WI vs AUS, 2nd T20I: இங்கிலிஸ், க்ரீன் அதிரடியில் விண்டீஸை வீழ்த்தியது ஆஸ்திரேலியா!

WI vs AUS, 2nd ODI: கேமரூன் க்ரீன் மற்றும் ஜோஷ் இங்கிலிஸ் ஆகியோரின் அதிரடியான ஆட்டத்தின் காரணமாக ஆஸ்திரேலிய அணி வெஸ்ட் இண்டீஸுக்கு எதிரான இரண்டாவது டி20 போட்டியிலும் வெற்றிபெற்று அசத்தியுள்ளது.

ஆஸ்திரேலிய அணி தற்சமயம் வெஸ்ட் இண்டீஸில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் விளையாடி வருகிறது. இதில் முதல் டி20 போட்டியில் ஆஸ்திரேலிய அணி வெற்றிபெற்று 1-0 என்ற கணக்கில் தொடரில் முன்னிலைப் பெற்றிருந்தது. இதையடுத்து வெஸ்ட் இண்டீஸ் - ஆஸ்திரேலிய அணிகளுக்கு இடையேயான இரண்டாவது டி20 போட்டி நேற்று சபினா பார்க் கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற ஆஸ்திரேலிய அணி முதலில் பந்துவீசுவதாக அறிவித்து வெஸ்ட் இண்டீஸை பேட்டிங் செய்ய அழைத்தது. 

அதன்படி களமிறங்கிய வெஸ்ட் இண்டீஸ் அணிக்கு பிராண்டன் கிங் அதிரடியான தொடக்கத்தைக் கொடுத்ததுடன் அரைசதம் கடந்தும் அசத்தினார். இதில் 3 பவுண்டரி, 4 சிக்ஸர்களுடன் பிராண்டன் கிங் விக்கெட்டை இழக்க, மற்றொரு தொடக்க வீரரான ஷாய் ஹோப் 9 ரன்களுக்கு நடையைக் கட்டினார். அதன்பின் களமிறங்கிய ஷிம்ரான் ஹெட்மையர் 14 ரன்னிலும், ரோஸ்டன் சேஸ் 16 ரன்னிலும், ரோவ்மன் பாவெல் 12 ரன்னிலும், ஷெர்ஃபேன் ரூதர்ஃபோர்ட் ரன்கள் ஏதுமின்றியும், ஜேசன் ஹோல்டர் ஒரு ரன்னிலும் என அடுத்தடுத்து விக்கெட்டுகளை இழந்து ஏமாற்றமளித்தனர்.

மேற்கொண்டு தனது கடைசி சர்வதேச போட்டியில் விளையாடிய ஆண்ட்ரே  ரஸல் 2 பவுண்டரி, 4 சிக்ஸர்கள் என 36 ரன்களைச் சேர்த்து விக்கெட்டை இழந்தார். இதனால் வெஸ்ட் இண்டீஸ் அணி 20 ஓவர்கள் முடிவில் 8 விக்கெட்டுகள் இழப்பிற்கு 172 ரன்களைச் சேர்த்தது. ஆஸ்திரேலிய அணி தரப்பில் ஆடம் ஸாம்பா 3 விக்கெட்டுகளையும், நாதன் எல்லிஸ், கிளென் மேக்ஸ்வெல் தலா 2 விக்கெட்டுகளை கைப்பற்றினர். இதையடுத்து இலக்கை நோக்கி விளையாடிய ஆதிரேலிய அணிக்கு கேப்டன் மிட்செல் மார்ஷ் மற்றும் கிளென் மேக்ஸ்வெல் இணை தொடக்கம் கொடுத்தனர். 

இதில் மேக்ஸ்வெல் ஒரு பவுண்டரி, ஒரு சிக்ஸர் என 12 ரன்களுக்கும், மிட்செல் மார்ஷ் ஒரு பவுண்டரி, 2 சிக்ஸர்களுடன் 21 ரன்களுக்கும் என ஆட்டமிழந்தனர். பின்னர் ஜோடி சேர்ந்த கேமரூன் க்ரீன் - ஜோஷ் இங்கிலிஸ் இணை அதிரடியாக விளையாடி அணியின் ஸ்கோரை உயர்த்தினர். இதில் இருவரும் அரைசதம் கடந்து அசத்தியதுடன் இறுதிவரை ஆட்டமிழக்காமல் இருந்த ஜோஷ் இங்கிலிஸ் 7 பவுண்டரி, 5 சிக்ஸர்களுடன் 78 ரன்களையும், கேமரூன் க்ரீன் 3 பவுண்டரி, 4 சிக்ஸர்களுடன் 56 ரன்களையும் சேர்த்து அணிக்கு வெற்றியைத் தேடிக்கொடுத்தனர். 

Also Read: LIVE Cricket Score

இதன்மூலம் ஆஸ்திரேலிய அணி 15.2 ஓவர்களில் இலக்கை எட்டியதுடன் 8 விக்கெட் வித்தியாசத்தில் வெஸ்ட் இண்டீஸ் அணியை வீழ்த்தி வெற்றிபெற்றது. இந்த வெற்றியின் மூலம் ஐந்து போட்டிகள் கொண்ட டி20 தொடரில் ஆஸ்திரேலிய அணி 2-0 என்ற கணக்கில் முன்னிலைப் பெற்றுள்ளது. இப்போட்டியில் அதிரடியான ஆட்டத்தை வெளிப்படுத்திய ஜோஷ் இங்கிலிஸ் ஆட்டநாயகன் விருதை வென்றுள்ளார்.