ஐபிஎல் திருவிழாவின் 17ஆவது சீசன் வரும் மார்ச் 22ஆம் தேதி முதல் கோலாகலமாக தொடங்கவுள்ளது. மொத்தம் 10 அணிகள் பங்கேற்கும் இத்தொடரில் எந்த அணி கோப்பையை வென்று சாம்பியன் பட்டத்தை வெல்லும் என்ற எதிர்பார்ப்புகள் ரசிகர்கள் மத்தியில் தற்போதிலிருந்தே தொடங்கிவிட்டன. மேலும் இத்தொடர் தொடங்குவதற்கு இன்னும் 8 நாள்கள் மட்டுமே உள்ள நிலையில், அனைத்து அணிகளும் தீவிர பயிற்சியில் ஈடுபட்டு வருகின்றனர். அந்த வரிசையில் ஐபிஎல் தொடரில் இதுவரை இரண்டு முறை கோப்பையை வென்றுள்ள கொல்கத்தா நைட் ரைடர்ஸ் அணி மூன்றாவது முறையாக கோப்பையை வெல்லும் முனைப்புடன் இத்தொடரை எதிர்கொள்ளவுள்ளது. அந்த வகையில் ஸ்ரேயாஸ் ஐயர் தலைமையில் நடப்பு ஐபிஎல் சீசனை எதிர்கொள்ளவுள்ள கொல்கத்தா நைட் ரைடர்ஸ் அணியின் பலம், பலவீனம், அணி விவரம் மற்றும் போட்டி அட்டவணையை இப்பதிவில் விரிவாக பார்ப்போம்.
கொல்கத்தா நைட் ரைடர்ஸ்
கடந்த 2008ஆம் ஆண்டு இந்தியாவில் தொடங்கப்பட்ட ஐபிஎல் தொடரின் ஆரம்ப சீசனின் முதல் போட்டியிலேயே அதிரடியான ஆட்டத்தை வெளிப்படுத்தி இத்தொடரின் மீதான எதிர்பார்ப்புகளை எகிற செய்ததில் கொல்கத்தா நைட் ரைடர்ஸ் அணியின் பங்கு மிக முக்கியமானது. காரணம் ஐபிஎல் தொடரின் முதல் போட்டியிலேயே கேகேஆர் அணிக்காக் விளையாடிய பிரண்டன் மெக்கல்லம் சதமடித்து அசத்தியதுடன், 73 பந்துகளில் 10 பவுண்டரி, 13 சிக்சர்கள் என 158 ரன்களை குவித்து அசத்தியதை யாராலும் அவ்வளவு எளிதில் மறந்துவிட முடியாது. ஆனாலும் அந்த அணியில் ஐபிஎல் தொடரின் முதல் மூன்று சீசன்களில் பிளே ஆஃப் சுற்றுக்கு முன்னேற முடியவில்லை. அதன்பின் அணியின் கேப்டனாக பொறுப்பை ஏற்ற கௌதம் கம்பீர் தலைமையில் முதல் முறையாக பிளே ஆஃப் சுற்றுக்கு முன்னேறி ஆசத்தினாலும், அத்தொடரில் கேகேஆர் அணியால் கோப்பையை கைப்பற்ற முடியவில்லை.
ஆனால் அதன்பின் நடைபெற்ற ஐபிஎல் சீசனில் கம்பீர் தலைமையில் முதல் முறையாக கோப்பையை வென்ற கேகேஆர் அணி, மீண்டும் 2014ஆம் ஆண்டும் சாம்பியன் பட்டத்தைக் கைப்பற்றி அசத்தியது. இதனால் கேகேஆர் அணியின் மீதான எதிர்பார்ப்புகளும் அடுத்தடுத சீசன்களில் அதிகரித்திருந்தது. ரசிகர்களின் எதிர்பார்ப்புகளை பூர்த்தி செய்யும் வகையில் அடுத்தடுத்த சீசன்களில் பிளே ஆஃப் சுற்றுக்கு முன்னேறிய கேகேஆர் அணியால் மேற்கொண்டு ஐபிஎல் தொடரில் கோப்பையை கைப்பற்ற முடியவில்லை. அதிலும் குறிப்பாக கடந்த 5 சீசன்களில் ஒரு முறை மட்டுமே கேகார் அணியால் பிளே ஆஃப் சுற்றுக்கு முன்னேற முடிந்தது ரசிகர்களுக்கு ஏமாற்றத்தை கொடுத்துள்ளது. இருப்பினும் நடப்பு சீசன் ஐபிஎல் தொடரில் கேகேஆர் அணி மீண்டும் சிறப்பாக செயல்பட்டு மூன்றாவது முறையாக கோப்பையை வெல்லும் என எதிர்பார்க்கப்படுகிறது.
கொல்கத்தா நைட் ரைடர்ஸ் அணியின் பலம்
இந்தாண்டு ஐபிஎல் தொடரில் கோப்பையை வெல்லும் அணிகளில் ஒன்றாக கொல்கத்தா நைட் ரைடர்ஸ் அணியும் கணிக்கப்பட்டுள்ளது. ஏனெனில் கேகேஆர் அணிக்காக இருமுறை கோப்பையை வென்று கொடுத்த கௌதம் கம்பீர் நடப்பு ஐபிஎல் சீசனில் கேகேஆர் அணியின் ஆலோசகராக நியமிக்கப்பட்டுள்ளது அணிக்கு மிகப்பெரும் பலமாக பார்க்கப்படுகிறது. அவரது அலோசனையின் கீழ் கேகேஆர் அணியானது சிறப்பான செயல்பாடுகளை கொடுக்கும் என ரசிகர்கள் எதிர்பார்க்கின்றனர்.
மேலும் கடந்த 2016ஆம் ஆண்டுக்கு பிறகு ஐபிஎல் தொடரில் விளையாட விருப்பம் தெரிவித்து ஏலத்தில் பங்கேற்ற ஆஸ்திரேலிய வேகப்பந்து வீச்சாளர் மிட்செல் ஸ்டார்க்கை ரூ.24.50 கோடிக்கு ஏலத்தில் எடுத்து கேகேஆர் அணி அனைவரையும் ஆச்சரியத்தில் ஆழ்த்தியது. இதனால் அந்த அணியின் வேகப்பந்து வீச்சு வலிமை வாய்ந்ததாக பார்க்கப்படுகிறது. காரணம் தேவையான நேரங்களில் யார்க்கர் பந்துகளை துள்ளியமாக வீசும் திறன் படைத்த மிட்செல் ஸ்டார்க், தனது ஓவரின் மூலம் ஆட்டத்தை மாற்றும் திறன் கொண்டவராகவும் கருதப்படுகிறார். இது அந்த அணிக்கு கூடுதல் பலமாக பார்க்கப்படுகிறது.
இதைத்தவிர்த்து கடந்த சீசனை காயம் காரணமாக தவறவிட்ட ஸ்ரேயாஸ் ஐயர் தற்போது மீண்டும் அணிக்கு திரும்பியதுடன் அணியின் கேப்டனாகவும் நியமிக்கப்பட்டுள்ளது கூடுதல் பலத்தை வழங்கியுள்ளது. அவருடன் பேட்டிங்கில் ரஹ்மனுல்லா குர்பாஸ், வெங்கடேஷ் ஐயர், ஆண்ட்ரே ரஸல், ரிங்கு சிங், நிதீஷ் ராணா போன்ற அதிரடி வீரர்கள் அணியில் இருப்பது மிகப்பெரும் பலம். ஏனெனில் இவர்களில் ஒருவர் களத்தில் இருந்தாலும் நிச்சயம் எவ்வளவு பெரிய இலக்கையையும் கேகேஆர் அணி எளிதில் எட்டும் என கணக்கிக்கபடுகிறது.
அதேசமயம் பந்துவீச்சில் சுனில் நரைன், வருண் சக்ரவர்த்தி போன்ற மாயாஜால சுழற்பந்து வீச்சாளர்களுடன் முஜீப் உர் ரஹ்மானும் இணைந்திருப்பது எதிரணி பேட்டர்களுக்கு பெரும் சிக்கலை ஏற்படுத்தும் என கருதப்படுகிறது. இவர்களுடன் மிட்செல் ஸ்டார்க், ஆண்ட்ரே ரஸல், சேட்டன் சக்காரியா, கஸ் அட்கின்சன் போன்ற வேகப்பந்து வீச்சாளர்கள் இருப்பது அணிக்கு பெரும் உத்வேகத்தை கொடுக்கும் என எதிர்பார்க்கப்படுகிறது. ஒட்டுமொத்தமாக கேகேஆர் அணியின் பேட்டிங், பந்துவீச்சு கூட்டணி வலிமை வாய்ந்ததாக பார்க்கப்படுகிறது.
கொல்கத்தா நைட் ரைடர்ஸ் அணியின் பலவீனம்
இந்தண்டு ஐபிஎல் சீசனில் கேகேஆர் அணி பலம் வாய்ந்த அணியாக பார்க்கப்பட்டாலும், அந்த அணியின் கேப்டன் ஸ்ரேயாஸ் ஐயர் சமீபத்தில் ரஞ்சி கோப்பை தொடரின் போது காயமடைந்துள்ளது அணிக்கு பின்னடைவாக பார்க்கப்படுகிறது. ஏனெனில் ஏற்கெனவே அவர் கடந்தாண்டு ஐபிஎல் தொடரை காயம் காரணமாக தவறவிட்டார். இந்நிலையில் அவர் தற்போது மீண்டும் காயத்தை சந்தித்துள்ளதால் நடப்பு ஐபிஎல் தொடரில் முழமையாக பங்கேற்பாரா என்ற சந்தேகம் ரசிகர்களிடம் எழுந்துள்ளது.
அதைத்தொடர்ந்து அதிரடி தொடக்க வீரர் ஜேசன் ராய் தனிப்பட்ட காரணங்களினால் இந்தாண்டு ஐபிஎல் தொடரிலிருந்து விலகியுள்ளது கேகேஆர் அணியின் பலவீனமாக பார்க்கப்படுகிறது. அவருக்கு மாற்று வீரராக சேர்க்கப்பட்டுள்ள பில் சால்ட் சர்வதேச கிரிக்கெட்டில் அசத்தி இருந்தாலும் ஐபிஎல் தொடரில் பெரிதளவில் சோபிக்கவில்லை என்பதால், ஜேசன் ராயின் இடத்தை யார் நிரப்புவார் என்ற சந்தேகம் உள்ளது. அதிலும் குறிப்பாக ரஹ்மனுல்லா குர்பாஸ் அணியில் இருக்கும் பட்சத்தில் பில் சால்ட் பிளேயிங் லெவனில் இடம்பிடிப்பது சந்தேகம் தான்.
இதையடுத்து அணியின் பந்துவீச்சைப் பொறுத்தவரையில் கேகேஆர் அணி வலிமையானதாக பார்க்கப்பட்டாலும், அணியின் வேகப்பந்து வீச்சாளர்களில் மிட்செல் ஸ்டார்க், சேட்டன் சகாரியா, கஸ் அட்கின்சன் ஆகியோரைத் தாண்டி வேறு நட்சத்திர பந்துவீச்சாளர்கள் இல்லாதது அணியின் பலவீனமாக பார்க்கப்படுகிறது. ஏனெனில் இவர்களில் யாரேனும் காய மடைந்தால் அவர்களது இடத்தை எந்த பந்துவீச்சாளார் நிரப்புவார் என்பது கேள்விக்குறிதான். இருப்பினும் இச்சவால்களை எதிர்கொண்டு கேகேஆர் அணி இந்த சீசனில் எப்பது செயல்படும் என்பதை பொறுத்திருந்து தான் பார்க்க வேண்டும்.
கொல்கத்தா நைட் ரைடர்ஸ் ஐபிஎல் வரலாறு
- 2008 - லீக் சுற்று
- 2009 - லீக் சுற்று
- 2010 - லீக் சுற்று
- 2011 - பிளே ஆஃப் சுற்று
- 2012 - சாம்பியன்
- 2013 - லீக் சுற்று
- 2014 - சாம்பியன்
- 2015 - லீக் சுற்று
- 2016 - பிளே ஆஃப் சுற்று
- 2017 - பிளே ஆஃப் சுற்று
- 2018 - பிளே ஆஃப் சுற்று
- 2019 - லீக் சுற்று
- 2020 - லீக் சுற்று
- 2021 - பிளே ஆஃப் சுற்று
- 2022 - லீக் சுற்று
- 2023 - லீக் சுற்று
கொல்கத்தா நைட் ரைடர்ஸ் அணி
நிதிஷ் ராணா, ரிங்கு சிங், ரஹ்மானுல்லா குர்பாஸ், ஸ்ரேயாஸ் ஐயர் (கேப்டன்), பில் சால்ட், சுனில் நரைன், சுயாஷ் சர்மா, அனுகுல் ராய், ஆண்ட்ரே ரசல், வெங்கடேஷ் ஐயர், ஹர்ஷித் ராணா, வைபவ் அரோரா, வருண் சக்ரவர்த்தி, கேஎஸ் பாரத், சேத்தன் சகாரியா, மிட்செல் ஸ்டார்க், அங்கிரிஷ் ரகுவன்ஷி, ரமன்தீப் சிங், ஷெர்ஃபேன் ரூதர்ஃபோர்ட், மணீஷ் பாண்டே, முஜீப் உர் ரஹ்மான், துஷ்மந்த சமீரா, சாகிப் ஹுசைன்.
கொல்கத்தா நைட் ரைடர்ஸ் போட்டி அட்டவணை
இந்தியாவில் நடப்பு ஆண்டு பொதுத்தேர்தல் நடைபெறவுள்ளதால் இத்தொடருக்கான போட்டி அட்டவணை வெளியிடுவது தாமதம் ஏற்பட்டிருந்தது. இதையடுத்து இத்தொடரின் முதல் இரண்டு வாரங்களுக்கான போட்டி அட்டவணையை மட்டும் பிசிசிஐ அறிவித்துள்ளது குறிப்பிடத்தக்கது.
மார்ச் 23 - கொல்கத்தா நைட் ரைடர்ஸ் vs சன்ரைசர்ஸ் ஹைதராபாத் - கொல்கத்தா
மார்ச் 29 - ராயல் சேலஞ்சர்ஸ் பெங்களூரு vs கொல்கத்தா நைட் ரைடர்ஸ் - பெங்களூரு
ஏப்ரம் 03 - டெல்லி கேப்பிட்டல்ஸ் vs கொல்கத்தா நைட் ரைடர்ஸ் - விசாகப்பட்டினம்