சர்வதேச டெஸ்ட் கிரிக்கெட்டிலிருந்து மொயீன் அலி ஓய்வு?

தற்போது அமீரகத்தில் நடைபெற்று வரும் ஐபிஎல் 14ஆவது சீசனின் இரண்டாவது பாதி ஆட்டங்களில் சென்னை சூப்பர் கிங்ஸ் அணிக்காக விளையாடி வரும் இங்கிலாந்து வீரர் மொயின் அலி, சர்வதேச டெஸ்ட் கிரிக்கெட்டிலிருந்து ஓய்வுபெற விரும்புவதாகத் தெரிவித்துள்ளார்.

இவர், கடந்த சில மாதங்களாகவே பயோ பபுளில் இருந்து கிரிக்கெட் விளையாடி வருகிறார். அடுத்து டி20 உலகக் கோப்பை, ஆஷஸ் தொடர் போன்ற கிரிக்கெட் தொடர்களில் பங்கேற்கும் நிலை இருக்கிறது. இதனால், குடும்பத்தினருடன் நேரம் செலவிட முடியவில்லை. மனஅழுத்தமும் அதிகமாகி வருகிறது என்ற காரணத்தினால்தான், இவர் இந்த அதிரடி முடிவினை எடுத்ததாகத் தகவல் வெளியாகியுள்ளது.

இதுகுறித்து பயிற்சியாளர் சில்வர்வுட், கேப்டன் ஜோ ரூட் ஆகியோரிடம் மொயின் அலி முறைப்படி தெரியவிட்டதாகக் கூறப்படுகிறது. மொயின், டெஸ்டிலிருந்து ஓய்வு அறிவித்தாலும் ஒருநாள் மற்றும் டி20 கிரிக்கெட்டில் தொடர்ந்து விளையாடுவார் என அறிவிக்கப்பட்டுள்ளது.

தற்போதைய சர்வதேச டெஸ்ட் ஆல்-ரவுண்டர் தரவரிசையில் மொயின் அலி மூன்றாவது இடத்தில் இருக்கிறார். அதுமட்டுமல்ல டெஸ்டில் 100 விக்கெட் மற்றும் 2000 ரன்களை இயான் போத்தம், கேரி சோபர்ஸ், இம்ரான் கான் ஆகியோரைவிட மிகவிரைவில் எடுத்தவர் என்ற சாதனையையும் தக்க வைத்துள்ளார்.

மொயின் அலி மிகச்சிறந்த வீரராக இருந்தது 2016ஆம் ஆண்டில்தான். அந்த ஆண்டில் மட்டும் நான்கு சதங்களை விளாசி, ரன்களை குவித்து பெஸ்ட் ஆல்-ரவுண்டராக வலம் வந்தார். அடுத்து 2017ஆம் ஆண்டில் தென் ஆப்பிரிக்காவுக்கு எதிரான 4 டெஸ்ட்களில் 25 விக்கெட்களையும், 2018-19 ஆகிய ஆண்டுகளில் இலங்கை, வெஸ்ட் இண்டீஸ் அணிகளுக்கு எதிராக 32 விக்கெட்களையும் வீழ்த்தி மேட்ச் வின்னராக இருந்தார்.

Also Read: இந்திய அணியின் இங்கிலாந்து சுற்றுப்பயணம், 2021

அதன்பிறகு, அவருக்கு டெஸ்டில் அதிகம் வாய்ப்பு வழங்கப்படவில்லை. அப்படிக் கிடைக்கும் வாய்ப்புகளிலும் பெரிய அளவில் பங்களிப்பு வழங்காமல் இருந்து வந்தார். இதனால், இனி வரும் போட்டிகளில் அவர் அதிரடியாக விளையாட வேண்டிய கட்டாயம் இருக்கிறது. ஏற்கனவே பயோ பபுள் காரணமாக, அழுத்தத்தில் இருக்கும் மோயின், இனி வரும் போட்டிகளில் தன்னை நிரூபிக்க வேண்டிய கட்டாயத்தில் இருப்பதால், இதிலிருந்து விடுபடத்தான் அவர் டெஸ்டிலிருந்து ஓய்வு அறிவித்திருக்கிறார் எனக் கூறப்படுகிறது.