இரண்டாவது டெஸ்டிலிருந்தும் கேன் வில்லியம்சன் விலகல்; நியூசிலாந்துக்கு பின்னடைவு!

இந்தியாவில் சுற்றுப்பயணம் செய்துவரும் நியூசிலாந்து அணியானது மூன்று போட்டிகள் கொண்ட டெஸ்ட் தொடரில் விளையாடி வருகிறது. இத்தொடரின் முதல் டெஸ்ட் போட்டியானது பெங்களூருவில் உள்ள எம் சின்னசாமி கிரிக்கெட் மைதானத்தில் நடந்து முடிந்துள்ளது. இப்போட்டியில் நியூசிலாந்து அணி 8 விக்கெட் வித்தியாசத்தில் வெற்றிபெற்று அசத்தியதுடன், 1-0 என்ற கணக்கில் தொடரிலும் முன்னிலைப் பெற்றுள்ளது.

இதனைத்தொடர்ந்து இந்தியா - நியூசிலாந்து அணிகளுக்கு இடையேயான இரண்டாவது டெஸ்ட் போட்டி புனேவில் அக்டோபர் 24ஆம் தேதி நடைபெறவுள்ளது. இத்தொடருக்காக இரு அணி வீரர்களும் தீவிரமாக தயாராகி வருகின்றன. இந்நிலையில் இப்போட்டிக்கான நியூசிலாந்து அணியில் இருந்தும் அந்த அணியின் நட்சத்திர வீரர் கேன் வில்லியம்சன் விலகியுள்ளதாக அந்நாட்டு கிரிக்கெட் வாரியம் இன்று அதிகாரப்பூர்வமாக அறிவித்துள்ளது. 

முன்னதாக இலங்கை தொடரின் போது ஏற்பட்ட காயம் காரணமாக இந்திய அணிக்கு எதிரான முதல் டெஸ்ட் போட்டியில் இருந்து விலகினார். இதன் காரணமாக முதல் டெஸ்ட் போட்டிக்கான நியூசிலாந்து அணியில் வில் யங் சேர்க்கப்பட்டிருந்தார். இந்நிலையில் இரண்டாவது டெஸ்ட் போட்டியிலாவது கேன் வில்லியம்சன் விளையாடுவார் என எதிர்பார்க்கப்பட்டிருந்த நிலையில், தற்போது அதிலிருந்து அவர் விலகியுள்ளது அணிக்கு பின்னடவைவாகவே பார்க்கப்படுகிறது. 

இதுகுறித்து பேசிய நியூசிலாந்து பயிற்சியாளர் கேரி ஸ்டீட், “நாங்கள் கேன் வில்லியம்சனின் உடல்நிலையை கண்காணித்து வருகிறோம், அவர் தனது காயத்தில் இருந்து மீண்டு வருகிறார். ஆனாலும் இன்னும் அவர் 100 சதவீதம் சரியாகவில்லை. அதனால் வரும் நாள்களில் அவர் தனது உடல்நிலையில் முன்னேற்றம் காணவும், மூன்றாவது டெஸ்டில் மீண்டும் களமிறங்க வேண்டும் என்றும் நாங்கள் நம்புகிறோம். அவரைத் தயார்படுத்திக் கொள்ள முடிந்தவரை அவருக்கு நேரம் கொடுப்போம்” என்று தெரிவித்துள்ளார்.

நியூசிலாந்து அணியின் முன்னாள் கேப்டன் கேன் வில்லியம்சன் இதுவரை 102 போட்டிகளில் விளையாடி 32 சதங்கள், 35 அரைசதங்கள் என 8,881 ரன்களைக் குவித்துள்ளார். மேற்கொண்டு ஐசிசியின் டெஸ்ட் பேட்டர்களுக்கான தரவரிசையிலும் இரண்டாம் இடத்தில் இருக்கும் கேன் வில்லியம்சன், இப்போட்டியில் விளையாடாதது நியூசிலாந்து அணிக்கு பெரும் பின்னடைவை ஏற்படுத்தும் என கணிக்கப்படுகிறது. 

நியூசிலாந்து டெஸ்ட் அணி: டாம் லாதம் (கேப்டன்), டாம் பிளன்டெல், மைக்கேல் பிரேஸ்வெல் (முதல் டெஸ்ட் மட்டும்), மார்க் சாப்மேன், டெவான் கான்வே, மேட் ஹென்றி, டேரில் மிட்செல், வில் ஓ'ரூர்க், அஜாஸ் படேல், கிளென் பிலிப்ஸ், ரச்சின் ரவீந்திரா, மிட்செல் சான்ட்னர், பென் சியர்ஸ், இஷ் சோதி (இரண்டாவது மற்றும் மூன்றாவது டெஸ்ட் மட்டும்), டிம் சௌதீ, கேன் வில்லியம்சன், வில் யங்

Also Read: Funding To Save Test Cricket

இந்திய டெஸ்ட் அணி: ரோஹித் சர்மா (கே), ஜஸ்பிரித் பும்ரா, யஷஸ்வி ஜெய்ஸ்வால், ஷுப்மான் கில், விராட் கோலி, கேஎல் ராகுல், சர்ஃப்ராஸ் கான், ரிஷப் பந்த், துருவ் ஜூரல், ரவிச்சந்திரன் அஸ்வின், ரவீந்திர ஜடேஜா, அக்ஸர் படேல், குல்தீப் யாதவ், முகமது. சிராஜ், ஆகாஷ் தீப், வாஷிங்டன் சுந்தர்.