SA vs NZ, Tri-Series Final: முத்தரப்பு டி20 தொடரின் இறுதிப் போட்டியில் தென் ஆப்பிரிக்க அணியின் வெற்றிக்கு கடைசி ஓவரில் 7 ரன்கள் மட்டுமே தேவை என்ற நிலையில், மேட் ஹென்றியின் அபார பந்துவீச்சின் காரணமாக நியூசிலாந்து த்ரில் வெற்றியைப் பதிவுசெய்துள்ளது.
ஜிம்பாப்வேவில் நடைபெற்று வந்த முத்தரப்பு டி20 தொடரின் இறுதிப்போட்டிக்கு நியூசிலாந்து மற்றும் தென் ஆப்பிரிக்க அணிகள் முன்னேறின. இதில் இன்று நடைபெற்ற இறுதிப்போட்டியில் டாஸ் வென்ற தென் ஆப்பிரிக்க அணி முதலில் பந்துவீசுவதாக அறிவித்தது. அதன்படி களமிறங்கிய நியூசிலாந்து அணிக்கு டிம் செஃபெர்ட் - டெவான் கான்வே அணி சிறப்பான தொடக்கத்தைக் கொடுத்தனர். இதில் இருவரும் 75 ரன்கள் பார்ட்னர்ஷிப் அமைத்திருந்த நிலையில் டிம் செஃபெர்ட் 30 ரன்களுக்கு விக்கெட்டை இழக்க, அவரைத்தொடர்ந்து டெவான் கான்வேவும் 6 பவுண்டரி, ஒரு சிக்ஸர் என 47 ரன்களிலும் ஆட்டமிழந்து அரைசதம் அடிக்கும் வாய்ப்பை தவறவிட்டனர்.
மேற்கொண்டு களமிறங்கிய ரச்சின் ரவீந்திரா 4 பவுண்டரிகள், 2 சிக்ஸர்களுடன் 47 ரன்னிலும் என விக்கெட்டுகளை இழந்தனர். அதன்பின் களமிறங்கிய வீரர்களில் மார்க் சாப்மேன் 3 ரன்னிலும், மைக்கேல் பிரேஸ்வெல் 15 ரன்னிலும் என விக்கெட்டை இழக்க, இறுதிவரை ஆட்டமிழக்காமல் இருந்த டேரில் மிட்செல் 16 ரன்களைச் சேர்த்தார். இதன்மூலம் நியூசிலாந்து அணி 20 ஓவர்கள் முடிவில் 5 விக்கெட்டுகளை இழந்து 180 ரன்களைச் சேர்த்தது. தென் ஆப்பிரிக்க அணி தரப்பில் லுன்கி இங்கிடி 2 விக்கெட்டுகளையும், குவேனா மபாகா, நந்த்ரே பர்கர் மற்றும் சேனுரன் முத்துசாமி தலா ஒரு விக்கெட்டை கைப்பற்றினர்.
அதன்பின் இலக்கை நோக்கி விளையாடிய தென் ஆப்பிரிக்க அணிக்கு லுவான் ட்ரே பிரிட்டோரியஸ் மற்றும் ரீஸா ஹென்றிக்ஸ் இணை தொடக்கம் கொடுத்தனர். இருவரும் ஆரம்பம் முதலே அதிரடியாக விளையாட அணியின் ஸ்கோரும் மளமளவென உயர்ந்தது. இதில் பிரிட்டோரியஸ் தனது அரைசதத்தையும் பதிவுசெய்து அசத்தினார். அதன்பின் 5 பவுண்டரி, 2 சிக்ஸர்கள் என 51 ரன்களில் பிரிட்டோரியஸ் விக்கெட்டை இழக்க, அவரைத்தொடர்ந்து 4 சிக்ஸர்களுடன் 37 ரன்களை எடுத்திருந்த ரீஸா ஹென்றிக்ஸும் ஆட்டமிழந்து அரைசதம் அடிக்கும் வாய்ப்பை தவறவிட்டார்.
இதையடுத்து களமிறங்கிய கேப்டன் ரஸ்ஸி வேண்டர் டுசென் 18 ரன்களிலும், ருபின் ஹர்மான் 11 ரன்னிலும் ஆட்டமிழந்து ஏமாற்றமளித்தனர். அதன்பின் களமிறங்கிய டெவால்ட் பிரீவிஸ் அதிரடியாக விளையாடி அணியின் வெற்றியை நோக்கி அழைத்துச் சென்றார். இதன்மூலம் தென் ஆப்பிரிக்க அணியின் வெற்றிக்கு கடைசி ஓவரில் 7 ரன்கள் தேவை என்ற நிலையில் ஒரு பவுண்டரி, 3 சிக்ஸர்கள் என 31 ரன்களை எடுத்த கையோடு பிரீவிஸ் விக்கெட்டை இழக்க, அவரைத்தொடர்ந்து ஜார்ஜ் லிண்டேவும் 10 ரன்களில் ஆட்டமிழந்தார். இதனால் தென் ஆப்பிரிக்க அணி வெற்றிக்கு கடைசி பந்தில் 4 ரன்கள் தேவை என்ற நிலை ஏற்பட்டது.
Also Read: LIVE Cricket Score
தென் ஆப்பிரிக்க அணி தரப்பில் கடைசி பந்தை எதிர்கொண்ட சேனுரன் முத்துசாமி ரன்கள் ஏதும் எடுக்காததால் 20 ஓவர்கள் முடிவில் தென் ஆப்பிரிக்க அணி 6 விக்கெட்டுகள் இழப்பிற்கு 177 ரன்களை மட்டுமே எடுக்க முடிந்தது. நியூசிலாந்து தரப்பில் சிறப்பான பந்துவீச்சை வெளிப்படுத்திய மேட் ஹென்றி 2 விக்கெட்டுகளை வீழ்த்தி அணிகு வெற்றியைத் தேடிக்கொடுத்தார். இதன்முலம் நியூசிலாந்து அணி 3 ரன்கள் வித்தியாசத்தில் தென் ஆப்பிரிக்க அணியை வீழ்த்தி த்ரில் வெற்றியைப் பதிவுசெய்ததுடன், இந்த முத்தரப்பு டி20 தொடரில் சாம்பியன் பட்டத்தையும் வென்று அசத்தியுள்ளது.