பாகிஸ்தான் சூப்பர் லீக் தொடரின் 10ஆவது சீசன் தொடங்கி நடைபெற்று வருகிறது. இதில் நேற்று நடைபெற்ற 6ஆவது லீக் போட்டியில் கராச்சி கிங்ஸ் மற்றும் லாகூர் கலந்தர்ஸ் அணிகள் பலப்பரீட்சை நடத்தின. கராச்சியில் நடைபெற்ற இப்போட்டியில் டாஸ் வென்ற லாகூர் கலந்தர்ஸ் அணி முதலில் பேட்டிங் செய்தவாக அறிவித்தது.
அதன்படி களமிறங்கிய லாகூர் அணியில் ஃபகர் ஸமான் ஒருபக்கம் அதிரடி காட்டிய நிலையில், மறுபக்கம் முகமது நயீம் 7 ரன்களுக்கும், அப்துல்லா ஷஃபிக் 6 ரன்களுக்கும் என விக்கெட்டுகளை இழந்து பெவிலியனுக்கு நடையைக் கட்டினர். அதன்பின் ஃபகர் ஸமானுடன் இணைந்த டேரில் மிட்செல் அதிரடியாக விளையாடி அணியின் ஸ்கோரை உயர்த்தினர். இப்போட்டியில் தொடர்ந்து சிறப்பாக செயல்பட்டு வந்த இருவரும் தங்களுடைய அரைசதங்களை பூர்த்தி செய்து அசத்தியதுடன் 3ஆவது விக்கெட்டிற்கு 125 ரன்கள் பார்ட்னர்ஷிப் அமைத்தும் அசத்தினர்.
அதன்பின் தொடர்ந்து அதிரடியாக விளையாடி வந்த ஃபகர் ஸமான் 6 பவுண்டரிகள், 5 சிக்ஸர்கள் என 76 ரன்களையும், டேரில் மிட்செல் 9 பவுண்டரிகள், 2 சிக்சர்கள் என 75 ரன்களையும் சேர்த்த்து விக்கெட்டுகளை இழந்தனர். அவர்களைத் தொடர்ந்து களமிறங்கிய சாம் பில்லிங்ஸ் 19 ரன்களையும், சிக்கந்தர் ரஸா 10 ரன்களையும் சேர்த்ததன் மூலம் 20 ஓவர்கள் முடிவில் லாகூர் கலந்தர்ஸ் அணி 6 விக்கெட்டுகளை இழந்து 201 ரன்களைச் சேர்த்தது. கராச்சி கிங்ஸ் அணி தரப்பில் அபாரமான பந்துவீச்சை வெளிப்படுத்திய ஹசன் அலி 4 விக்கெட்டுகளை கைப்பற்றினார்.
இதனையடுத்து இலக்கை நோக்கி களமிறங்கிய கராச்சி கிங்ஸ் அணிக்கு தொடக்கம் சிறப்பானதாக அமையவில்லை. அணியின் டாப் ஆர்டர் வீரர்கள் கேப்டன் டேவிட் வார்னர் மற்றும் அவரைத்தொடர்ந்து களமிறங்கிய ஜேம்ஸ் வின்ஸ் ஆகியோர் ரன்கள் ஏதுமின்றியும், டிம் செய்ஃபெர்ட் 18 ரன்களுக்கும், இர்ஃபான் கான் 6 ரன்களுக்கும், ஷான் மசூத் 16 ரன்களுக்கும், அராஃபத் மின்ஹாஸ் ரன்கள் ஏதுமின்றியும், அப்பாஸ் அஃப்ரிடி ஒரு ரன்னிலும் என அடுத்தடுத்து விக்கெட்டுகளை இழந்து பெவிலியானுக்கு நடையைக் கட்ட, அந்த அணி 50 ரன்களில் 7 விக்கெட்டுகளை இழந்து தடுமாறியது.
Also Read: Funding To Save Test Cricket
பின்னர் இணைந்த குஷ்தில் ஷா - ஹசன் அலி இணை ஓரளவு தக்குபிடித்து ரன்களைச் சேர்த்தனர். பின் ஹசன் அலி 27 ரன்களிலும், குஷ்தில் ஷா 39 ரன்னிலும் ஆட்டமிழக்க கராச்சி கிங்ஸ் அணி 19.1 ஓவர்களில் அனைத்து விக்கெட்டுகளையும் இழந்து 136 ரன்களுக்கு ஆல் அவுட்டானது. லாகூர் அணி தரப்பில் கேப்டன் ஷாஹீன் அஃப்ரிடி மற்றும் ரிஷாத் ஹொசைன் தலா 3 விக்கெட்டுகளை கைப்பற்றினர். இதன்மூலம் லாகூர் கலந்தர்ச் அணி 65 ரன்கள் வித்தியாசத்தில் கராச்சி கிங்ஸ் அணியை வீழ்த்தி வெற்றிபெற்று அசத்தியுள்ளது.