இந்தியா - வங்கதேச அணிகளுக்கு இடையேயான இரண்டு டெஸ்ட் போட்டிகள் கொண்ட தொடரின் முதல் போட்டி, சென்னை சேப்பாக்கத்தில் உள்ள எம்ஏ சிதம்பரம் கிரிக்கெட் மைதானத்தில் வியாழன் (செப்டம்பர் 19) முதல் நடைபெறவுள்ளது. மேலும் இப்போட்டிக்கான இரு அணி வீரர்களும் சென்னை வந்தடைந்ததுடன், தங்களது பயிற்சிகளிலும் ஈடுபட்டு வருகின்றனர். மேலும் இது உலக டெஸ்ட் சாம்பியன்ஷிப் தொடரின் அங்கமாக இருப்பதால் கூடுதல் எதிர்பார்ப்புகளும் உள்ளன.
இந்நிலையில் வங்கதேச அனிக்கு எதிரான இந்த டெஸ்ட் தொடரில் இந்திய அணியின் விக்கெட் கீப்பர் பேட்டர் ரிஷப் பந்த் சர்வதேச டெஸ்ட் கிரிக்கெட்டில் இந்திய அணிக்காக சிறப்பு சாதனை படைக்கும் வாய்ப்பைப் பெற்றுள்ளார். அந்தவகையில் இந்தப் போட்டியில் ரிஷப் பந்த் 7 சிக்சர்கள் அடித்தால், முன்னாள் கேப்டன்கள் கபில்தேவ், சவுரவ் கங்குலி ஆகியோரை பின்னுக்குத் தள்ளி, சர்வதேச டெஸ்ட் கிரிக்கெட்டில் இந்தியாவுக்காக அதிக சிக்ஸர்கள் அடித்த வீரர்கள் பட்டியலில் ஆறாவது இடத்தைப் பிடிப்பார்.
இந்திய அணிக்காக இதுவரை 33 டெஸ்டில் 56 இன்னிங்ஸ்களில் விளையாடியுள்ள ரிஷப் பந்த 55 சிக்சர்களை அடித்துள்ளார். அதேசமயம் இந்திய அணியின் முன்னாள் கேப்டன் கபில்தேவ் 131 டெஸ்டில் 184 இன்னிங்ஸில் விளையாடி 61 சிக்சர்களையும், சௌரவ் கங்குலி 113 டெஸ்டில் 188 இன்னிங்ஸில் 57 சிக்ஸர்களையும் அடித்து 6 மற்றும் 7ஆம் இடங்களில் நீடித்து வருகின்றனர். இந்த பட்டியலில் முன்னாள் வீரர் வீரேந்திர சேவாக் 90 சிக்ஸர்களுடன் முதலிடத்தில் உள்ளார்.
அவரைத்தொடர்ந்து இந்திய அணி கேப்டன் ரோஹித் சர்மா 84 சிக்ஸர்களை விளாசி இரண்டாம் இடத்திலும், முன்னாள் கேப்டன் மகேந்திர சிங் தோனி 78 சிக்ஸர்களை விளாசி மூன்றாம் இடத்திலும், முன்னாள் ஜாம்பவாம் சச்சின் டெண்டுல்கர் 69 சிக்ஸர்களை விளாசி நான்காம் இடத்திலும், ரவீந்திர ஜடேஜா 64 சிக்ஸர்களை விளாசி 5ஆம் இடத்திலும் உள்ளனர் என்பது குறிப்பிடத்தக்கது.
இது தவிர, ரிஷப் பந்த் இந்த தொடரில் நான்கு சிக்ஸர்களை அடிக்கும் பட்சத்தில், முன்னாள் கேப்டன் கபில்தேவை மிஞ்சி சர்வதேச கிரிக்கெட்டில் இந்திய அணிக்காக அனைத்து ஃபார்மெட்டுகளையும் சேர்த்து அதிக சிக்ஸர்கள் விளாசியர் பட்டியலில் 14ஆவது இடத்தை பிடிப்பார். சர்வதேச கிரிக்கெட்டில் கபில்தேவ் இதுவரை 128 சிக்சர்களை விளாசியுள்ள நிலையில், ரிஷப் பந்து மூன்று வடிவங்களையும் சேர்த்து 125 சிக்ஸர்களை அடித்துள்ளார் என்பது குறிப்பிடத்தக்கது.
முன்னதாக கடந்த 2022ஆம் ஆண்டு கார் விபத்தில் சிக்கி படுகாமடைந்த ரிஷப் பந்த், அதன்பின் கிட்டத்திட்ட ஓராண்டுக்கு மேலாக எந்தவொரு கிரிக்கெட் போட்டிகளிலும் விளையாடாமல் ஓய்வில் இருந்துவந்தார். அதன்பின் ஐபிஎல் தொடரில் சிறப்பான ஆட்டத்தை வெளிப்படுத்திய அவர், நடந்து முடிந்த டி20 உலகக்கோப்பை கிரிக்கெட் தொடரிலும் இந்திய அணிக்காக விளையாடி தற்போது, இந்த தொடர் மூலம் டெஸ்ட் கிரிக்கெட்டிலும் கம்பேக் கொடுக்கிறார் என்பது குறிப்பிடத்தக்கது.
Also Read: Funding To Save Test Cricket
இந்திய அணி: ரோஹித் சர்மா (கே), யஷஸ்வி ஜெய்ஸ்வால், ஷுப்மன் கில், விராட் கோலி, கேஎல் ராகுல், சர்ஃப்ராஸ் கான், ரிஷப் பந்த், துருவ் ஜூரல், ரவிச்சந்திரன் அஷ்வின், ரவீந்திர ஜடேஜா, அக்ஸர் படேல், குல்தீப் யாதவ், முகமது சிராஜ், ஆகாஷ் தீப் , ஜஸ்பிரித் பும்ரா, யாஷ் தயாள்.