ஐசிசி சாம்பியன்ஸ் கோப்பை தொடரில் இன்று நடைபெற்று வரும் இரண்டாவது லீக் போட்டியில் வங்கதேசம் மற்றும் இந்திய அணிகள் பலப்பரீட்சை நடத்தின. துபாய் சர்வதேச கிரிக்கெட் மைதானத்தில் நடைபெற்ற இப்போட்டியில் டாஸ் வென்ற வங்கதேச அணி முதலில் பேட்டிங் செய்வதாக அறிவித்து இந்திய அணியை பந்துவீச அழைத்தது. அதன்படி களமிறங்கிய வங்கதேச அணி தொடக்க வீரர் சௌமியா சர்க்கார் ரன்கள் ஏதுமின்றி விக்கெட்டை இழந்தார்.
அடுத்து களமிறங்கிய நஜ்முல் ஹொசைன் சாண்டோ 0, மெஹிதி ஹசன் 5, முஷ்ஃபிக்கூர் ரஹிம் 0, தன்ஸித் ஹசன் 25 என விக்கெட்டுகளை இழக்க அந்த அணி 35 ரன்களிலேயே 5 விக்கெட்டுகளை இழந்து தடுமாறியது. பின்னர் ஜோடி சேர்ந்த தாவ்ஹித் ஹிரிடோய் - ஜக்கர் அலி இணை அபாரமான ஆட்டத்தை வெளிப்படுத்தியதுடன் தங்கள் அரைசதங்களைப் பதிவுசெய்து 6ஆவது விக்கெட்டிற்கு 154 ரன்கள் பார்ட்னர்ஷிப் அமைத்தும் அசத்தினர்.
அதன்பின் 68 ரன்களில் ஜக்கர் அலி விக்கெட்டை இழக்க, மறுமுனையில் இறுதிவரை களத்தில் இருந்த தாவ்ஹித் ஹிரிடோய் சர்வதேச ஒருநாள் கிரிக்கெட்டில் தனது முதல் சதத்தைப் பதிவுசெய்து அசத்தினார். இதன்மூலம் வங்கதேச அணி 49.4 ஓவர்களில் அனைத்து விக்கெட்டுகளையும் இழந்து 228 ரன்களைச் சேர்த்தது. இந்திய அணி தரப்பில் முகமது ஷமி 5 விக்கெட்டுகளையும், ஹர்ஷித் ரானா 3 விக்கெட்டுகளையும் கைப்பற்றினார்.
இந்நிலையில் இப்போட்டியின் மூலம் முகமது ஷமி சில சாதனைகளையும் படைத்துள்ளார். அதன்படி இப்போட்டியில் அவர் தனது 3ஆவது விக்கெட்டை கைப்பற்றியதன் மூலம் சர்வதேச ஒருநாள் கிரிக்கெட்டில் தனது 200ஆவது விக்கெட்டை பூர்த்தி செய்தார். இதன்மூலம் ஒருநாள் கிரிக்கெட்டில் அதிவேகமாக 200 விக்கெட்டுகளை கைப்பற்றிய முதல் இந்திய வீரர் மற்றும் உலகளவில் இரண்டாவது வீரர் எனும் சாதனையை படைதுள்ளார்.
ஒருநாள் போட்டிகளில் அதிவேகமாக 200 விக்கெட்டுகளை வீழ்த்திய வீரர்கள்
- 102 போட்டிகள் - மிட்செல் ஸ்டார்க்
- 104 போட்டிகள் - முகமது ஷமி / சக்லைன் முஷ்டாக்
- 107 போட்டிகள் - டிரென்ட் போல்ட்
- 112 போட்டிகள் - பிரட் லீ
- 117 போட்டிகள் - ஆலன் டொனால்ட்
ஒருநாள் போட்டிகளில் மிகக்குறைந்த பந்துகளில் 200 விக்கெட்டுகளை வீழ்த்திய வீரர்கள்
- 5126 பந்துகள் - முகமது ஷமி
- 5240 பந்துகள் - மிட்செல் ஸ்டார்க்
- 5451 பந்துகள் - சக்லைன் முஷ்டாக்
- 5640 பந்துகள் - பிரட் லீ
- 5783 பந்துகள் - டிரென்ட் போல்ட்
இதுதவிர்த்து ஐசிசி தொடர்களில் (சாம்பியன்ஸ் கோப்பை & உலகக்கோப்பை) அதிக விக்கெட்டுகளை வீழ்த்திய இந்திய வீரர் எனும் ஜாகீர் கானின் சாதனையை முகமது ஷமி முறியடித்துள்ளார். முன்னதாக ஜாகீர் கான் 59 விக்கெட்டுகளை கைப்பற்றியதே சாதனையாக இருந்த நிலையில், தற்போது முகமது ஷமி 60 விக்கெட்டுகளை கைப்பற்றி அந்த சாதனையை தனதாக்கியுள்ளார் என்பதும் குறிப்பிடதக்கது.
Also Read: Funding To Save Test Cricket
ஐசிசி தொடர்களில் அதிக விக்கெட்டுகள் (இந்தியா)
- 60 விக்கெட்டுகள் - முகமது ஷமி
- 59 விக்கெட்டுகள் - ஜாகீர் கான்
- 47 விக்கெட்டுகள் - ஜவகல் ஸ்ரீநாத்
- 43 விக்கெட்டுகள் - ரவீந்திர ஜடேஜா