பாகிஸ்தானுக்கு எதிராக இந்திய அணி வெற்றிபெறும் - ஸ்காட் ஸ்டைரிஸ்!

ஆசிய கோப்பை கிரிக்கெட் தொடர் 27ஆம் தேதி துவங்குகிறது. செப்டம்பர் 11ஆம் தேதி வரை நடைபெற இருக்கும் இந்த தொடருக்காக ஒட்டுமொத்த கிரிக்கெட் ரசிகர்களும் மிகுந்த ஆவலுடன் காத்துள்ளனர். அதிலும் குறிப்பாக மற்ற அனைத்து போட்டிகளையும் விட இந்தியா – பாகிஸ்தான் இடையேயான போட்டி மீதே மிக அதிக எதிர்பார்ப்பு நிலவி வருகிறது. இரு அணிகளும் 28ஆம் தேதி நடைபெறும் தங்களது முதல் போட்டியிலேயே ஒருவரை ஒருவர் எதிர்கொள்கின்றனர்.

ஒட்டுமொத்த கிரிக்கெட் உலகமும் இந்தியா – பாகிஸ்தான் இடையேயான போட்டிக்காக மிகுந்த ஆவலுடன் காத்திருப்பதால், முன்னாள் வீரர்கள் மற்றும் கிரிக்கெட் வல்லுநர்கள் இந்தியா – பாகிஸ்தான் போட்டியில் எந்த அணி வெல்லும் என்பது குறித்தான தங்களது கணிப்புகளை வெளிப்படுத்துவதோடு, இரு அணிகளுக்கும் தேவையான தங்களது ஆலோசனைகளையும் வழங்கி வருகின்றனர்.

இந்தநிலையில், ஆசிய கோப்பை கிரிக்கெட் தொடர் குறித்து பல்வேறு விசயங்கள் பேசி வரும் முன்னாள் நியூசிலாந்து வீரரான ஸ்காட் ஸ்டைரிஸ், ஆசிய கோப்பை கிரிக்கெட் தொடரில் பாகிஸ்தான் உள்பட அனைத்து எதிரணிகளையும் இந்திய அணியே வீழ்த்தும் என நம்பிக்கை தெரிவித்துள்ளார்.

இது குறித்து பேசிய ஸ்காட் ஸ்டைரிஸ், “ரோஹித் சர்மா தலைமையிலான இந்திய அணி வலுவானதாக உள்ளது. ஆசிய கோப்பை கிரிக்கெட் தொடரில் பாகிஸ்தான் உள்பட எதிரணிகள் அனைத்தையும் இந்திய அணியே வீழ்த்தும், அந்த அளவிற்கு இந்திய அணி வலுவானதாக உள்ளது. கடைசியாக நடைபெற்ற டி20 உலகக்கோப்பை தொடரில் இந்திய அணி பாகிஸ்தான் மற்றும் நியூசிலாந்து அணிகளிடம் தோல்வியடைந்தது. ஆனால் இந்த ஆசியக் கோப்பையில் பாகிஸ்தான் உட்பட அனைத்து அணிகளையும் வீழ்த்தும் திறனை இந்திய அணியினர் பெற்றுள்ளனர். 

இருப்பினும் இந்திய அணி அதிரடியாக ஆடினாலும் போட்டியை எப்படி அணுகுவது என்ற தெளிவு இல்லை. பாகிஸ்தானின் துவக்க ஜோடியை பிரிப்பது இந்தியாவும் பெரிய சவாலாக இருக்கப் போகிறது. மேலும் இந்திய அணி சுழற்பந்து வீச்சாளர்களை நம்பினால், அது பாகிஸ்தானுக்கு சாதகமாக அமையும், அதே போல் மிக முக்கியமாக இந்திய வீரர்கள் தடுப்பாட்டத்தை பற்றி யோசிக்கவே கூடாது. தடுப்பாட்டம் ஆட நினைத்தால் அது பாகிஸ்தானிற்கே சாதகமாக அமையும், இந்திய அணி தங்களது வழக்கமான அதிரடி ஆட்டத்தையே இந்த போட்டியிலும் வெளிப்படுத்த வேண்டும்” என்று தெரிவித்தார்.

இந்திய அணி: ரோஹித் சர்மா, கே.எல் ராகுல், விராட் கோலி, சூர்யகுமார் யாதவ், ரிஷப் பந்த், தீபக் ஹூடா, தினேஷ் கார்த்திக், ஹர்திக் பாண்டியா, ரவீந்திர ஜடேஜா, ரவிச்சந்திர அஸ்வின், யுஸ்வேந்திர சாஹல், ரவி பிஸ்னோய், புவனேஷ்வர் குமார், அர்ஸ்தீப் சிங், ஆவேஸ் கான்.