மாஸ்டர்ஸ் லீக் 2025: விண்டீஸை வீழ்த்தி இலங்கை அசத்தல் வெற்றி!

இன்டர்நேஷ்னல் மாஸ்டர்ஸ் லீக் டி20 தொடரில் நேற்று நடைபெற்ற 10ஆவது லீக் போட்டியில் இலங்கை மாஸ்டர்ஸ் மற்றும் வெஸ்ட் இண்டீஸ் மாஸ்டர்ஸ் அணிகள் பலப்பரீட்சை நடத்தின. வதோதராவில் நடைபெற்ற இபோட்டியில் டாஸ் வென்ற வெஸ்ட் இண்டீஸ் அணி முதலில் பந்துவீசுவதாக அறிவித்தது. 

அதன்படி களமிறங்கிய இலங்கை மாஸ்டர்ஸ் அணிக்கு உபுல் தரங்கா - குமார் சங்கக்காரா இணை தொடக்கம் கொடுத்தனர். இதில் உபுல் தரங்கா ஒரு ரன் மட்டுமே எடுத்திருந்த நிலையில் விக்கெட்டை இழந்தார். அவரைத்தொடர்ந்து களமிறங்கிய லஹிரு திரிமானாவேவும் 14 ரன்களுடன் நடையைக் கட்டினார். பின்னர் சங்கக்காராவுடன் இணைந்த குணரத்னே சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். 

இதில் அரைசதத்தை நெருங்கிய சங்கக்காரா 47 ரன்களில் விக்கெட்டை இழக்க, மறுமுனையில் அரைசதம் கடந்து அசத்திய குணரத்னே 7 பவுண்டரி, 2 சிக்ஸர்கள் என 64 ரன்களைச் சேர்த்து விக்கெட்டை இழந்தார். அதன்பின் களமிறங்கிய வீரர்களும் சோபிக்க தவற இலங்கை மாஸ்டர்ஸ் அணி 20 ஓவர்கள் முடிவில் 9 விக்கெட் இழப்பிற்கு 173 ரன்களைச் சேர்த்தது. வெஸ்ட் இண்டீஸ் தரப்பில் ஆஷ்லே நர்ஸ் 3 விக்கெட்டுகளை கைப்பற்றினார். 

அதன்பின் இலக்கை நோக்கி களமிறங்கிய வெஸ்ட் இண்டீஸ் மாஸ்டர்ஸ் அணியில் சாத்விக் வால்டன் ரன்கள் ஏதுமின்றியும், நர்ஷிங் 14 ரன்களுக்கும் என விக்கெட்டை இழந்தனர்.  பின்னர் டுவைன் ஸ்மித்துடன் இணைந்த லிண்டல் சிம்மன்ஸ் அபாரமான ஆட்டத்தை வெளிப்படுத்தி அணியின் ஸ்கோரை உயர்த்தும் முயற்சியில் இறங்கியனர். இதில் டுவைன் ஸ்மித் 6 பவுண்டரி, 2 சிக்ஸர்கள் என 49 ரன்களில் ஆட்டமிழந்து அரைசதமடிக்கும் வாய்ப்பை தவறவிட்டார். 

Also Read: Funding To Save Test Cricket

அதேசமயம் இறுதிவரை ஆட்டமிழக்காமல் இருந்த லிண்டல் சிம்மன்ஸ் 37 ரன்களையும், தினேஷ் ராம்டின் 15 ரன்களையும் சேர்த்ததை தவிர்த்து மற்ற வீரர்களில் யாரும் பெரிதளவில் ரன்களைச் சேர்க்க தவறினர். இதனால் வெஸ்ட் இண்டீஸ் மாஸ்டர்ஸ் அணி 20 ஓவர்கள் முடிவில் 5 விக்கெட் இழப்பிற்கு 152 ரன்களை மட்டுமே சேர்த்தது. இதன்மூலம் இலங்கை மாஸ்டர்ஸ் அணி 21 ரன்கள் வித்தியாசத்தில் வெஸ்ட் இண்டிஸ் மாஸ்டர்ஸ் அணியை வீழ்த்தி வெற்றிபெற்றது.