ஜாம்பவான்கள் பாட்டியலில் இடம்பிடித்த பாட் கம்மின்ஸ்!

நியூசிலாந்து - ஆஸ்திரேலிய அணிகளுக்கு இடையேயான முதலாவது டெஸ்ட் போட்டி வெலிங்டனில் விறுவிறுப்பாக நடைபெற்று வருகிறது. அதன்படி இப்போட்டியில் முதலில் பேட்டிங் செய்த ஆஸ்திரேலிய அணி முதல் இன்னிங்ஸில் 383 ரன்களைச் சேர்த்து ஆல் அவுட்டானது. இதில் அதிகபட்சமாக இறுதிவரை ஆட்டமிழக்காமல் இருந்த கேமரூன் க்ரீன் 23 பவுண்டரி, 5 சிக்சர்கள் என 174 ரன்களைச் சேர்த்தார். 

இதையடுத்து களமிறங்கிய நியூசிலாந்து அணியில் கிளென் பிலீப்ஸ், மேத் ஹென்றி ஆகியோரைத் தவிர்த்து மற்ற வீரர்கள் யாரும் சோபிக்க தவறியதால் முதல் இன்னிங்ஸில் 179 ரன்களை மட்டுமே எடுத்த நிலையில் ஆல் அவுட்டானது. இதில் அதிகபட்சமாக கிளென் பிலீப்ஸ் 71 ரன்களையும், மேட் ஹென்றி 42 ரன்களையும் சேர்த்தனர். ஆஸ்திரேலிய அணி தரப்பில் நாதன் லையன் 4 விக்கெட்டுகளையும், ஜோஷ் ஹசில்வுட் 2 விக்கெட்டுகளையும் கைப்பற்றினர். 

இதன்மூலம் ஆஸ்திரேலிய அணி முதல் இன்னிங்ஸில் 204 ரன்கள் முன்னிலையும் பெற்று அசத்தியது. அதன்பின் இரண்டாவது இன்னிங்ஸைத் தொடங்கிய ஆஸ்திரேலிய இரண்டாம் நாள் ஆட்டநேர முடிவில் ஆஸ்திரேலிய அணி 2 விக்கெட் இழப்பிற்கு 13 ரன்களைச் சேர்த்துள்ளது. இதில் உஸ்மான் கவாஜா 5 ரன்களுடனும், நாதன் லையன் 6 ரன்களுடனும் களத்தில் உள்ளனர்.இதையடுத்து 217 ரன்கள் முன்னிலையுடன் ஆஸ்திரேலிய அணி நாளை மூன்றாம் நாள் ஆட்டத்தை தொடரவுள்ளது.

இந்நிலையில் இப்போட்டியில் ஆஸ்திரேலிய அணி கேப்டன் பாட் கம்மின்ஸ் டேரில் மிட்செலின் விக்கெட்டை கைப்பற்றி இருந்தார். இதன்மூலம் சர்வதேச டெஸ்ட் கிரிக்கெட்டில் ஜாம்பவான்கள் பட்டியளில் பாட் கம்மின்ஸ் இடம்பிடித்துள்ளார். அதாவது ஆஸ்திரேலிய அணியின் கேப்டனாக இதுவரை 47 இன்னிங்ஸ்களில் 100 விக்கெட்டுகளை வீழ்த்தி சாதனைப் படைத்துள்ளார். 

மேலும் அணியின் கேப்டனாக சர்வதேச டெஸ்ட் கிரிக்கெட்டில் 100 விக்கெட்டுகளை கைப்பற்றிய 10ஆவது வீரர் எனும் பெருமையையும் பாட் கம்மின்ஸ் பெற்றுள்ளார். இந்த பட்டியலில் பாகிஸ்தான் அணியின் முன்னாள் கேப்டன் இம்ரான் கான் 71 இன்னிங்ஸில் 187 விக்கெட்டுகளை வீழ்த்தி முதலிடத்திலும், ரிச்சி பெனாட் 56 டெஸ்ட் இன்னிங்ஸ்களில் 138 விக்கெட்டுகளை வீழ்த்தி இரண்டாவது இடத்திலும் உள்ளனர். இப்பட்டியளில் இந்திய அணியின் முன்னாள் கேப்டன் கபில்தேவ் 58 இன்னிங்ஸில் 111 விக்கெட்டுகளை வீழ்த்தி ஐந்தாவது இடத்தைப் பிடித்துள்ளார்.

டெஸ்ட் கிரிக்கெட்டில் கேப்டனாக அதிக விக்கெட்டுகளை வீழ்த்தியவர்கள்

• இம்ரான் கான் - 187 விக்கெட்டுகள் (71 இன்னிங்ஸில்)
• ரிச்சி பெனாட் - 138 விக்கெட்டுகள் (56 இன்னிங்ஸில்)
• கேரி சோபர்ஸ் - 117 விக்கெட்டுகள் (69 இன்னிங்ஸில்) 
• டேனியல் வெட்டோரி - 116 விக்கெட்கள் (54 டெஸ்ட் இன்னிங்ஸில்) 
• கபில் தேவ் - 111 விக்கெடுகள் (58 டெஸ்ட் இன்னிங்ஸில்) 
• வாசிம் அக்ரம் - 107 விக்கெட்டுகள் (46 டெஸ்ட் இன்னிங்ஸில்) 
• பிஷன் பேடி - 106 விக்கெட்டுகள் (39 டெஸ்ட் 106 விக்கெட்டுகள்)
• ஷான் பொல்லாக் - 103 விக்கெட்கள் (50 டெஸ்ட் இன்னிங்ஸில்)
• ஜேசன் ஹோல்டர் -  100 விக்கெட்டுகள் (63 டெஸ்ட் இன்னிங்ஸில்)
• பாட் கம்மின்ஸ் - 100 விக்கெட்டுகள் (47 இன்னிங்ஸில்)*