பாகிஸ்தான், ஐக்கிய அரபு அமீரகத்தில் நடைபெற்று வரும் ஐசிசி ஆடவர் சாம்பியன்ஸ் கோப்பை தொடரின் இறுதிப்போட்டி மார்ச் 09ஆம் தேதி துபாய் சர்வதேச கிரிக்கெட் மைதானத்தில் நடைபெறவுள்ளது. இந்த இறுதிப்போட்டியில் இந்தியா மற்றும் நியூசிலாந்து அணிகள் பலப்பரீட்சை நடத்தவுள்ளன.
இப்போட்டிக்காக இரு அணி வீரர்களும் தீவிரமாக தயாராகி வருகின்றனர். இதில் இந்திய அணி ஏற்கெனவே கடந்த சாம்பியன்ஸ் கோப்பை தொடரின் இறுதிப்போட்டி வரை முன்னேறி கோப்பை நழுவவிட்டதால், இம்முறை கோப்பையை வென்று அசததும் எதிர்பார்ப்புகள் அதிகரித்துள்ளன. இந்நிலையில் இப்போட்டிக்கு முன்னதாக நியூசிலாந்து அணி மிகப்பெரும் பின்னடைவை சந்தித்துள்ளது.
நியூசிலாந்து கிரிக்கெட் அணியின் அனுபவமிக்க வேகப்பந்து வீச்சாளர் மேட் ஹென்றி காயம் அடைந்துள்ளார். தென் ஆப்பிரிக்காவிற்கு எதிரான 2ஆவது அரையிறுதியில் ஹென்ரிச் கிளாசனின் கேட்ச்சைப் பிடிக்கும் போது அவரது வலது தோள்பட்டையில் காயம் ஏற்பட்டது. இந்நிலையில் அவரது காயம் தீவிரமடைந்துள்ளதாகவும், இதனால் அவர் இறுதிப்போட்டியில் இருந்து விலகும் அபாயம் ஏற்பட்டுள்ளதாகவும் தகவல்கள் வெளியாகியுள்ளன.
ஒருவேளை மேட் ஹென்றி இப்போட்டியை தவறவிடும் பட்சத்தில் ஆல் ரவுண்டர் நாதன் ஸ்மித் அல்லது வேகப்பந்து வீச்சாளர் ஜேக்கப் டஃபி ஆகியோரில் ஒருவர் பிளேயிங் லெவனில் சேர்க்கப்படலாம். நியூசிலாந்துக்காக நேதன் ஸ்மித் 7 ஒருநாள் போட்டிகளில் 7 விக்கெட்டுகளை வீழ்த்தியுள்ளார். ஜேக்கப் டஃபி 11 ஒருநாள் போட்டிகளில் 19 விக்கெட்டுகளை வீழ்த்தியுள்ளார். இதனால் இவர்களில் ஜேக்கப் டஃபி இடம்பெற அதிக வாய்ப்புள்ளதாக கருதப்படுகிறது.
நியூசிலாந்து உத்தேச லெவன்: வில் யங், ரச்சின் ரவீந்திரா, கேன் வில்லியம்சன், டேரில் மிட்செல், டாம் லாதம் (வாரம்), மைக்கேல் பிரேஸ்வெல், கிளென் பிலிப்ஸ், மிட்செல் சான்ட்னர், கைல் ஜேமிசன், ஜேக்கப் டஃபி/மாட் ஹென்றி, வில்லியம் ஓ'ரூர்க்.
Also Read: Funding To Save Test Cricket
நியூசிலாந்து அணி: வில் யங், ரச்சின் ரவீந்திரா, கேன் வில்லியம்சன், டேரில் மிட்செல், டாம் லேதம், கிளென் பிலிப்ஸ், மைக்கேல் பிரேஸ்வெல், மிட்செல் சாண்ட்னர் (கேப்டன்), மேட் ஹென்றி, கைல் ஜேமிசன், வில்லியம் ஓரூர்க், ஜேக்கப் டஃபி, டெவன் கான்வே, மார்க் சாப்மேன், நாதன் ஸ்மித்