ஐபிஎல் 2023: ஹாட்ரிக் விக்கெட்டுகளை வீழ்த்திய ரஷித் கான்; வைரல் கணோலி!

ஐபிஎல் தொடரின் 13ஆவது லீக் ஆட்டத்தில் கொல்கத்தா நைட் ரைடர்ஸ் மற்றும் குஜராத் டைட்டன்ஸ் அணிகள் மோதின. இதில் முதலில் பேட்டிங் செய்த குஜராத் அணியில், ஷுப்மன் கில் 39(31) ரன்கள், சாய் சுதர்சன் 53(38) ரன்கள் அடித்துக்கொடுக்க, கடைசியில் வந்து வானவேடிக்கை காட்டிய விஜய் சங்கர் 24 பந்துகளில் 5 சிக்ஸர்ஸ், 4 பவுண்டரிஸ் உட்பட 63 ரன்கள் விளாசினார். இறுதியில், 20 ஓவர்கள் முடிவில் 4 விக்கெட்டுகள் இழப்பிற்கு 204 ரன்கள் குவித்தது குஜராத் அணி.

இதையடுத்து, 205 ரன்கள் எனும் இமாலய இலக்கை துரத்தியபோது 2 விக்கெட்டுகள் இழந்து கொல்கத்தா அணி தடுமாறியது. 3ஆவது விக்கெட்டுக்கு ஜோடி சேர்ந்த வெங்கடேஷ் ஐயர் மற்றும் நிதிஷ் ராணா இருவரும் அபாரமாக ஆடினர். இந்த ஜோடி 100 ரன்கள் சேர்த்தது. நிதிஷ் ராணா 45(29) ரன்கள், வெங்கடேஷ் ஐயர் 83(40) அடித்து அவுட்டாகினர். 16 ஓவர்களில் 155 ரன்கள் அடித்து நான்கு விக்கெட்டுகளை மட்டுமே இழந்து வலுவான நிலையில் இருந்தது கொல்கத்தா அணி. கடைசி நான்கு ஓவர்களில் வெற்றிக்கு 50 ரன்கள் மட்டுமே தேவைப்பட்டது.

முதல் மூன்று ஓவர்களில் 35 ரன்கள் வாரிகொடுத்த ரஷித் கான் தனது நான்காவது ஓவரை வீச வந்தார். ஆட்டத்தின் மிக முக்கியமான 17 ஆவது ஓவரில் டேஞ்சராக காணப்பட்ட ஆண்ட்ரே ரஸல் விக்கெட்டை முதல் பந்தில் தூக்கினார். அடுத்து உள்ளே வந்த சுனில் நரைன் விக்கெட்டை இரண்டாவது பந்தில் எடுத்து, ஹாட்ரிக் வாய்ப்பை பெற்றார்.

கடந்த போட்டியில் அசத்திய சர்துல் தாக்கூர், இப்போட்டியில் வெற்றி பெற்று கொடுப்பார் என்று எதிர்பார்த்திருந்தபோது ரஷித் கான் வீசிய மூன்றாவது பந்தில் ஆட்டம் இழந்து அதிர்ச்சி கொடுக்க, ஹாட்ரிக் விக்கெட் வீழ்த்தி வெறித்தனமான சம்பவம் செய்தார் ரஷித் கான். இதன்மூலம் ஐபிஎல் தொடரில் தனது முதல் ஹாட்ரிக் விக்கெட்டையும் கைப்பற்றி அசத்தினார். 

அதேசமயம் டி20 கிரிக்கெட் வரலாற்றில் அதிக ஹாட்ரிக் விக்கெட்டுகளைக் கைப்பற்றியவர்கள் பட்டியளில் 4 முறை ஹாட்ரிக் விக்கெட்டுகளைக் கைப்பற்றி முதலிடத்தையும் பிடித்து சாதனைப் படைத்துள்ளார். அதேபோல் கேகேஆர் அணிக்கெதிரான ஹாட்ரிக் விக்கெட்டுகளை வீழ்த்தியவர்களில் 4ஆவது வீரராகவும் ரஷித் கான் இணைந்துள்ளார்.