ஐபிஎல் தொடரில் 39ஆவது லீக் ஆட்டத்தில் இன்று கொல்கத்தா நைட் ரைடர்ஸ் - குஜராத் டைட்டன்ஸ் மோதின. கொல்கத்தாவிலுள்ள ஈடன் கார்டன் மைதானத்தில் நடைபெற்ற இப்போட்டியில் டாஸ் வென்ற குஜராத் அணி முதலில் பந்துவீச தீர்மானித்தது.
இதையடுத்து, கொல்கத்தா அணியின் தொடக்க வீரர்களாக ஜெகதீசன், ரஹமதுல்லா குர்பாஸ் களமிறங்கினர். ஜெகதீசன் 19 ரன்கள் எடுத்த நிலையில் ஷமி பந்து வீச்சில் அவுட் ஆனார். அடுத்துவந்த ஷர்துல் தாக்கூர் ரன் எதுவும் எடுக்காமல் அவுட் ஆகி ஏமாற்றம் அளித்தார். பின்னர் களமிறங்கிய வெங்கடேஷ் 11 ரன்னிலும், கேப்டன் நிதிஷ் ரானா 4 ரன்னிலும் அடுத்தடுத்து அவுட் ஆகி வெளியேறினார்.
விக்கெட்டுகள் தொடர்ந்து சரிந்த நிலையில் தொடக்க வீரரான குர்பாஸ் நிலைத்து நின்று அதிரடி ஆட்டத்தை வெளிப்படுத்தினார். குஜராத் பந்துவீச்சாளர்களின் பந்தை நாளா பக்கமும் சிக்சர்களாக சிதறடித்த குர்பாஸ் அதிரடி ஆட்டத்தை விளையாடி 26 பந்துகளில் அரைசதம் கடந்து அசத்தினார்.
அதன்பின் 39 பந்துகளை சந்தித்த குர்பாஸ் 5 பவுண்டரி, 7 சிக்சர்கள் உள்பட 81 ரன்கள் குவித்து அவுட் ஆனார். கடைசி கட்டத்தில் அதிரடியாக ஆடிய ரசல் 19 பந்துகளில் 34 ரன்கள் குவித்து அவுட் ஆனார். இறுதியில் கொல்கத்தா 20 ஓவர்கள் முடிவில் 7 விக்கெட் இழப்பிற்கு 179 ரன்கள் குவித்தது.
இதையடுத்து கடின இலக்கை நோக்கி களமிறங்கிய குஜராத் அணிக்கு ஷுப்மன் கில் அதிரடியான தொடக்கத்தைக் கொடுத்தார். ஆனால் அவருடன் மற்றொரு தொடக்க வீரராக களமிறங்கிய விருத்திமான் சஹா 10 ரன்களில் ஆட்டமிழந்து பெவிலியன் திரும்பினார்.
அதன்பின் கில்லுடன் இணைந்த கேப்டன் ஹர்திக் பாண்டியா பொறுப்பான ஆட்டத்தை வெளிப்படுத்தி 26 ரன்களைச் சேர்த்தார். மறுமுனையில் அரைசதம் அடிப்பார் என எதிர்பார்க்கப்பட்ட ஷுப்மன் கில் 49 ரன்களை எடுத்த நிலையில் விக்கெட்டை இழந்தார்.
அதனைத்தொடர்ந்து ஜோடி சேர்ந்த டேவிட் மில்லர் - விஜய் சங்கர் இணை அதிரடியான ஆட்டத்தை வெளிப்படுத்தி அணியை வெற்றியை நோக்கி அழைத்துச் சென்றனர். இதில் அபாரமான ஆட்டத்தை வெளிப்படுத்திய விஜய் சங்கர் 24 பந்துகளில் அரைசதம் கடந்ததுடன் அணிக்கு வெற்றியை தேடிக்கொடுத்தார்.
இதன்மூலம் குஜராத் டைட்டன்ஸ் அணி 17.5 ஓவர்களில் இலக்கை எட்டியதுடன், 7 விக்கெட் வித்தியாசத்தில் கொல்கத்தா நைட் ரைடர்ஸை வீழ்த்தி அபார வெற்றியைப் பதிவுசெய்தது. இதில் இறுதிவரை ஆட்டமிழக்காமல் இருந்த விஜய் சங்கர் 24 பந்துகளில் 2 பவுண்டரி, 5 சிக்சர்கள் என 54 ரன்களையும், டேவிட் மில்லர் 2 பவுண்டரி, 2 சிக்சர்கள் என 32 ரன்களையும் சேர்த்து அணியின் வெற்றிக்கு உறுதுணையாக இருந்தனர்.