PAK vs WI, 1st T20I: ரிஸ்வான், ஹைதர் அலி அதிரடி; விண்டிஸுக்கு 201 டார்கெட்!

பாகிஸ்தானில் சுற்றுப்பயணம் செய்துவரும் வெஸ்ட் இண்டீஸ் அணி 3 போட்டிகள் கொண்ட டி20 தொடரில் விளையாடி வருகிறது. இதில் கராச்சியில் இன்று நடைபெற்று வரும் முதல் போட்டியில் வெஸ்ட் இண்டீஸ் அணி டாஸ் வென்று பந்துவீச முடிவு செய்தது. 

அதன்படி களமிறங்கிய பாகிஸ்தான் அணியில் கேப்டன் பாபர் ஆசாம் இரண்டாவது பந்திலேயே ஆட்டமிழந்து அதிர்ச்சியளித்தார். அதைத்தொடர்ந்து களமிறக்கிய ஃபகர் ஸமானும் 10 ரன்களில் விக்கெட்டை இழந்தார். 

பின்னர் ஜோடி சேர்ந்த முகமது ரிஸ்வான் - ஹைதர் அலி இணை அதிரடியான அட்டத்தை வெளிப்படுத்தி ஸ்கோரை மளமளவென உயர்த்தினர். 

இதில் இருவரும் அரைசதம் கடக்க அணியின் ஸ்கோர் 100ஐ தாண்டியது. தொடர்ந்து அதிரடியாக விளையாடி வந்த ரிஸ்வான் 78 ரன்களில் விக்கெட்டை இழக்க, அடுத்து வந்த ஆசிப் அலியும் ஒரு ரன்னோடு நடையைக் கட்டினார். 

தொடர்ந்து அதிரடியாக விளையாடி வந்த ஹைதர் அலி 68 ரன்களில் ஆட்டமிழந்தார்.இதன்மூலம் 20 ஓவர்கள் முடிவில் பாகிஸ்தான் அணி 6 விக்கெட் இழப்பிற்கு 200 ரன்களைச் சேர்த்தது. 

இதில் அதிகபட்சமாக ரிஸ்வான் 78 ரன்களையும், ஹைதர் அலி 68 ரன்களையும் எடுத்தனர். வெஸ்ட் இண்டீஸ் அணி தரப்பில் ரொமாரியா செஃப்பர்ட் 2 விக்கெட்டுகளைக் கைப்பற்றினார்.