ஐபிஎல் 2023: டெல்லி கேப்பிட்டல்ஸை 144 ரன்களில் சுருட்டியது சன்ரைசர்ஸ் ஹைதராபாத்!

16ஆவது சீசன் ஐபிஎல் கிரிக்கெட் தொடர் விறுவிறுப்பாக நடைபெற்று வருகிறது. இதில் இன்றைய லீக் ஆட்டத்தில் சன்ரைசர்ஸ் ஹைதராபாத் - டெல்லி கேப்பிட்டல்ஸ் அணிகள் பலப்பரீட்சை நடத்தி வருகின்றன. இப்போட்டியில் டாஸ் வென்ற டெல்லி அணி முதலில் பேட்டிங் செய்வதாக அறிவித்தது. 

அதன்படி அந்த அணியின் தொடக்க வீரர்களாக கேப்டன் டேவிட் வார்னர் - பிலிப் சால்ட் இணை களமிறங்கியனர். இதில் பிலிப் சால்ட் சந்தித்த முதல் பந்திலேயே புவனேஷ்வர் குமாரிடம் விக்கெட்டை இழந்தார். இதையடுத்து வார்னருடன் மிட்செல் மார்ஷ் ஜோடிசேர்ந்தார்.

தொடக்கம் முதலே அதிரடியாக விளையாடிவந்த மிட்செல் மார்ஷ் 5 பவுண்டரிகளுடன் 25 ரன்களைச் சேர்த்த நிலையில் நடராஜன் பந்துவீச்சில் ஆட்டமிழந்தார். அதன்பின் அணியின் நம்பிக்கையாக பார்க்கப்பட்ட டேவிட்  வார்னரும் 21 ரன்களை எடுத்த நிலையில் வாஷிங்டன் சுந்தரிடம் விக்கெட்டை இழந்தார். 

அவரைத் தொடர்ந்து அதே ஓவரில் சர்ஃப்ராஸ் கான் 10 ரன்களிலும், ஆமான் கான் 4 ரன்களிலும் என வாஷிங்டன் பந்துவீச்சில் அடுத்தடுத்து விக்கெட்டுகளை இழந்தனர். இதையடுத்து ஜோடி சேர்ந்த மனீஷ் பாண்டே - அக்ஸர் படேல் இணை பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். 

பொறுப்பான ஆட்டத்தை வெளிப்படுத்தி வந்த அக்ஸர் படேல் 34 ரன்களைச் சேர்த்த நிலையில் புவனேஷ்வர் குமார் பந்துவீச்சில் போல்டாகி பெவிலியன் திரும்பினார். அவரைத் தொடர்ந்து மனீஷ் பாண்டேவும் 34 ரன்களைச் சேர்த்த நிலையில் ரன் அவுட்டாகினார். அதன்பின் களமிறங்கிய வீரர்களும் சோபிக்க தவறினர்.

இதனால் நிர்ணயிக்கப்பட்ட 20 ஓவர்கள் முடிவில் டெல்லி கேப்பிட்டல்ஸ் அணி 9 விக்கெட்டுகளை இழந்து 144 ரன்களை மட்டுமே எடுத்தது. ஹைதராபாத் அணி தரப்பில் அபாரமாக பந்துவீசிய வாஷிங்டன் சுந்தர் 3 விக்கெட்டுகளையும், புவனேஷ்வர் குமார் 2 விக்கெட்டுகளையும் கைப்பற்றினர்.