ஐபிஎல் தொடரின் 17ஆவது சீசன் வரும் 22ஆம் தேதி முதல் கோலாகலமாக தொடங்கவுள்ளது. மொத்தம் 10 அணிகள் பங்கேற்கும் இத்தொடரில் எந்த அணி கோப்பையை வெல்லும் என்ற எதிர்பார்ப்பு அதிகரித்துள்ளது. அந்த வகையில் ஒவ்வொரு அணியும் கோப்பையை வெல்வதற்காக தீவிரமாக பயிற்சியில் ஈடுபட்டுள்ளனர்.
அந்தவகையில் டெல்லி கேப்பிட்டல்ஸ் அணியும் தங்களது முதல் கோப்பையை வெல்வதற்காக தீவிரம் காட்டி வருகிறது. இதில் கடந்தாண்டு கார் விபத்தில் சிக்கி ஓராண்டுக்கு மேலாக கிரிக்கெட் விளையாடாமல் இருந்த ரிஷப் பந்த் மீண்டும் அணிக்கு திரும்பியதுன், அணியின் கேப்டனாகவும் செயல்படவுள்ளது அணிக்கு மிகப்பெரும் உத்வேகத்தைக் கொடுத்துள்ளது.
இந்நிலையில் நடப்பு சீசனுக்கான டெல்லி கேப்பிட்டல்ஸ் அணியில் இடம்பிடித்திருந்த இங்கிலாந்து அதிரடி வீரர் ஹாரி ப்ரூக் தனிப்பட்ட காரணங்களினால் ஐபிஎல் தொடரிலிருந்தும் விலகியுள்ளதாக தகவல் வெளியாகியுள்ளது. அதன்படி நடந்து முடிந்த வீரர்கள் ஏலத்தில் ஹாரி ப்ரூக்கை ரூ.4 கோடிக்கு டெல்லி கேப்பிட்டல்ஸ் அணி ஏலத்தில் எடுத்திருந்தது குறிப்பிடத்தக்கது.
ஆனால் தற்போது அவர் ஐபிஎல் தொடரிலிருந்து ஒட்டுமொத்தாக ஹாரி ப்ரூக் விலகியுள்ளதால் டெல்லி கேப்பிட்டல்ஸ் அணி பின்னடைவை சந்தித்துள்ளது. இதனால் அவருக்கான மாற்று வீரரை தேர்வு செய்யும் நிலைக்கு டெல்லி கேப்பிட்டல்ஸ் அணி தள்ளப்பட்டுள்ளது. இந்நிலையில் அவருக்கான மாற்று வீரராக யாரைத் தேர்வு செய்யும் என்பது குறித்து பார்க்கலாம்
ஆரோன் ஹார்டி
இந்தப் பட்டியலில் ஆஸ்திரேலியாவின் ஆரோன் ஹார்டி முதலிடத்தைப் பிடித்துள்ளார். டெல்லி அணியின் தலைமை பயிற்சியாளராக ரிக்கி பாண்டிங் இருப்பதால் நிச்சயம் அவர் ஆரோன் ஹார்டியை தெர்வு செய்ய அதிக வாய்ப்புள்ளது. ஆரோன் ஹார்டி மிடில் ஆர்டரில் நன்றாக பேட்டிங் செய்வதுடன், அவரால் பந்துவீசவும் முடியும் என்பதால் ஹாரி ப்ரூக்கிற்கான மாற்று வீரர்காக ஹார்டி இருப்பார் என எதிர்பார்க்கப்படுகிறது
இதுவரை 64 டி20 போட்டிகளில் விளையாடியுள்ள ஆரோன் ஹார்டி 132.32 ஸ்ட்ரைக் ரேட்டின் உதவியுடன் 1,138 ரன்களை சேர்த்துள்ளார்.இதில் 6 அரைசதங்களையும் பதிவுசெய்து அசத்தியுள்ளார். அவரது அதிகபட்ச ஸ்கோர் 90 ரன்களைச் சேர்த்து ஆட்டமிழக்காமல் இருந்ததாகும். மேலும் பந்துவீச்சில் அவர் 8.65 என்ற எக்கனாமியில் 31 விக்கெட்டுகளை வீழ்த்தியுள்ளார்.
ஜேக் ஃப்ரேசர் மெக்கூர்க்
நடப்பு ஐபிஎல் தொடரில் ஹாரி புரூக்கிற்கு மாற்றாக டெல்லி கேப்பிட்டல்ஸ் இலக்கு வைக்கக்கூடிய வீரர்களில் ஜேக் ஃப்ரேசர்-மெக்குர்க்கும் ஒருவர். மேலும் மெக்கூர்க் ஏற்கனவே டெல்லி கேப்பிட்டல்ஸின் ஐஎல்டி20 அணியான துபாய் கேப்பிட்டல்ஸ் அணிக்காக விளையாடியுள்ளார். மேலும் இவர் கடந்த ஆண்டு உள்ளூர் போட்டிகளில் 29 பந்துகளில் சதம் அடித்தும் சாதன் படைத்துள்ளார். இவரால் டாப் ஆர்டரில் பேட்டிங் செய்வதுடன், மிடில் ஆர்டரிலும் பேட் செய்ய முடியும். இதுவரை 37 டி20 போட்டிகளில் விளையாடியுள்ள அவர் 133.54 ஸ்ட்ரைக் ரேட்டின் உதவியுடன் 645 ரன்களை சேர்த்துள்ளார்.
மார்க் சாப்மேன்
டெல்லி கேபிட்டல்ஸ் அணி தங்களது பேட்டிங் ஆர்டரை வலுப்படுத்த நினைத்தால் அதற்கு சரியான தேர்வாக நியூசிலாந்தின் மார்க் சாப்மேன் இருப்பார். ஏனெனில் கடந்த ஆண்டின் சிறந்த டி20 கிரிக்கெட் வீரர்களில் மார்க் சாப்மேன் ஒருவர். அவர் தனது அதிரடியான ஆட்டத்தின் மூலம் நியூசிலாந்தை பல போட்டிகளில் வெற்றி பெற செய்துள்ளார். இது தவிர, தேவைப்பட்டால் அவரால பந்துவீசவும் முடியும் என்பது கூடுதல் சிறப்பம்சமாக பார்க்கப்படுகிறது. நியூசிலாந்து அணிக்காக 70 சர்வதேச டி20 போட்டிகளில் விளையாடியுள்ள மார்க் சாப்மேன், ஒரு சதம், 7 அரைசதங்கள் என 1,418 ரன்களை குவித்துள்ளார் என்பது குறிப்பிடத்தக்கது.