115 மீட்டர் சிக்ஸரை விளாசி மிரளவைத்த ஜோஸ் பட்லர் - வைரலாகும் காணொளி!

வெஸ்ட் இண்டீஸ் - இங்கிலாந்து அணிகளுக்கு இடையேயான இரண்டாவது டி20 போட்டியானது இன்று பார்படாஸில் உள்ள கென்ஸிங்டன் ஓவல் கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற இங்கிலாந்து அணி முதலில் பந்துவீசுவதாக அறிவித்து வெஸ்ட் இண்டீஸை பேட்டிங் செய்ய அழைத்தது. 

அதன்படி, முதலில் பேட்டிங் செய்த வெஸ்ட் இண்டீஸ் அணி வீரர்களால் இங்கிலாந்து அணியின் பந்துவீச்சுக்கு ஈடுகொடுக்க முடியாமல் விக்கெட்டுகளை இழந்ததால், நிர்ணயிக்கப்பட்ட 20 ஓவர்கள் முடிவில் 8 விக்கெட்டுகளை இழந்து 158 ரன்களை மட்டுமே எடுத்தது. அந்த அணியில் அதிகபட்சமாக கேப்டன் ரோவ்மன் பாவெல் 43 ரன்களைச் சேர்த்தார். இங்கிலாந்து தரப்பில் ஷாகிப் மஹ்மூத், டேன் மௌஸ்லி, லியாம் லிவிங்ஸ்டோன் ஆகியோர் தலா 2 விக்கெட்டுகளை வீழ்த்தினர்.

இதையடுத்து, 159 ரன்களை எடுத்தால் வெற்றி என்ற இலக்குடன் இங்கிலாந்து களமிறங்கிய நிலையில், கடந்த போட்டியில் சதமடித்து அசத்திய பில் சால்ட் இந்த போட்டியின் முதல் பந்திலேயே விக்கெட்டை இழந்தார். பின்னர் ஜோடி சேர்ந்த வில் ஜேக்ஸ் மற்றும் கேப்டன் ஜோஸ் பட்லர் இணை அதிரடியான ஆட்டத்தை வெளிப்படுத்தியதுடன் அடுத்தடுத்து பவுண்டரிகளை விளாசி அணியின் ஸ்கோரை உயர்த்தினர். இதில் அபாரமாக விளையாடிய பட்லர் தனது அரைசதத்தைப் பதிவுசெய்தார். 

இருவரும் இணைந்து இரண்டாவது விக்கெட்டிற்கு 129 ரன்கள் பார்ட்னர்ஷிப் அமைத்த நிலையில், வில் ஜேக்ஸ் 32 ரன்களிலும், சதமடிப்பார் என எதிர்பார்க்கப்பட்ட ஜோஸ் பட்லர் 83 ரன்களிலும் என விக்கெட்டை இழந்தனர். அதன்பின் இறுதிவரை ஆட்டமிழக்காமல் இருந்த லியாம் லிவிங்ஸ்டோன் 23 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் இங்கிலாந்து அணி 14.5 ஓவர்களில் இலக்கை எட்டியதுடன் 7 விக்கெட் வித்தியாசத்தில் வெற்றிபெற்று அசத்தியுள்ளது. 

இந்த வெற்றியின் மூலம் 5 போட்டிகள் கொண்ட டி20 தொடரில் இங்கிலாந்து அணி 2-0 என்ற கணக்கில் தொடரில் முன்னிலை வகிக்கிறது. மேலும் இப்போட்டியில் அதிரடியாக விளையாடிய இங்கிலாந்து அணி கேடன் ஜோஸ் பட்லர் ஆட்டநாயகன் விருதை வென்றார். இந்நிலையில் இந்த போட்டியில் இங்கிலாந்து அணி கேப்டன் ஜோஸ் பட்லர் அடித்த இமாலய சிக்ஸர் குறித்த காணொளி ஒன்று தற்சமயம் இணையத்தில் வைரலாகி வருகிறது. 

Also Read: Funding To Save Test Cricket

அந்தவகையில், இன்னிங்ஸின் 9ஆவது ஓவரை வெஸ்ட் இண்டீஸ் சுழற்பந்துவீச்சாளர் குடகேஷ் மோட்டி வீசிய நிலையில், அந்த ஓவரின் மூன்றாவது பந்தில் ஜோஸ் பட்லர் மிட் ஆன் திசையை நோக்கி சிக்ஸரை பறக்கவிட்டார். அந்த சிக்ஸரானது மைதானத்திற்கு வெளியே சென்றதுடன், 115 மீட்டர் தொலைவுக்கும் சென்றது. ஜோஸ் பாட்லர் விளாசிய இந்த இமாலய சிக்ஸரானது ரசிகர்களின் கவனத்தை ஈர்த்து வருகிறது.