இரு வேறு நாடுகளுக்காக சதமடித்து தனித்து சாதனை பட்டியலில் இணைந்த ஜோ பர்ன்ஸ்

ஐசிசி ஆடவர் டி20 உலகக்கோப்பை தொடரின் அடுத்த பதிப்பானது 2026ஆம் ஆண்டு இந்தியா மற்றும் இலங்கையில் நடைபெறவுள்ளது. இந்நிலையில் இத்தொடருக்கான ஐரோப்பா கண்டத்திலுள்ள அணிகளுக்கான தகுதிச்சுற்று போட்டிகள் நடைபெற்று வருகின்றன. அந்தவகையில் இத்தொடரின் இறுதிப்போட்டியானது நேற்று நடைபெற்றது. இதில் இத்தாலி மற்றும் ருமேனியா அணிகள் பலப்பரீட்சை நடத்தின. இப்போட்டியில் டாஸ் வென்ற ருமேனியா அணி முதலில் பந்துவீசுவதாக அறிவித்தது. 

அதன்படி களமிறங்கிய இத்தாலி அணியானது ஜோ பர்ன்ஸ் மற்றும் ஜஸ்டின் மொஸ்கா ஆகியோரது அதிரடியான ஆட்டத்தின் மூலம் 20 ஓவர்கள் முடிவில் 4 விக்கெட்டுகளை இழந்து 244 ரன்களைக் குவித்திருந்தது. இதில் அதிரடியான ஆட்டத்தை வெளிப்படுத்திய ஜோ பர்ன்ஸ் 12 பவுண்டரி, 4 சிக்ஸர் என 108 ரன்களையும், ஜஸ்டின் மொஸ்கா 9 பவுண்டரி, 4 சிக்ஸர்கள் என 72 ரன்களையும் சேர்த்தனர். 

அதன்பின் இமாலய இலக்கை நோக்கி விளையாடிய ருமேனியா அணி பேட்டர்கள் இத்தாலி அணியின் பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினர். இதன் காரணமாக அந்த அணி 17.2 ஓவர்களிலேயே அனைத்து விக்கெட்டுகளையும் இழந்ததுடன், 84 ரன்களுக்கு ஆல் அவுட்டானது. இதன் மூலம் இத்தாலி அணி 160 ரன்கள் வித்தியாசத்தில் இமாலய வெற்றியைப் பதிவுசெய்து அசத்தியது. 

இந்நிலையில் இப்போட்டியில் சதமடித்ததன் மூலம் இத்தாலி அணிக்காக விளையாடிய ஜோ பர்ன்ஸ் தனித்துவமான சாதனை ஒன்றையும் படைத்துள்ளார். அதன்படி, ஆஸ்திரேலிய அணிக்காக 2014ஆம் ஆண்டு அறிமுகமான ஜோ பர்ன்ஸ் 23 டெஸ்ட் போட்டிகளில் விளையாடி 4 சதம், 7 அரைசதங்கள் என 1442 ரன்களைக் குவித்துள்ளார். இதனையடுத்து அவர் தற்போது ஆஸ்திரேலிய அணியிலிருந்து விலகி இத்தாலி அணிக்காக விளையாடி வருகிறது. 

அந்தவகையில் தற்போது இத்தாலி அணிக்காக சர்வதேச டி20 போட்டியில் சதமடித்து அசத்தியுள்ளார். இதன்மூலம் இருவேறு நாடுகளுக்காக சர்வதேச கிரிக்கெட் போட்டிகளில் விளையாடி சதமடித்த 6ஆவது வீரர் எனும் சாதனையை ஜோ பர்ன்ஸ் படைத்துள்ளார். இவருக்கு முன், கெப்லர் வெசல்ஸ், எட் ஜாய்ஸ், மார்க் சாப்மேன், ஈயோன் மோர்கன் மற்றும் கேரி பேலன்ஸ் ஆகியோர் மட்டுமே இந்த சாதனையை படைத்துள்ளனர் என்பது குறிப்பிடத்தக்கது.