இங்கிலாந்து அணி தற்போது இந்தியாவில் சுற்றுப்பணம் செய்து 5 போட்டிகள் கொண்ட டி20 தொடரில் விளையாடி வருகிறது. இத்தொடரில் இதுவரை நடந்து முடிந்த மூன்று போட்டிகளின் முடிவில் இந்திய அணி முதலிரண்டு போட்டிகளிலும், இங்கிலாந்து அணி மூனறாவது போட்டியிலும் வெற்றிபெற்று 2-1 என்ற கணக்கில் தொடரில் நீடித்து வருகின்றனர். இதில் தொடரின் வெற்றியாளரைத் தீர்மானிக்கும் நான்காவது டி20 போட்டி இன்று (ஜனவரி 31) நடைபெற்றது.
புனேவில் உள்ள மகாராஷ்டிரா கிரிக்கெட் சங்க மைதானத்தில் நடைபெற்ற இப்போட்டியில் டாஸ் வென்ற இங்கிலாந்து அணி முதலில் பந்துவீசுவதாக அறிவித்தது. இப்போட்டிக்கான இரு அணியிலும் சில மாற்றங்கள் செய்யப்பட்டிருந்தன. இதனையடுத்து களமிறங்கிய இந்திய அணிக்கு அபிஷேக் சர்மா மீண்டும் அதிரடியான தொடக்கத்தை வழங்கினார். ஆனால் மறுமுனையில் களமிறங்கிய சஞ்சு சாம்சன் ஒரு ரன்னிலும், திலக் வர்மா மற்றும் கேப்டன் சூர்யகுமார் யாதவ் இணை ரன்கள் ஏதுமின்றியும் என அடுத்தடுத்து சாகிப் மஹ்மூத் வீசிய முதல் ஓவரிலேயே விக்கெட்டுகளை இழந்தனர்.
இதனால் இந்திய அணி 12 ரன்களிலேயே 3 விக்கெட்டுகளை இழந்து தடுமாறியது. அதன்பின் அபிஷேக் சர்மாவுடன் இணைந்த ரிங்கு சிங் பொறுப்புடன் விளையாடி விக்கெட் இழப்பை தடுத்து நிறுத்தினார். இதில் இருவரும் இணைந்து சிறப்பான ஆட்டத்தை வெளிப்படுத்தியதுடன் 4ஆவது விக்கெட்டிற்கு 45 ரன்கள் பார்ட்னர்ஷிப்பும் அமைத்தனர். அதன்பின் அதிரடியாக விளையாடிய அபிஷேக் சர்மா 4 பவுண்டரி, ஒரு சிக்ஸர் என 29 ரன்களில் விக்கெட்டை இழக்க, அவரைத்தொடர்ந்து சிறப்பான ஆட்டத்தை வெளிப்படுத்திய ரிங்கு சிங்கும் 4 பவுண்டரி ஒரு சிக்ஸர் என 30 ரன்களில் ஆட்டமிழந்தார்.
அதன்பின் ஜோடி சேர்ந்த ஷிவம் தூபே மற்றும் ஹர்திக் பாண்டியா இணை அதிரடியாக விளையாடி அணியின் ஸ்கோரை மளமளவென உயர்த்தினர். இருவரும் அடுத்தடுத்து பவுண்டரிகளும், சிக்ஸர்களையும் விளாச இந்திய அணியின் ஸ்கோர் வேகமும் உயர்ந்தது. இப்போட்டியில் அபாரமான ஆட்டத்தை வெளிப்படுத்திய ஹர்திக் பாண்டியா 27 பந்துகளில் தனது அரைசதத்தைப் பதிவுசெய்து அசத்தினார். இருவரும் இணைந்து 6ஆவது விக்கெட்டிற்கு 90 ரன்கள் பார்ட்னர்ஷிப் அமைத்த நிலையில் 4 பவுண்டரி, 4 சிக்ஸர்கள் என 53 ரன்களை எடுத்த கையோடு ஹர்திக் பாண்டியா விக்கெட்டை இழந்தார்.
இருப்பினும் இப்போட்டியில் அபாரமாக விளையாடி வந்த ஷிவம் தூபே தனது அரைசதத்தைப் பதிவுசெய்தார். இப்போட்டியில் இறுதிவரை களத்தில் இருந்த ஷிவம் துபே 7 பவுண்டரி, 2 சிக்ஸர்கள் என 53 ரன்களைச் சேர்த்து கடைசி பந்தில் ரன் அவுட்டானார். இதன்மூலம் இந்திய அணி 20 ஓவர்கள் முடிவில் 9 விக்கெட் இழப்பிற்கு 181 ரன்களைக் குவித்துள்ளது. இங்கிலாந்து அணி தரப்பில் சிறப்பான பந்துவீச்சை வெளிப்படுத்திய சாகிப் மஹ்மூத் 3 விக்கெட்டுகளையும், ஜேமி ஓவர்டன் 2 விக்கெட்டுகளையும் கைப்பற்றி அசத்தினர்.
இதையடுத்து களமிறங்கிய இங்கிலாந்து அணிக்கு பில் சால்ட் மற்றும் பென் டக்கெட் இணை அதிரடியான தொடக்கத்தைக் கொடுத்து அணிக்கு தேவையான அடித்தளத்தை அமைத்துக் கொடுத்தனர். இதில் இருவரும் இணைந்து அடுத்தடுத்து பவுண்டரிகளை விளாசியதுடன் முதல் விக்கெட்டிற்கு 62 ரன்கள் பார்ட்னர்ஷிப் அமைத்து அசத்தினர். அதன்பின் தொடர்ந்து அதிரடியாக விளையடை வந்த பென் டக்கெட் அரைசதம் அடிப்பார் என எதிர்பார்க்கப்பட்ட நிலையில் 7 பவுண்டரி, ஒரு சிக்ஸர் என 39 ரன்களை எடுத்த நிலையில் விக்கெட்டை இழந்தார்.
அதன்பின் மற்றொரு தொடக்க வீரர் பில் சால்ட் 23 ரன்களில் விக்கெட்டை இழக்க, அடுத்து வந்த கேப்டன் ஜோஸ் பட்லரும் 2 ரன்களில் ஆட்டமிழந்து பெவிலியன் திரும்பினார். அடுத்து களமிறங்கிய ஹாரி புரூக் ஒருபக்கம் சிறப்பான ஆட்டத்தை வெளிப்படுத்தி அணியின் ஸ்கோரை உயர்த்திய நிலையில், மறுமுனையில் களமிறங்கிய லியாம் லிவிங்ஸ்டோன் 9 ரன்களில் விக்கெட்டை இழந்து ஏமாற்றமளித்தனர். இருப்பினும் அபாராமான ஆட்டத்தை வெளிப்படுத்தி வந்த ஹாரி புரூக் 25 பந்துகளில் அரைசத கடந்த கையோடு 5 பவுண்டரி, 2 சிக்ஸர்கள் என 51 ரன்களில் விக்கெட்டை இழந்தார்.
இதையடுத்து களமிறங்கிய ஜேக்கப் பெத்தல் 6 ரன்களுக்கும், பிரைடன் கார்ஸ் ரன்கள் ஏதுமின்றியும் ஜோஃப்ரா ஆர்ச்சர் ரனக்ள் ஏதுமின்றியும் என அடுத்தடுத்து விக்கெட்டுகளை இழந்து பெவிலியன் திரும்பினார். இதனால் இங்கிலாந்து அணி வெற்றிக்கு கடைசி இரண்டு ஓவர்களில் 25 ரன்கள் என்ற நிலை ஏற்பட்டது. இறுதியில் அதிரடியாக விளையாடி இங்கிலாந்து அணிக்கு நம்பிக்கை கொடுத்து வந்த ஜேமி ஓவர்டன் 19 ரன்களை எடுத்திருந்த நிலையில் விக்கெட்டை இழந்து பெவிலியன் திரும்ப, இங்கிலாந்து அணி வெற்றிக்கு கடைசி ஓவரில் 19 ரன்கள் தேவை என்ற நிலை ஏற்பட்டது.
Also Read: Funding To Save Test Cricket
இறுதியில் சாகிப் மஹ்மூதும் ஒரு ரன்னில் விக்கெட்டை இழக்க, இங்கிலாந்து அணி 19.4 ஓவர்களில் அனைத்து விக்கெட்டுகளையும் இழந்து 166 ரன்களுக்கு ஆல் அவுட்டானது. இந்திய அணி தரப்பில் கன்கஷன் சப்ஸ்டிடியூட் வீரராக விளையாடிய ஹர்ஷித் ரானா மற்றும் ரவி பிஷ்னோய் ஆகியோர் தலா 3 விக்கெட்டுகளையும், வருண் சக்ரவர்த்தி இரண்டு விக்கெட்டுகளையும் கைப்பற்றினர். இதன்மூலம் இந்திய அணி 15 ரன்கள் வித்தியாசத்தில் இங்கிலாந்து அணியை வீழ்த்தி வெற்றிபெற்றதுடன், 3-1 என்ற கணக்கில் டி20 தொடரையும் கைப்பற்றியுள்ளது.