பாகிஸ்தான் சூப்பர் லீக் தொடரின் 10ஆவது சீசன் விறுவிறுப்பாக நடைபெற்று வரும் நிலையில், நேற்று நடைபெற்ற 12ஆவது லீக் போட்டியில் முல்தான் சுல்தான்ஸ் மற்றும் இஸ்லாமாபாத் யுனைடெட் அணிகள் பலப்பரீட்சை நடத்தின. முல்தானில் நடைபெற்ற இப்போட்டியில் டாஸ் வென்ற முல்தான் அணி முதலில் பேட்டிங்கைத் தேர்வு செய்தது.
அதன்படி களமிறங்கிய முல்தான் அணிக்கு கேப்டன் முகமது ரிஸ்வான் மற்றும் யஷிர் கான் இணை தொடக்கம் கொடுத்தனர். இருவரும் சிறப்பான ஆட்டத்தை வெளிப்படுத்தியதுடன் முதல் விக்கெட்டிற்கு 51 ரன்கள் பார்ட்னர்ஷிப்பையும் அமைத்தனர். இதில் யசிர் கான் 29 ரன்களில் நடையைக் கட்ட, அடுத்து களமிறங்கிய உஸ்மான் கான் அதிரடியாக விளையாடி அணியின் ஸ்கோரை உயர்த்தியாதுடன் அரைசதத்தையும் பூர்த்தி செய்தார். அதேசமயம் அரைசதம் அடிப்பார் என எதிர்பார்க்கப்பட்ட ரிஸ்வான் 36 ரன்களில் விக்கெட்டை இழந்து ஏமாற்றமளித்தார்.
அவரைத்தொடர்ந்து களமிறங்கிய மைக்கேல் பிரேஸ்வெல் 9 ரன்களுக்கும், இஃப்திகார் அஹ்மத் 10 ரன்களுக்கும் விக்கெட்டை இழக்க, அதிரடியாக விளையாடி வந்த உஸ்மான் கானும் 4 பவுண்டரி, 4 சிக்ஸர்கள் என 61 ரன்களில் விக்கெட்டை இழந்தார். இறுதியில் காம்ரன் குலாம் ஒரு பவுண்டரி, ஒரு சிக்ஸர் என 13 ரன்களைச் சேர்க்க முல்தான் சுல்தான்ஸ் அணி 20 ஓவர்கள் முடிவில் 5 விக்கெட்டுகளை இழந்து 168 ரன்களை மட்டுமே சேர்த்தது. இஸ்லாமாபாத் அணி தரப்பில் ரைலி மெரிடித், ஜேசன் ஹோல்டர், முகமது நவாஸ், ஷதாப் கான் தலா ஒரு விக்கெட்டை கைப்பற்றினர்.
பின்னர் இலக்கை நோக்கி களமிறங்கிய இஸ்லாமாபாத் யுனைடெட் அணிக்கு சாஹிப்சாதா ஃபர்கான் மற்றும் ஆண்ட்ரிஸ் கஸ் இணை தொடக்கம் கொடித்தனர். இதில் சாஹிப்சாதா ஃபர்கான் 20 ரன்களில் ஆட்டமிழந்து பெவிலியனுக்கு திரும்பினார். அதன்பின் இணைந்த ஆண்ட்ரிஸ் கஸ் மற்றும் காலின் முன்ரோ இணை அதிரடியாக விளையாடி அணியின் விக்கெட் இழப்பை தடுத்து நிறுத்தியதுடன், ஸ்கோரையும் மளமளவென உயர்த்தினர். இப்போட்டியில் அபார ஆட்டத்தை வெளிப்படுத்தி வந்த ஆண்ட்ரிஸ் கஸ் தனது அரைசதத்தையும் பூர்த்தி செய்து அசத்தினார்.
Also Read: LIVE Cricket Score
அதேசமயம் மறுமுனையில் அரைசதம் அடிப்பார் என எதிர்பார்க்கப்பட்ட காலின் முன்ரோ 45 ரன்களில் விக்கெட்டை இழக்க, அடுத்து களமிறங்கிய முகமது நவாஸும் 21 ரன்களுடன் ஆட்டமிழந்தார். இருப்பினும் இறுதிவரை ஆட்டமிழக்காமல் இருந்த ஆண்ட்ரிஸ் கஸ் 6 பவுண்டரி, 5 சிக்ஸர்கள் என 80 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் இஸ்லாமாபாத் யுனைடெட் அணி 17.1 ஓவர்களிலேயே இலக்கை எட்டியதுடன் 7 விக்கெட் வித்தியாசத்தில் முல்தான் சுல்தான்ஸ் அணியை வீழ்த்தி வெற்றிபெற்றது.