேரில் மிட்செல், டாம் லாதம் (கே), கிளென் பிலிப்ஸ், ரச்சின் ரவீந்திரா, மிட்செல் சான்ட்னர், லோக்கி ஃபெர்குசன், மேட் ஹென்றி, டிரென்ட் போல்ட்.
ஃபேண்டஸி லெவன் டிப்ஸ்
- விக்கெட் கீப்பர்கள் - ஜானி பேர்ஸ்டோவ் (VC), டாம் லாதம், டெவோன் கான்வே (C), ஜோஸ் பட்லர்
- பேட்டர்கள் - ஜோ ரூட், டேவிட் மாலன், டேரில் மிட்செல்
- ஆல்-ரவுண்டர்கள் - லியாம் லிவிங்ஸ்டோன், சாம் கர்ரன்
- பந்துவீச்சாளர்கள் - டிரென்ட் போல்ட், மார்க் வூட்
Disclaimer:*இந்த ஃபேண்டஸி டீம் என்பது ஆசிரியரின் புரிதல், பகுப்பாய்வு மற்றும் உள்ளுணர்வை அடிப்படையாகக் கொண்டது. உங்கள் அணியை உருவாக்கும் போது குறிப்பிடப்பட்ட புள்ளிகளைக் கருத்தில் கொண்டு கவனமாக முடிவெடுக்கவும்.