பாகிஸ்தான், ஐக்கிய அரபு அமீரகத்தில் நடைபெற்று வரும் ஐசிசி சாம்பியன்ஸ் கோப்பை தொடரானது இறுதிக்கட்டத்தை எட்டியுள்ளது. மொத்தம் 8 அணிகள் பங்கேற்றிருந்த இத்தொடரில் இந்தியா, ஆஸ்திரேலியா, நியூசிலாந்து மற்றும் தென் ஆப்பிரிக்க அணிகள் முன்னேறியுள்ளன.
இதில் இன்று நடைபெறும் முதல் அரையிறுதி போட்டியில் ரோஹித் சர்மா தலைமையிலான இந்திய அணியும், ஸ்டீவ் ஸ்மித் தலைமையிலான ஆஸ்திரேலிய அணியும் பலப்பரீட்சை நடத்தவுள்ளன. இவ்விரு அணிகளுக்கும் இடையேயான இப்போட்டி துபாய் சர்வதேச கிரிக்கெட் மைதானத்தில் நடைபெறவுள்ளது. நடப்பு சாம்பியன்ஸ் கோப்பை தொடரில் இந்திய அணி விளையாடிய மூன்று போட்டிகளிலும் வெற்றிபெற்ற உத்வேகத்துடன் இப்போட்டியை எதிர்கொள்கிறது.
மறுபுறம் ஆஸ்திரேலிய அணியும் தோல்வியைச் சந்திக்காமல் இப்போட்டியை எதிர்கொள்வதால், இதில் எந்த அணி வெற்றிபெறும் என்ற எதிர்பார்ப்புகள் அதிகரித்துள்ளன. இதற்காக இரு அணிகளும் தீவிரமாக தயாராகி வருகின்றனர். இந்நிலையில் இப்போட்டிக்கான இரு அணிகளின் கணிக்கப்பட்ட உத்தேச லெவன் குறித்து இப்பதிவில் பார்ப்போம்.
இந்திய அணி
ரோஹித் சர்மா தலைமையிலான இந்திய அணி கடந்த போட்டியில் நான்கு சுழற்பந்து வீச்சாளர்களுடன் களமிறங்கியது. அதிலும் குறிப்பாக தனது முதல் வாய்ப்பை பெற்றிருந்த வருண் சக்ரவர்த்தி 5 விக்கெட்டுகளை கைப்பற்றி அசத்தினார். இதனால் இன்றைய போட்டியிலும் இந்திய அணி இதே அணியுடன் செல்லும் என்ற எதிர்பார்ப்புகள் அதிகரித்துள்ளனர். இருப்பினும் கூடுதல் வேகப்பந்து வீச்சாளர் இல்லாமல் செல்வது அணிக்கு பின்னடைவை ஏற்படுத்தும் என்ற கருத்துகளும் உள்ளது.
அப்படி ஒருவேளை இந்திய அணி கூடுதல் வேகப்பந்து வீச்சாளரை லெவனில் சேர்க்கும் பட்சத்தில், குல்தீப் யாதவ் அல்லது வருண் சக்ரவர்த்தி ஆகியோரில் ஒருவர் வெளியேற்றப்படலாம். தற்போது இருக்கும் ஃபார்மில் வருண் சக்ரவர்த்தியை வெளியேற்றுவது இந்திய அணிக்கு பின்னடைவை ஏற்படுத்தலாம். அதேசமயம் குல்தீப் யாதவ் கடந்த போட்டியில் ரன்களை கொடுத்துள்ளதால் அவரின் இடம் தான் தற்போது கேள்விக்குறியாகியுள்ளது. மற்றபடி அணியில் அந்த மாற்றமும் இருக்காது.
India Probable Playing XI: ரோஹித் சர்மா (கேப்டன்), ஷுப்மன் கில், விராட் கோலி, ஸ்ரேயாஸ் ஐயர், கேஎல் ராகுல், அக்ஸர் படேல், ஹர்திக் பாண்டியா, ரவீந்திர ஜடேஜா, முகமது ஷமி, வருண் சக்ரவர்த்தி, குல்தீப் யாதவ்/ஹர்ஷித் ரானா.
ஆஸ்திரேலிய அணி
ஸ்டீவ் ஸ்மித் தலைமையிலான ஆஸ்திரேலிய அணியும் அடுத்தடுத்து வெற்றிகளைப் பெற்ற உத்வேகத்துடன் இப்போட்டியை எதிர்கொள்கிறது. இருப்பினும் கடந்த போட்டியில் அந்த அணியின் தொடக்க வீரர் மேத்யூ ஷார்ட் காயமடைந்ததை அடுத்து, இத்தொடரில் இருந்து விலகியுள்ளது அந்த அணிக்கு பின்னடைவாக பார்க்கப்படுகிறது. இதையடுத்து அவருக்கு பதிலாக கூப்பர் கன்னொலி ஆஸ்திரேலிய அணியில் சேர்க்கப்பட்டுள்ளார்.
இருப்பினும் இப்போட்டிக்கான ஆஸ்திரேலிய அணியின் பிளேயிங் லெவனில் தொடக்க வீரரான ஜேக் ஃபிரேசர் மெக்குர்க் களமிறங்கவே அதிக வாய்ப்புள்ளது. ஒருவேளை கூப்பர் கான்னொலியை பிளேயிங் லெவனில் சேர்க்க விரும்பும் பட்சத்தில் அலெக்ஸ் கேரி அல்லது ஜோஷ் இங்கிலிஸ் ஆகியோரில் ஒருவரு தொடக்க வீரராக விளையாட வேண்டிய கட்டாயத்திற்கு தள்ளப்படுவார்கள் என்பது குறிப்பிடத்தக்கது.
Australia Probable Playing XI: ஜேக் ஃபிரேசர்-மெக்குர்க், டிராவிஸ் ஹெட், ஸ்டீவ் ஸ்மித் (கேப்டன்), மார்னஸ் லபுஷாக்னே, ஜோஷ் இங்கிலிஸ், அலெக்ஸ் கேரி, கிளென் மேக்ஸ்வெல், பென் ட்வார்ஷூயிஸ், நாதன் எல்லிஸ், ஆடம் ஸாம்பா, ஸ்பென்சர் ஜான்சன்.
Also Read: Funding To Save Test Cricket