சச்சின், ருதுராஜ் சாதனையை முறியடித்த ரஜத் படிதார்!

பெங்களூருவில் உள்ள எம் சின்னசாமி கிரிக்கெட் மைதானத்தில் நேற்று நடைபெற்ற ஐபிஎல் லீக் போட்டியில் ராயல் சேலஞ்சர்ஸ் பெங்களூரு மற்றும் பஞ்சாப் கிங்ஸ் அணிகள் பலப்பரீட்சை நடத்தின. மழை காரணமாக 14 ஓவர்கள் கொண்ட போட்டியாக நடைபெற்ற நிலையில், டாஸ் வென்ற பஞ்சாப் கிங்ஸ் முதலில் பந்துவீசுவதாக அறிவித்தது. 

அதன்படி களமிறங்கிய ஆர்சிபி அணியில் பேட்டர்கள் அடுத்தடுத்து விக்கெட்டுகளை இழந்து நடையைக் கட்டினர். அதிலும் இறுதிவரை ஆட்டமிழக்காமல் இருந்த டிம் டேவிட் அரைசதம் கடந்தது 50 ரன்களையும், அணியின் கேப்டன் ராஜத் படிதார் 23 ரன்களையும் சேர்த்ததை தவிர்த்து மற்ற அனைத்து வீரர்களும் அடுத்தடுத்து ஒற்றையிலக்க ரன்களில் விக்கெட்டை இழந்து ஏமாற்றமளித்தனர். இதன்மூலம் ஆர்சிபி அணி 14 ஓவர்கள் முடிவில் 9 விக்கெட்டுகளை இழந்து 95 ரன்களை மட்டுமே சேர்த்தது.

அதன்பின் இலக்கை நோக்கி களமிறங்கிய பஞ்சாப் கிங்ஸ் அணியில் பிரியன்ஷ் ஆர்யா 16, பிரப்ஷிம்ரன் சிங் 13, ஸ்ரேயாஸ் ஐயர் 7, ஜோஷ் இங்கிலிஸ் 14, ஷஷாங்க் சிங் ஒரு ரன்னிலும் என விக்கெட்டுகளை இழந்தாலும் நேஹல் வதேரா 33 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் பஞ்சாப் கிங்ஸ் அணியானது 12.1 ஓவர்களில் இலக்கை எட்டியதுடன் 5 விக்கெட்டுகள் வித்தியாசத்தில் ராயல் சேலஞ்சர்ஸ் பெங்களூரு அணியை வீழ்த்தி வெற்றிபெற்றது. 

இப்போட்டியில் ஆர்சிபி அணி தோல்வியைத் தழுவினாலும் அந்த அணி கேப்டன் ராஜத் படிதார் சிறப்பு சாதனை ஒன்றை படித்துள்ளார். அதன்படி இப்போட்டியில் அவர் 23 ரன்களைச் சேர்த்ததன் மூலம் ஐபிஎல் தொடரில் தன்னுடைய 1000 ரன்களைப் பூர்த்தி செய்து அசத்தியுள்ளார். மேற்கொண்டு அவர் ஐபிஎல் தொடரில் அதிவேகமாக 1000 ரன்களைக் பூர்த்தி செய்த இரண்டாவது வீரர் எனும் சச்சின் டெண்டுல்கரின் சாதனையையும் ரஜத் பட்டிதார் முறியடித்துள்ளார்.

முன்னதாக இந்திய அணியின் முன்னாள் ஜாம்பவான் சச்சின் டெண்டுல்கர் மற்றும் ருதுராஜ் கெய்க்வாட் ஆகியோர் தலா 31 இன்னிங்ஸ்களில் 1000 ரன்களை கடந்து இரண்டாம் இடத்தில் இருந்த நிலையில், தற்போது ரஜத் பட்டிதார் 30 இன்னிங்ஸ்களிலேயே 1000 ரன்களை பூர்த்தி செய்து இரண்டாம் இடத்தைப் பிடித்துள்ளார். இந்த பட்டியலில் தமிழக வீரர் சாய் சுதர்ஷன் 25 இன்னிங்ஸ்களில் 1000 ரன்களைப் பூர்த்தி செய்து முதலிடத்தில் உள்ளது குறிப்பிடத்தக்கது. 

Also Read: Funding To Save Test Cricket

ஐபிஎல் தொடரில் அதிவேகமாக 1000 ரன்கள்

• 25 இன்னிங்ஸ் - சாய் சுதர்ஷன்
• 30 இன்னிங்ஸ் - ரஜத் படிதர்
• 31 இன்னிங்ஸ் - ரிதுராஜ் கெய்க்வாட்
• 31 இன்னிங்ஸ் - சச்சின் டெண்டுல்கர்
• 33 இன்னிங்ஸ் - திலக் வர்மா