அடுத்தடுத்து ஸ்டம்புகளை பறக்கவிட்ட டேவிட் வில்லி; வைரல் காணொளி!

ஐபிஎல் தொடரின் 16ஆவது சீசன் தற்போது தொடங்கி நடைபெற்று வருகிறது. ஐபிஎல் தொடரில் இன்று கொல்கத்தாவில் ஈடன் கார்டன்ஸ் மைதானத்தில் கொல்கத்தா நைட் ரைடர்ஸ் அணியும், ராயல் சேலஞ்சர்ஸ் பெங்களூர் அணியும் மோதுகிறது.

இதில் டாஸ் வென்று பெங்களூரு அணி முதலில் பவுலிங் தேர்வுசெய்துள்ளது. அதன்படி களமிறங்கிய கேகேஆர் அணிக்கு வெங்கடேஷ் ஐயர், ரஹ்மனுல்லா குர்பாஸ் தொடக்க வீரர்களாக களமிறங்கினர். இதில் ஒருமுனையில் குர்பாஸ் அதிரடியான ஆட்டத்தை வெளிப்படுத்தி அணியின் ஸ்கோரை உயர்த்த, மறுமுனையில் வெங்கடேஷ் ஐயர் நிதான ஆட்டத்தை வெளிப்படுத்தினார். 

இதையடுத்து ஆட்டத்தின் 4ஆவது ஓவரை வீசிய டேவிட் வில்லி 3 ரன்களை மட்டுமே எடுத்திருந்த வெங்கடேஷ் ஐயரை க்ளீன் போல்டாக்கி பெவிலியனுக்கு அனுப்பினார். இதையடுத்து களமிறங்கிய மந்தீப் சிங் சந்தித்த முதல் பந்திலேயே க்ளீன் போல்டாகி டேவிட் வில்லியிடம் தனது விக்கெட்டை பறிகொடுத்தார். 

அவரைத் தொடர்ந்து களமிறங்கிய கேப்டன் நிதிஷ் ராணாவும் டேவிட் வில்லி பந்துவீச்சை எதிர்கொள்ள தடுமாற, அந்த ஓவரில் ஒரு ரன்னை கூட எடுக்க முடியாமல் கேகேஆர் அணி தடுமாறியது. இந்நிலையில் டேவிட் வில்லி விக்கெட் வீழ்த்திய காணொளி சமூக வலைதளங்களில் வைரலாகி வருகிறது.