ஆஸ்திரேலியாவில் நடைபெற்றுவரும் டி20 உலகக் கோப்பை 2022 தொடரின் அரையிறுதி சுற்று தொடங்கி நடைபெற்று வருகிறது. இத்தொடரின் முதல் அரையிறுதிப் போட்டியில் நியூசிலாந்தை வீழ்த்தி, பாகிஸ்தான் அணி இறுதிப் போட்டிக்கு முன்னேறிவிட்டது. நாளை நடைபெறவுள்ள இரண்டாவது அரையிறுதிப் போட்டியில் இந்தியா, இங்கிலாந்து அணிகள் மோதவுள்ளன. இப்போட்டியில் வெற்றிபெறும் அணி, வரும் ஞாயிறு அன்று இறுதிப் போட்டியில் பாகிஸ்தானை எதிர்த்து களமிறங்கும்.
இந்திய அணியின் பேட்டிங், பந்துவீச்சு இரண்டும் சிறப்பாக இருக்கிறது. குறிப்பாக, மிடில் வரிசை உலகத்தரத்தில் இருப்பதுதான் அணிக்கு பலமாக பார்க்கப்படுகிறது. புவனேஷ்வர் குமார் டி20 கிரிக்கெட்டில் இங்கிலாந்து கேப்டன் ஜாஸ் பட்லருக்கு எதிராக 30 பந்துகளை வீசி 5 விக்கெட்களை எடுத்திருக்கிறார். இதனால், பவர் பிளேவில் இங்கிலாந்து நெருக்கடியுடன்தான் விளையாடும் என எதிர்பார்க்கப்படுகிறது.
தொடக்க வீரர் இப்படி மோசமான ரெக்கார்ட் வைத்திருப்பதுபோல், இங்கிலாந்து அணியின் மிடில் வரிசையில் இந்த தொடரில் படுமோசமான ரெக்கார்ட்டை வைத்திருக்கிறது. ஆம், இங்கிலாந்து அணி மிடில் வரிசை பேட்டர்களில் ஒருவர் கூட இத்தொடரில் 60 ரன்களை கூட அடிக்கவில்லை. அதேவேளையில், இந்திய அணி மிடில் வரிசை பேட்டர்கள் 6 முறை 50 ரன்களை அடித்திருக்கிறார்கள்.
இதன்மூலம், இங்கிலாந்து அணி தொடக்க வீரர்களை நம்பித்தான் இருக்கிறது. இதனால், புவனேஷ்வர் குமார் பவர் பிளேவில் பட்லரை தூக்கிவிட்டால், அடுத்து போட்டி இந்திய கட்டுப்பாட்டிற்குள் வர வாய்ப்புள்ளது. மேலும், இங்கிலாந்து அணி சமீப காலமாகவே ஸ்பின்னர்களுக்கு எதிராக படுமோசமாக சொதப்பி வருகிறது. இதனால் தரமான ஸ்பின்னர்கள் அஸ்வின், அக்சர் படேல் இருவரும் இணைந்து அதிரடியாக பந்துவீசும் பட்சத்தில், இங்கிலாந்து ரன்களை குவிக்க தடுமாறும்.
இப்படி இங்கிலாந்து அணிக்கு மிகப்பெரிய வீக்னஸ்கள் இருப்பதால், நாளைய அரையிறுதிப் போட்டியில் இங்கிலாந்து அணி சொதப்புவதற்கு அதிக வாய்ப்புகள் இருக்கிறது. அடிலைட் மைதானத்தில் கடந்த 11 போட்டிகளில் டாஸ் வென்ற அணி வெற்றிபெற்றது கிடையாது. இதனால், டாஸும் பெரிய எதிர்பார்ப்பை ஏற்படுத்தியுள்ளது.
இந்திய அணியைப் பொறுத்தவரையில் விராட் கோலி, கேஎல் ராகுல், சூர்யகுமார் யாதவ் ஆகியோர் பேட்டிங்கிலும், புவனேஷ்வர் குமார், அர்ஷ்தீப் சிங், ரவிச்சந்திரன் அஸ்வின் ஆகியோரும் இருப்பது பெரும் பலமாக பார்க்கப்படுகிறது.
அதேசமயம் இங்கிலாந்து அணியில் ஜோஸ் பட்லர், அலெக்ஸ் ஹேல்ஸ், லியாம் லிவிங்ஸ்டோன் ஆகியோர் பேட்டிங்கிலும், ஆதில் ரஷித், சாம் கரண், கிறிஸ் வோக்ஸ் ஆகியோர் பந்துவீச்சிலும் இருப்பதும் அந்த அணியின் பலமாக உள்ளது. இப்படி இரு அணியிலும் நட்சத்திர வீரர்கள் இருப்பதால் இப்போட்டியில் எந்த அணி வெற்றிபெறும் என்ற எதிர்பார்ப்பும் அதிகரித்துள்ளது.
போட்டி தகவல்கள்
- மோதும் அணிகள் - இந்தியா vs இங்கிலாந்து
- இடம் - அடிலெய்ட் கிரிக்கெட் மைதானம்
- நேரம் - மதியம் 1.30 மணி
நேருக்கு நேர்
- மோதிய போட்டிகள் - 22
- இந்தியா - 12
- இங்கிலாந்து - 10
உத்தேச லெவன்
இந்தியா – கேஎல் ராகுல், ரோஹித் சர்மா (கே), விராட் கோலி, சூர்யகுமார் யாதவ், ஹர்திக் பாண்டியா, தினேஷ் கார்த்திக், அக்சர் படேல், ரவிச்சந்திரன் அஸ்வின், புவனேஷ்வர் குமார், முகமது ஷமி, அர்ஷ்தீப் சிங்.
இங்கிலாந்து- அலெக்ஸ் ஹேல்ஸ், ஜோஸ் பட்லர்(கே), டேவிட் மலான்/பில் சால்ட், பென் ஸ்டோக்ஸ், ஹாரி புரூக், லியாம் லிவிங்ஸ்டோன், மொயின் அலி, சாம் கர்ரன், கிறிஸ் வோக்ஸ், அடில் ரஷித், மார்க் வூட்/ டேவிட் வில்லி.
ஃபேண்டஸி லெவன் டிப்ஸ்
- விக்கெட் கீப்பர் - ஜோஸ் பட்லர்
- பேட்டர்ஸ் - விராட் கோலி, சூர்யகுமார் யாதவ், அலெக்ஸ் ஹேல்ஸ்
- ஆல்ரவுண்டர்கள் - ஹர்திக் பாண்டியா, சாம் கர்ரன், அக்சர் படேல்
- பந்துவீச்சாளர்கள் - மார்க் வுட், அர்ஷ்தீப் சிங், புவனேஷ்வர் குமார், ரவிச்சந்திரன் அஸ்வின்.