ஐஎல்டி20 தொடரின் மூன்றாவது சீசன் விறுவிறுப்பாக நடைபெற்று வரும் நிலையில், இதில் நேற்று நடைபெற்ற 7ஆவது லீக் போட்டியில் டெஸர்ட் வைப்பர்ஸ் மற்றும் எம்ஐ எமிரேட்ஸ் அணிகள் பலப்பரீட்சை நடத்தின. துபாய் சர்வதேச கிரிக்கெட் மைதானத்தில் நடைபெற்ற இப்போட்டியில் டாஸ் வென்ற மும்பை இந்தியன்ஸ் கேப்டவுன் அணி முதலில் பேட்டிங் செய்வதாக அறிவித்தது.
அதன்படி களமிறங்கிய அந்த அணிக்கு குசால் பெரேரா - முகமது வசீம் இணை அதிரடியான தொடக்கத்தைக் கொடுத்தனர். இதில் முகமது வசீம் 18 ரன்களில் ஆட்டமிழக்க, மறுபக்கம் அதிரடியாக விளையாடி வந்த குசால் பெரேராவும் 33 ரன்களுக்கு விக்கெட்டை இழந்தார். அடுத்து களமிறங்கிய அணியின் நட்சத்திர வீரர்கள் டாம் பான்டன் மற்றும் கேப்டன் நிக்கோலஸ் பூரன் தலா 15 ரன்களில் விக்கெட்டுகளை இழந்து ஏமாற்றமளித்தனர். பின்னர் களமிறங்கிய கீரென் பொல்லர்ட் தனது பங்கிற்கு 36 ரன்களையும், டேன் மௌஸ்லி 15 ரன்னிலும் என விக்கெட்டை இழந்தனர்.
இறுதியில் ரொமாரியோ ஷெஃபர்ட் 16 ரன்களைச் சேர்த்து ஃபினிஷிங்கைக் கொடுக்க மும்பை இந்தியன்ஸ் எமிரேட்ஸ் அணி 20 ஓவர்கள் முடிவில் 6 விக்கெட்டுகள் இழப்பிற்கு 159 ரன்களைச் சேர்த்தது. டெஸர்ட் வைப்பர்ஸ் அணி தரப்பில் கேப்டன் லோக்கி ஃபெர்குசன் 2 விக்கெட்டுகளை கைப்பற்றினார். இதனையடுத்து இலக்கை நோக்கி விளையாடிய வைப்பர்ஸ் அணிக்கு ஃபகர் ஸமான் மற்றும் அலெக்ஸ் ஹேல்ஸ் இணை அதிரடியாக விளையாடி அணியின் ஸ்கோரை மளமளவென உயர்த்தினர். இதில் இருவரும் இணைந்து முதல் விக்கெட்டிற்கு 62 ரன்கள் பார்ட்னர்ஷிப் அமைத்தனர்.
அதன்பின் அதிரடியாக விளையாடி வந்த அலெக்ஸ் ஹேல்ஸ் 6 பவுண்டரிகளுடன் 34 ரன்களைச் சேர்த்து விக்கெட்டை இழக்க, அடுத்து களமிறங்கிய டேனியல் லாரன்ஸ் 5 ரன்னிலும், அஸாம் கான் 2 ரன்னிலும் என ஆட்டமிழந்து ஏமாற்றமளித்தனர். ஒருபக்கம் விக்கெட்டுகள் சரிந்தாலும் மறுமுனையில் அதிரடியாக விளையாடி வந்த ஃபகர் ஸமான் அரைசதம் கடந்து அசத்தினார். பின் 5 பவுண்டரி, 4 சிக்ஸர்கள் என 67 ரன்களைச் சேர்த்திருந்த நிலையில் ஃபகர் ஸமான் விக்கெட்டை இழக்க, அவருடன் இணைந்து விளையாடிய சாம் கரணும் 28 ரன்களில் ஆட்டமிழந்தார்.
Also Read: Funding To Save Test Cricket
பின்னர் களமிறங்கிய ஷெர்ஃபேன் ருதர்ஃபோர்ட் அதிரடியாக விளையாடியதுடன் 3 பவுண்டரி, ஒரு சிக்சர் என 21 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் டெஸர்ட் வைப்பர்ஸ் அணி 19.1 ஓவர்களில் இலக்கை எட்டியதுடன் 5 விக்கெட்டுகள் வித்தியாசத்தில் மும்பை இந்தியன்ஸ் கேப்டவுன் அணியை வீழ்த்தி வெற்றிபெற்றது. இப்போட்டியில் அரைசதம் கடந்ததுடன் அணியின் வெற்றிக்கு காரணமாக இருந்த ஃபகர் ஸமான் ஆட்டநாயகன் விருதை வென்றனர்.