PSL 2023: ரஸா அரைசதத்தால் தப்பிய லாகூர் கலந்தர்ஸ்!

பாகிஸ்தன் சூப்பர் லீக் டி20 கிரிக்கெட் தொடரின் 8ஆவது சீசன் தற்போது தொடங்கி ரசிகர்களின் வரவேற்பை பெற்றுள்ளது. இதில் இன்று நடைபெற்று வரும் 18ஆவது லீக் ஆட்டத்தில் குயிட்டா கிளாடியேட்டர்ஸ் அணி, லாகூர் கலந்தர்ஸ் அணியை எதிர்கொள்கிறது. 

அதன்படி லாகூரில் உள்ள கடாஃபி கிரிக்கெட் மைதானத்தில் நடைபெறும் இப்போட்டியில் டாஸ் வென்ற குயிட்டா கிளாடியேட்டர்ஸ் அணி முதலில் பந்துவீச தீர்மானித்தது. அதன்படி களமிறங்கிய லாகூர் கலந்தர்ஸ் அணிக்கு ஆரம்பமே அதிர்ச்சி காத்திருந்தது. 

இதில் நட்சத்திர வீரர்களான ஃபகர் ஸமான் 4, மிர்ஸா தாஹிர் 2, அப்துல்லா ஷஃபிக் 15, சாம் பில்லிங்ஸ் 2, ஹுசைன் தாலத் 6 என அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினர். இதனால் 50 ரன்களுக்கே லாகூர் கலந்தர்ஸ் அணி 7 விக்கெட்டுகளை இழந்து தடுமாறியது. 

இதையடுத்து ஜோடி சேர்ந்த சிக்கந்தர் ரஸா - ரஷித் கான் இணை சிறப்பான ஆட்டத்தை வெளிப்படுத்தி 50 ரன்களை பார்ட்னர்ஷிப்பையும் அமைத்துக்கொடுத்தனர். பின் 21 ரன்களில் ரஷித் கான் ஆட்டமிழக்க, மறுமுனையிலிருந்த சிக்கந்தர் ரஸா 22 பந்துகளில் தனது அரைசதத்தைப் பதிவுசெய்தார்.

இறுதியில் அந்த அணி 19.2 ஓவர்கள் முடிவில் அனைத்து விக்கெட்டுகளையும் இழந்து 148 ரன்களைச் சேர்த்தது. இதில் இறுதிவரை ஆட்டமிழக்காமல் இருந்த சிக்கந்தர் ரஸா 33 பந்துகளில் 8 பவுண்டரி, 3 சிக்சர்க் என 71 ரன்களைச் சேர்த்தார். குயிட்டா கிளாடியேட்டர்ஸ் தரப்பில் நவின் உல் ஹக், முகமது நவாஸ் தலா 2 விக்கெட்டுகளைக் கைப்பற்றினர்.