ஐபிஎல் 2021: சஹார், போல்ட் அபார பந்துவீச்சு; மும்பை த்ரில் வெற்றி!

ஐபிஎல் தொடரின் இன்றைய லீக் ஆட்டத்தில் மும்பை இந்தியன்ஸ் அணி, சன்ரைசர்ஸ் ஹைதராபாத் அணியை எதிர்கொண்டது. இப்போட்டியில் முதலில் டாஸ் வென்ற மும்பை இந்தியன்ஸ் அணி கேப்டன் ரோஹித் சர்மா முதலில் பேட்டிங் செய்ய தீர்மானித்தார். 

இதையடுத்து களமிறங்கிய மும்பை அணி டி காக், பொல்லார்ட் ஆகியோரது அதிரடியான ஆட்டத்தால் 20 ஓவரில் 5 விக்கெட் இழப்பிற்கு 150 ரன்களைச் சேர்த்தது, அந்த அணியில் அதிகபட்சமாக டி காக் 42 ரன்களையும், பொல்லார்ட் 35 ரன்களையும் சேர்த்தனர். 

இதையடுத்து வெற்றி இலக்கை நோக்கி களமிறங்கிய ஹைதராபாத் அணிக்கு ஜானி பேர்ஸ்டோவ், டேவிட் வார்னர் இணை அதிரடியான தொடக்கத்தைக் கொடுத்தது. இதில் அரைசதமடிப்பார் என எதிர்பார்க்கப்பட்ட பேர்ஸ்டோவ் 43 ரன்களில் ஆட்டமிழக்க, அவரைத் தொடர்ந்து டேவிட் வார்னரும் 33 ரன்களில் ரன் அவுட்டாகி பெவிலியன் திரும்பினார்.

பின்னர் களமிறங்கிய மனீஷ் பாண்டே, விராட் சிங், அபிஷேக் சர்மா ஆகியோர் அடுத்தடுத்து சொற்ப ரன்களில் ஆட்டமிழந்து ஏமாற்றமளிக்க போட்டியில் பரபரப்பு தொற்றிக்கொண்டது.

பின்னர் விஜய் சங்கர் நம்பிக்கை அளிக்கும் வகையில் இரண்டு சிக்சர்களை பறக்க விட்டார். இருப்பினும் பின்னர் வந்த வீரர்கள் அடுத்தடுத்து விக்கெட்டுகளை இழந்து பெவிலியனுக்கு திரும்பியதால், 19.4 ஓவர்கள் முடிவில் ஹைதராபாத் அணி அனைத்து விக்கெட்டுகளையும் இழந்து 137  ரன்களை மட்டுமே எடுத்தது. 

இதன் மூலம் மும்பை இந்தியன்ஸ் அணி 13 ரன்கள் வித்தியாசத்தில் ஹைதராபாத் அணியை வீழ்த்தி த்ரில் வெற்றிபெற்றது. மும்பை அணி தரப்பில் ராகுல் சஹார், ட்ரெண்ட் போல்ட் தலா  3 விக்கெட்டுகளை கைப்பற்றினர்.