ஐபிஎல் 2024: தொடரிலிருந்து விலகிய லுங்கி இங்கிடி; மெக்குர்க்கை தேர்வு செய்த டெல்லி!

ஐபிஎல் தொடரின் 17ஆவது சீசன் வரும் 22ஆம் தேதி முதல் கோலாகலமாக தொடங்கவுள்ளது. மொத்தம் 10 அணிகள் பங்கேற்கும் இத்தொடரில் எந்த அணி கோப்பையை வெல்லும் என்ற எதிர்பார்ப்பு அதிகரித்துள்ளது. அந்த வகையில் ஒவ்வொரு அணியும் கோப்பையை வெல்வதற்காக தீவிரமாக பயிற்சியில் ஈடுபட்டுள்ளனர். 

அந்தவகையில் டெல்லி கேப்பிட்டல்ஸ் அணியும் தங்களது முதல் கோப்பையை வெல்வதற்காக தீவிரம் காட்டி வருகிறது. இந்நிலையில் நடப்பு சீசனுக்கான டெல்லி கேப்பிட்டல்ஸ் அணியில் இடம்பிடித்திருந்த இங்கிலாந்து அதிரடி வீரர் ஹாரி ப்ரூக் தனிப்பட்ட காரணங்களினால் ஐபிஎல் தொடரிலிருந்தும் விலகியுள்ளது அந்த அணிக்கு பின்னடைவை ஏற்படுத்தியுள்ளது. இதனால் அவருக்கு மாற்று வீரரைத் தேர்வு செய்ய டெல்லி அணி ஆயத்தமாகி வருகிறது.

இந்நிலையில் டெல்லி கேப்பிட்டல்ஸ் அணியில் இடம்பிடித்திருந்த நட்சத்திர வேகப்பந்து வீச்சாளர் லுங்கி இங்கிடி காயம் காரணமாக நடப்பு சீசன் ஐபிஎல் தொடரில் இருந்து விலகியுள்ளார். அணியின் முக்கிய வீரராக இருந்துவரும் லுங்கி இங்கிடி நடப்பு சீசனில் இருந்து விலகியுள்ளது அணிக்கு பெரும் பின்னடைவாக பார்க்கப்படுகிறது. 

ஏனெனில் இதுவரை 14 ஐபிஎல் போட்டிகளில் விளையாடியுள்ள லுங்கி இங்கிடி 25 விக்கெட்டுகளை வீழ்த்தி அசத்தியுள்ளா. இதனால் அவரது இந்த முடிவு டெல்லி அணிக்கு மேலும் பின்னடைவை ஏற்படுத்தியுள்ளது. இந்நிலையில் லுங்கி இங்கிடிக்கு மாற்று வீரராக ஆஸ்திரேலிய அணியின் ஜேக் ஃபிரேசர் மெக்கூர்க்கை டெல்லி கேப்பிட்டல்ஸ் அணி ஒப்பந்தம் செய்துள்ளது. 

மேலும் மெக்கூர்க் ஏற்கனவே டெல்லி கேப்பிட்டல்ஸின் ஐஎல்டி20 அணியான துபாய் கேப்பிட்டல்ஸ் அணிக்காக விளையாடியுள்ளார். மேலும் இவர் கடந்த ஆண்டு உள்ளூர் போட்டிகளில் 29 பந்துகளில் சதம் அடித்தும் சாதன் படைத்துள்ளார். இவரால் டாப் ஆர்டரில் பேட்டிங் செய்வதுடன், மிடில் ஆர்டரிலும் பேட் செய்ய முடியும். இதுவரை 37 டி20 போட்டிகளில் விளையாடியுள்ள அவர் 133.54 ஸ்ட்ரைக் ரேட்டின் உதவியுடன் 645 ரன்களை சேர்த்துள்ளார்.