ஐபிஎல் 2023: புதிய ஜெர்சியை வெளியிட்டது கேகேஆர்!

ஐபிஎல் தொடரின் 16ஆவது சீசன் வரும் மார்ச் 31ஆம் தேதி அகமதாபாத்தில் கோலாகலமாக தொடங்கப்பட உள்ளது. இதில் மும்பை இந்தியன்ஸ், சென்னை சூப்பர் கிங்ஸ், கொல்கத்தா நைட் ரைடர்ஸ், சன் ரைசர்ஸ் ஐதரபாத், ராஜஸ்தான் ராயல்ஸ், குஜராத் டைட்டன்ஸ், ராயல் சேலஞ்சர்ஸ் பெங்களூரு, பஞ்சாப் கிங்ஸ், டெல்லி கேப்பிடல்ஸ், லக்னோ சூப்பர் ஜெயண்ட்ஸ் உள்ளிட்ட 10 அணிகள் பங்கேற்கின்றன.

வரும் 31ஆம் தேதி நடைபெறும் தொடக்க லீக் ஆட்டத்தில் ஹர்திக் பாண்டியா தலைமையிலான குஜராத் டைட்டன்ஸ் அணியும், மகேந்திர சிங் தோனி தலமையிலான சென்னை சூப்பர் கிங்ஸ் அணியும் மோத உள்ளன. இந்த தொடருக்காக அனைத்து வீரர்களும் தீவிரமாக தயாராகி வருகின்றனர்.

இந்நிலையில், இந்த தொடருக்கான கொல்கத்தா நைட் ரைடர்ஸ் அணியின் கேப்டன் ஸ்ரேயஸ் ஐயர் காயம் காரணமாக ஆஸ்திரேலியாவுக்கு எதிரான ஒருநாள் தொடரில் இருந்து விலகினார். இதனால் அவர் ஐபிஎல் தொடரில் விளையாடுவாரா? இல்லையா? என்பதில் சந்தேகம் நிலவுகிறது. அப்படி அவர் விளையாடவில்லை என்றால் யார் அணியின் கேப்டனாக நியமிக்கப்படுவார் என்ற எதிர்பார்ப்பும் அதிகரித்துள்ளது. 

இந்நிலையில், இந்த ஆண்டு ஐபிஎல் தொடருக்கான புதிய ஜெர்சியை கொல்கத்தா நைட் ரைடர்ஸ் அணி நிர்வாகம் இன்று வெளியிட்டுள்ளது. இதுகுறித்து கொல்கத்தா நைட் ரைடர்ஸ் அணி தங்களது அதிகாரப்பூர்வ ட்விட்டர் பக்கத்தில் காணொளி ஒன்றை வெளியிட்டுள்ளது. அந்த காணொளி தற்போது ரசிகர்கள் மத்தியிலும் வைரலாகி வருவது குறிப்பிடத்தக்கது.